Ne fanau a Jairo mo e gagao cerebral palsy ne fakahigoa ko e spastic quadriplegia. * Ti nakai maeke a ia ke tautaofi e falu alaga he tino haana. Nakai maeke e uhoniu haana ke fematutaki mo e tau vala he tino ke maeke ke fakagahuahua e tau alaga ia haana, ti kua mapelupelu noa. He falu magaaho, ne lutulutu fakahanoa e tau alaga ha Jairo ti pakia a ia. Pakia foki e tau tagata ne tata atu ki a ia ka nakai mataala a lautolu. Momoko ai, kua lata ni ke pipi e tau lima mo e tau hui haana ke he nofoa fakatāveli ke ua pakia.

Mamahi lahi mahaki e tino ha Jairo he tupu hake a ia. Magaaho ne tolu e mahina haana, ne kamata a ia ke fakafitikia ti galo e fafagu haana. Lagaloga ne fa kuku fakamaō e Mami a ia ti uta fakamafiti ke he fale gagao, manatu kua mate a ia.

Ha ko e fakamaō mo e kokoho he tau alaga, ne fano fakahaga e tau polohui motua ha Jairo ti keukeu. He 16 e tau, ne maholo e patu pula haana ti lata ke iihi lahi e fuga tega, hui pula, mo e patu pula. Manatu agaia e au a Jairo ne tagi tumau ka pō he mamahi he fakatalitali ke malolō.

Ha ko e matulituli lahi ha Jairo ne falanaki katoatoa a ia ke he falu ke taute e tau gahua he tau aho takitaha, tuga e kai, fakatui, mo e tauteute ke mohe. Ko Mami mo Tete ne fa taute e tau gahua nei. Pete kua leveki tumau a Jairo, ne fakamanatu tumau he tau matua ha maua ki a ia kua nakai falanaki hokoia e moui haana ke he falu tagata ka e falanaki foki ke he Atua.

Ko e Tau Fakamoli a Iehova e tau matua ha maua, ti totou e laua e tau tala Tohi Tapu ki a Jairo tali mai he mukemuke a ia. Iloa tumau e laua kua fai kakano mooli e moui ka moua he tagata e fakafetuiaga mo e Atua. Ne līlī a Jairo he tino maluelue ne fa lutulutu tumau, ka e maeke a ia ke fiafia mo e mauokafua e amaamanakiaga ma e vahā anoiha. Fa manamanatu a laua na maama nakai e Jairo e tau fakaakoaga he Tohi Tapu.

Taha aho he mogo ne tote agaia a Jairo, ne hūhū a Tete ki a ia, “Jairo, fakamolemole maeke nakai a koe ke tutala ki a au?” Ti lafi e ia, “Ka fakaalofa mooli a koe ki a au, to tutala a koe!” He ole fakamakamaka a Tete ki a ia ke talahau taha e kupu, ne hihina e tau mata ha Jairo. Pete kua lali a ia ke talahau e  tau logonaaga haana, ne maeke ni a ia ke gūgū. Ne fuafuakelea a Tete ha kua fakatagi e ia a Jairo. Ka ko e mena ia ne tupu ne fakakite na maama e Jairo e tau mena ha Tete ne talahau. Ko e lekua kua nakai maeke a ia ke vagahau.

Nakai leva, ti mailoga he tau matua ha maua kua fa lutulutu mafiti e tau mata ha Jairo ka lali ke fakakite e tau manatu mo e tau logonaaga haana. Ne lolelole e loto ha Jairo ha kua nakai maeke tumau a ia ke fakamaama e tau manatu haana. Ka e he magaaho ne iloa he tau matua haaku ke mailoga e tau puhala he tau mata ha Jairo mo e age e tau mena haana ne loto ki ai, ne fiafia e fofoga haana ti mamali lahi a ia. Ko e puhala haana a ia ke pehē, fakaaue lahi.

Ne talahau e faiaoga fakaako ke vagahau, ma e matutakiaga ke holo ki mua kua lata ia mautolu ke lagaki hake ki luga e tau lima ka fai hūhū ki a ia ke tali ē po ke nakai. Ko e lima matau ko e kakano ē, ko e lima hema ko e kakano nakai. Ti maeke a Jairo ke onoono fakatonutonu ke he lima he tali haana.

Lagatolu he tau, ne fakahoko he Tau Fakamoli a Iehova e tau toloaga mo e tau fonoaga ne taute e tau lauga Tohi Tapu ke he tau toloaga lalahi. Ne fiafia tumau a Jairo he lauga ma e tau tagata ka papatiso. Taha aho, he 16 e tau ha Jairo, ne hūhū e Matua Taane, “Jairo, manako nakai a koe ke papatiso?” Ne onoono mo e mauokafua a ia ke he lima matau ha Tete, ti kitia ai e manako haana ke taute e lakaaga ia. Ti lafi e Tete, “Kua liogi nakai a koe mo e taute e maveheaga ke he Atua ke fekafekau tukulagi ki a ia?” Ne liu foki a Jairo onoono fakatonutonu ke he lima matau ha Tete. Maaliali ai kua fitā a Jairo he tukulele e moui haana ki a Iehova.

