Kua fa manamanatu nakai a koe ke he tau hūhū ia? Ka manamanatu, nakai ko koe ni ne pihia. Kua manamanatu foki e tau tagata he lalolagi katoa ke he tau hūhū hagaao ke he moui. Maeke nakai a koe ke moua e tau tali?

Totou miliona e tau tagata ne pehē, “E!” Ko e ha? Ha kua moua e lautolu e tau tali mooli ke he tau hūhū ha lautolu i loto he Tohi Tapu. Manako nakai a koe ke iloa e talahauaga he Tohi Tapu? Ti liga manako a koe ke aoga mai he fakaako Tohi Tapu nakai fai totogi ne foaki he Tau Fakamoli a Iehova. *

Mooli, ka hoko ke kumikumi ki loto he Tohi Tapu, pehē falu tagata: “Lavelave lahi au.” “Uka lahi ke maama.” “Fakauaua ke talia.” Ka e kehe e onoonoaga he falu. Fiafia a lautolu ke fai magaaho ke fakaako e tau mena i loto he Tohi Tapu. Manamanatu ke he falu a fakataiaga:

• “Ne fano au ke he tau lotu Katolika mo e Porotesano, ko e faituga Sikh, mo e fale tapu Puta, mo e fakaako e au ke he tau aga fakalotu he univesiti. Ka e loga e tau hūhū fakaagaaga haaku ne nakai moua ha tali. Ti taha he Tau Fakamooli a Iehova ne ahiahi mai ke he kaina haaku. Ha kua fiafia au ke he tau tali haana mai he Tohi Tapu, ti talia e au ke fakaako e Tohi Tapu.”​—Gill, Igilani.

• “Ne loga e tau hūhū haaku hagaao ke he moui, ka e nakai makona au he tau tali he akoako he lotu haaku. Pete ia, taha he Tau Fakamoli a Iehova ne tali e tau hūhū haaku he fakaaoga ni e Tohi Tapu. Magaaho ne hūhū mai a ia ki a au ko e manako nakai au ke fakaako fakalahi atu, ne talia fiafia e au.”​—Koffi, Benin.

• “Ne fia iloa au he tuaga he tau tagata mamate. Talitonu au na maeke a lautolu ne mamate ke ekefakakelea a lautolu kua momoui, ka e manako au ke iloa e talahauaga he Tohi Tapu. Ko e kapitiga haaku ko e Fakamoli a ia ti kamata au ke fakaako e Tohi Tapu mo ia.”​—José, Parasili.

• “Ne lali au ke totou e Tohi Tapu ka e nakai maama ai. Ti ahiahi mai e Tau Fakamoli a Iehova mo e fakamaama fakamitaki e falu perofetaaga he Tohi Tapu ki a au. Fia loto au ke kitia ko e heigoa foki haaku ka fakaako.”​—Dennize, Mesikō.

• “Ne manamanatu au na leveki mooli nakai he Atua au. Ti fifili au ke liogi ke he Atua he Tohi Tapu. He aho hake ko e Tau Fakamoli ne nokonoko e gutuhala haaku, ti talia e au ke fakaako Tohi Tapu.”​—Anju, Nepal.

Ko e tau mena nei ne fakamanatu ki a tautolu e tau kupu ha Iesu: “Uhoaki a lautolu ne fia kai mo e fia inu ke he mahani tututonu; ha ko e mena to makona a lautolu.” (Mataio 5:6) E, ha hā he tau tagata e manako ke he tau mena fakaagaaga. Ko e Atua hokoia kua maeke ke fakamakona e manako ia, ti taute puhala he haana Kupu, ko e Tohi Tapu.

Ti, ko e heigoa kua putoia he fakaako Tohi Tapu? Aoga fēfē ai ki a koe? To tali e tau hūhū nei ke he vala tala ka mui mai.