Jehová okitemakak ikonetsin, Jesús niman ijkon techmakixtis itech tlajtlakojli niman mikilistli. Biblia kijtoua ika Jesús otlatlaxtlauj ika iyesyo (Efesios 1:7; 1 Pedro 1:18, 19). Ika yejon, Jesús okijto: “Niktemakas nonemilis para nikmakixtis miyek tlakatl” (Mateo 20:28).

Tleka nonekiya se tlaxtlauijli

 Kachtopa tlakatl akin toTajtsin okichijchiuj, Adán, xkipiaya tlajtlakojli. Noijki, ueliskia nemiskia para nochipa, san ika, nochi okipolo pampa xokinek kitlakamatis toTajtsin (Génesis 3:17-19). Adán okinpanoltili tlajtlakojli nochimej ikoneuan (Romanos 5:12). Ika yejon, Biblia kijtoua ika Adán san no yejua onotemakak niman okichiuj ika ikoneuan manochiuakan ken tlakeualtin itech mikilistli niman tlajtlakojli (Romanos 7:14). Xakaj ueliskia kikuepas tlen okipolo Adán pampa tinochimej titlajtlakolejkej (Salmo 49:7, 8).

 ToTajtsin okimikneli ikoneuan Adán pampa xkimatiyaj tlenon kichiuaskej (Juan 3:16). ToTajtsin yolmelauak, ika yejon, xueliskia san ijkon kintlapopoluiliskia intlajtlakoluan (Salmo 89:14; Romanos 3:23-26). Pampa melak techtlasojtla, okitemakak iKonetsin, xsan para kintlapopoluis totlajtlakoluan noijki para kinpopolos (Romanos 5:6-8). Yejon tlen nonekiya: se tlaxtlauijli.

¿Tlenon kijtosneki tlaxtlauijli?

 Ipan Biblia, tlajtojli tlaxtlauijli techasikamachiltia yejuin yeyi tlemach:

1.   Kech tiktlaxtlauas (Números 3: 46, 47).

2.   Niman ijkon, yakaj kimakauaj noso oksejpa tikpiyas tlen otikpolojka (Éxodo 21:30).

3.   Tlen ika titlatlaxtlauas noneki kuajli kajxilis tlen tiktlaxtlauas (Éxodo 21:30). a

 Matikitakan kenon onochiujkej yejuin yeyi tlemach ijkuak Jesús onotemakak topampa.

1.   Kech notlaxtlaua. Biblia kijtoua ika toTajtsin ononek “sanoyej patioj” kitlaxtlauas niman ijkon techkouas (1 Corintios 6:20; 7:23). Ika iyesyo Jesús, toTajtsin okinkouj “tlakamej de nochimej razas, nochi kech seseknekamej tlajtoltin, nochi kalpanmej niman nochi países” (Apocalipsis 5:8, 9).

2.   Temakixtilistli. Pampa Jesús onotemakak topampa, ouel otechmakixti itech tlajtlakojli (1 Corintios 1:30; Colosenses 1:14; Hebreos 9:15).

3.   Tlen ika titlatlaxtlauas noneki kuajli kajxilis. Inemilis Jesús tlen okitemakak san noijki katka ken inemilis Adán tlen xkipiaya tlajtlakojli (1 Corintios 15:21, 22, 45, 46). Biblia kijtoua: “Ijkon ken miyekej onokuepkej tlajtlakolejkej san ipampa se tlakatl [Adán] xokitlakamat Dios, no ijki Dios miyekej kinselis ken yolmelajkej pampa se tlakatl [Jesús] okitlakamat Dios” (Romanos 5:19). Yejuin kuajli techasikamachiltia tleka imikilis se tlakatl ouel okinmakixti miyekej tlajtlakolejkej. Ika yejon, ika imikilis, Jesús “okimakixtij nochi tlakatl” akin kitlakamatij (1 Timoteo 2:5, 6).