He mole e loga he tau fakatutalaaga Tohi Tapu, ne maaliali ai kua maama e Jairo e hokulo he papatisoaga faka-Kerisiano. Ti he 2004, ne tali e ia e hūhū ne mua atu e aoga ne kua hūhū ki a ia, “Kua tukulele nakai e koe a koe ke he Atua ke taute e finagalo haana?” Ne tali e Jairo e hūhū nei he onoono hake e tau mata haana ki luga. Ko e puhala haana a ia ne fakatoka tuai ke talahau ē. Ti he 17 e tau haana, ne papatiso a ia ko e taha he Tau Fakamoli a Iehova.

He 2011, ne taha e puhala foou ma Jairo ke matutaki​—ko e komopiuta ne gahuahua he fakaaoga he tau mata. Ko e matini nei ne fakaaoga e alito mata haana ke hafagi aki e tau fakatino he komopiuta. Ko e kemo po ke onoono fakatonutonu ke he fakatino kua tuga e fakaaoga he mouse he komopiuta. Ko e tau fakatino he komopiuta kua taute pauaki ke lagomatai a Jairo ke matutaki. Ka kemo a ia ke he taha he tau fakatino ia, ko e polokalama ne fitā i loto  he matini ka hiki e tau matatohi ke he leo mai i loto he matini.

He holo ki mua e maamaaga ha Jairo ke he Tohi Tapu, ne pihia foki e manako haana ke lagomatai e falu fakaagaaga. He tau fakaako Tohi Tapu fakamagafaoa ha mautolu he tau faahi tapu takitaha, ne fa onoono tafeliuaki a ia ki a au mo e komopiuta haana. Ko e puhala anei haana ke fakamanatu ki a au kua lata au ke tohi hifo e tau tali haana ke talahau he tau magaaho fakatutalaaga hūhū mo e tali he tau feleveiaaga ha mautolu he fakapotopotoaga Kerisiano.

He tau feleveiaaga, ne kumi fakatekiteki e ia he matini haana e tau fakatino ke fakaaoga, ti maeke mogoia e leo haana i loto he matini ke logona he tau tagata oti. Ne mamali lahi a ia he tau magaaho oti ka fakamalolō e ia e tau matakainaga he fakapotopotoaga he puhala nei. Ko Alex, ko e taha he tau kapitiga fuata ha Jairo ne pehē, “Fiafia tumau au ka logona e tau tali ha Jairo hagaao ke he matakupu mai he Tohi Tapu.”

Ne fakaaoga foki e Jairo e tau mata haana ke tala age ke he falu e tau taofiaga haana. Taha puhala ne taute e ia e mena nei ko e fakaaoga e fakatino he katene ne ha hā i ai e tau manu mo e tau tagata lanu kehekehe ne nonofo he tau tutūaga mafola. Ka taute pihia e ia, ne pehē e leo haana he komopiuta, “Ko e amaamanakiaga i loto he Tohi Tapu to eke e lalolagi mo parataiso ti nakai fai gagao mo e mate, Fakakiteaga 21:4.” Ka fiafia e tagata ne fanogonogo, ti fakaaoga foki e ia e komopiuta haana ke pehē, “Manako nakai a koe ke fakaako e Tohi Tapu mo au?” Fakaofo ai, ne talia he tupuna taane ha mautolu e uiina nei. Fiafia lahi ke kitia a Jairo, ne lagomatai he taha matakainaga Fakamoli, ke fakaako fakatekiteki e Tohi Tapu mo e Tupuna ha mautolu! Nava ai he magaaho ne papatiso e Tupuna he fonoaga faahimotu i Madrid ia Aokuso 2014.

Ko e fakamooli ha Jairo ke he Atua kua mailoga foki he tau faiaoga he aoga haana. Ko Rosario, ko e taha he haana a tau faiaoga fakaako ke vagahau, ne pehē: “Ka manako au ke fakalataha atu ke he ha lotu, to eke au mo taha he Tau Fakamoli a Iehova. Ne mailoga e au ko e tua ha Jairo ati moua ai e ia e kakano mooli he moui, pete ne uka e tuaga haana.”

Fiafia tumau e tau mata ha Jairo ka totou age e au e maveheaga he Tohi Tapu: “[To] hopohopo ai e tagata kulikuli tuga ne aila, to kalaga fiafia foki e alelo he tagata kuhukuhu.” (Isaia 35:6) Pete kua loto lolelole a ia he falu magaaho, ka e laulahi ni a ia ke fiafia. Kakano ni ha kua fakavē tumau e moui haana ke he Atua mo e haana a tau kapitiga Kerisiano. Fakakite ai he haana a aga fiafia mo e tua malolō ko e fekafekau ki a Iehova kua aoga e moui pete ni he lauia ke he tau matematekelea.