¿Kenijki techmakixtia Jesús?
Tlen Biblia kijtoua
Jesús okitemakak inemilis para kinmakixtis nochimej akin itech melajkanemij (Mateo 20:28). Ika yejon, Biblia kijtoua ika Jesús “okinmakixtiko in tlaltikpaktlakamej” (1 Juan 4:14). Niman noijki kijtoua ika “xakaj okse ueli temakixtia, pampa Dios xokuajtitlan yakaj okse tlakatl ipan in tlaltikpaktli yejuan itechkopa uelis timakisaskej” (Hechos 4:12).
Jesús omik inpampa nochimej akin itech tlaneltokaj (Hebreos 2:9; Juan 3:16). Sakin, “Dios okiyolitij niman okuiteu ipan itlalkon”, niman Jesús onokuep ne iluikak ken se espíritu (Hechos 3:15). Niman desde ne iluikak, Jesús “ueli kinmakixtia para nochipa on yejuan itechkopa kinisiuiyaj Dios, pampa yejua nochipa nemi para impampa kitlajtlanilijtikaj Dios ma kimpaleui” (Hebreos 7:25).
¿Tleka noneki ika Jesús topampa matlajto?
Tinochimej titlajtlakolejkej (Romanos 3:23). Niman pampa titlajtlakolejkej, timikij niman xmás kuajli touikaj iuan toTajtsin (Romanos 6:23). San ika, Jesús yeskia ken se tepantlajtojketl akin tlajtoua inpampa akin itech tlaneltokaj (1 Juan 2:1). Pampa Jesús omik topampa, yejua uelis topantlajtos, niman ijkon toTajtsin uelis kinkakis toteoyouan niman uelis techtlapopoluis (Mateo 1:21; Romanos 8:34). Jehová kinankilia tlen kitlajtlanilia Jesús pampa yejua kitlajtlani tlen toTajtsin kuelita. Jehová okuajtitlan Jesús para “kinmakixtis on tlaltikpaktlakamej” (Juan 3:17).
¿San noneki titlaneltokaskej itech Jesús para timakisaskej?
Ka. Maski kema noneki titlaneltokaskej itech Jesús niman ijkon timakisaskej, noijki noneki okse itlaj tikchiuaskej (Hechos 16:30, 31). Biblia kijtoua ika se tlalnakayotl ijkuak xkipiya iespíritu, miktok, “no ijki miktikaj itlaneltok sen tlakatl tla xkichiua tlajtlamach tlen kuajli” (Santiago 2:26). Para timakisaskej noneki:
Tikixmatiskej Jesús niman iTaj, Jehová (Juan 17:3).
Intech titlaneltokaskej (Juan 12:44; 14:1).
Tikteititiskej ika intech titlaneltokaj tla tikintlakamatij intlanauatiluan (Lucas 6:46; 1 Juan 2:17). Jesús okijto ika xnochimej akin kijliskej “NoTEKO” makisaskej, yej, san akin kichiuaj tlen kineki iTajtsin iluikakchane (Mateo 7:21).
Nochipa matikteititikan ika titlaneltokaj maski san tlemach matikixnamikikan. Jesús okijto: “On yejuan noyolchikauas niman xkaman nokuepas hasta ijkuak nochi tlamis, on yejua makisas” (Mateo 24:13).