Kachtopa 60 minutos itech inemilis se konetsintli melak ueyi kijtosneki. ¿Tleka? Pampa ijkuakon, kenon nantli nouikas iuan ikonetsin, kipaleuis kuajli manoskalti niman machikaujtiuj. *

¿Tlenon kichiua ika se nantli makitlajpiya ika tlasojtlalistli ikonetsin akin kemach otlakat? Ipan The Journal of Perinatal Education, se tlamachtijketl itoka Jeannette Crenshaw kijtoua ika, sakin ika yotlakat se konetsintli, miyekiya se hormona tlen itoka oxitocina, yejuin “kichiua ika nantli makitlasojtla ikonetsin ijkuak kita, kinapaloua niman kichichitia”. Ijkuak ijkon panotika, itlakayo nantli noijki peua kipiya okse hormona tlen “kipaleuiya makititi itlasojtlalis ikonetsin” niman kichiua machikaui ken nouikaj. ¿Tleka melak ueyi kijtosneki yejuin?

Tlasojtlalistli tlen kimachilia se nantli iuan ikonetsin okichijchiuj toTlachijchiujkauj akin techtlasojtla, Jehová. * Tekiuaj David okitlasojkamachili toTajtsin pampa okichiuj matlakati niman pampa okichiuj ika kuajli manomachili ijkuak inan okinapalo. Yejua okijto ipan iteoyouj: “Tejua otinechtlajpix ijkuak xiniuajtlakatiya; ijkuak ijtik nonan ninemiya, tejua itinoTajtsin katka” (Salmo 22:9, 10).

XNEMILI YEJUIN: Tla toTajtsin okichijchiuj itlaj tlen melak ouijtika tlen kipaleuiya nantli ika kuajli makitlajpiya niman makimaka tlen kipoloua ikonetsin, ¿xtiknemilia ika toTajtsin noijki najmana topampa, akin “tiikoneuan”? (Hechos 17:29).

Jesucristo, akin kuajli kixmati toTlachijchiujkauj xijkon ken oksekimej, okijto: “¿Tlen xsan se tomin valerouaj omemej tototsitsintin? Pero nion semej yejuamej on tototsitsintin ueli uetsi tla on toTajtsin xkauilia. Tej, hasta on tsontli ipan nemotsontekon nochi onkaj tlapouajli cada sesentetl. Yejua ika, tej, ma ka xmomojtikan. Nemejuamej más nenueyikijtosnekij xken miyekej tototsitsintin” (Mateo 10:29-31).

Xmiyekej tlanemiliaj ipan nochi tototsitsintin tlen kimitaj, nion ijkuak se uajuetsi ipan tlajli. San ika, toTajtsin iluikakchane tlanemilia intech inseselti. Niman totomej, maski melak miyekej yeskej, xkeman sajnoye ueyi kijtosnekiskej ken tlaltikpakchanejkej. Kuakon, kuajli nesi ika toTajtsin kita tlen mopan nochiua. Niman xsan yejon, yejua melak najmana mopampa.

 Biblia kuajli techijlia:

• “Ixtololojuan Jehová tlachixtokej ipan nochi tlaltikpaktli niman ijkon kiteititis ikojtilis inpampa akin ika nochi inyojlo kineltokaj” (2 CRÓNICAS 16:9).

• “Ixtololojuan Jehová kimitstokej akin melajkej, niman inakasuan kikakij ijkuak kitlajtlaniliaj makinpaleui” (SALMO 34:15).

• “Melak niyolpakis itech motlasojtlalis tlen xtekaua, pampa yotikitak noajman; tejua kuajli tikmati tlenon nechyolkokoua” (SALMO 31:7).

¿Itlaj ika techpaleuiya ipan tonemilis tla tikmatij ika toTajtsin najmana topampa niman techtlajpiya ika tlasojtlalistli? Kema. Hannah, * akin chanti Inglaterra, kijtoua:

“Melak miyekpa oniknemili ika toTajtsin xnechtlasojtlaya niman ika xkinnankiliaya noteoyouan pampa nechpolouaya itech nitlaneltokas. Niknemiliaya ika nechtlajyouiltijtoya noso xnechkakisnekiya pampa xtlaj ika nitepaleui. Nikmachiliaya ika xnajmanaya nopampa”.

San ika, aman Hannah kuajli kimatstok ika Jehová kitlasojtla niman najmana ipampa. ¿Tlenon okipaleui makipatla ken tlanemiliaya? Yejua kijtoua: “Yejuin xnimantsin onikpatlak. Yeuejkaui onijkak se tlamachtijli itech Biblia tlen tlajtouaya itech kenon onotemakak Cristo, yejuin oajsik ipan noyojlo niman onechpaleui manikita ika Jehová nechtlasojtla. Niman, ijkuak nikitaya ika toTajtsin kinnankiliaya noteoyouan, miyekpa peuaya nichokaya pampa nikitaya ika kema nechtlasojtlaya. Noijki, pampa ninomachtia Biblia niman niauj tlanechikoltin, yonechpaleui kuajli manikixmati Jehová niman kuajli manikmati tlen kimachilia topampa. Aman nikmati ika Jehová techtlasojtla, techpaleuiya niman ika kineki techtlajpiyas toseselti”.

Tlen Hannah kijtoua melak teyolchikaua. San ika, ¿kenon uelis tikmatis tla toTajtsin kajmana tlen tikmachilia niman ika mitsasikamati? Ipan okse tlamachtijli nonankilia yejuin.