LUCÍA KOXOUETSTINEMI. Ijkuak pitentsin katka okajsik se kokolistli itoka poliomielitis, yejuin kokolistli melak temaua niman kijtlakoua totlalnakayo. Ijkuak yejua kipiaya 16 xiuitl, akin itech tekitiya okijli: “ToTajtsin mitstlajyouiltia ika yejon kokolistli pampa xotitetlakamat niman xotiktlakaitak monan”. Maski yopanokej miyek xiujtin, Lucía ok kilnamiki kenon okiyolkokojkej yejuin tlajtoltin.

IJKUAK DÁMARIS OKIMAT IKA KIPIAYA CÁNCER IPAN ITSONTEKON, itaj okijli: “Itlaj tlen melak xkuajli otikchiuj, yejua ika toTajtsin mitstlajyouiltijtika”. Yejuin tlajtoltin melak okiyolkokojkej Dámaris.

Melak youejkauj uajnoneltokatiuj ika toTajtsin tetlajyouiltia ika kokolistin. Amoxtli Usos y costumbres de las tierras bíblicas kijtoua ika, ipan itonaluan Jesús, noneltokaya ika “kokolistin ualeuaj ipampa itlajtlakol tlen okichiuj akin kualo noso ipampa intlajtlakol akin imiuan nouika, niman ipampa yejon kitlajyouiltijtoyaj”. Niman amoxtli Medieval Medicine and the Plague (La medicina medieval y la peste) kijtoua ika miyek xiujtin sakin ika onen Cristo, “sekimej kineltokayaj ika itechkopa kokolistin tlen nosemoyauaj, toTajtsin kintlajyouiltiaya tlaltikpakchanejkej ipampa intlajtlakoluan”. San ika, ¿toTajtsin otetlajyouiltij ika yejon kokolistli tlen melak miyekej okinmikti ipan Europa itech siglo 14? ¿Noso ijkon opanok pampa yejon kokolistli melak temauaya, ijkon ken ciencia sakin okiteititi? Kanaj tejua timotlajtoltia tla toTajtsin kintekitiltia kokolistin niman ijkon kintlajyouiltia tlaltikpakchanejkej ipampa intlajtlakoluan. *

XNEMILI YEJUIN: Tla toTajtsin kintekitiltiaya kokolistin niman tlajyouilistli niman ijkon kintlajyouiltis akin kinmelauaya, ¿kuakon, tleka Jesús okinpajti akin kualouayaj? Tla ijkon kichiuaskia, ¿xkixnamiktoskia imelajkayo toTajtsin? (Mateo 4:23, 24). Jesús xkeman kixnamikiskia toTajtsin. Yejua okijto: “Nochipa nikchiua tlen yejua kuelita” niman “nikchiuas on tlen noTajtsin onechnauatij” (Juan 8:29; 14:31).

Biblia kuajli kijtoua ika Jehová nochipa “kichiua tlen melaktik niman tlen kinamiki” (Deuteronomio 32:4). Se neskayotl, toTajtsin xkeman kichiuaskia ika mamikikan miyekej akin kuajli inyojlo ipan se avión, san pampa kineki kitlajyouiltis se akin ompa yauj. Abrahán, se itekipanojkauj toTajtsin akin yolmelaujki, kuajli kimatiya ika toTajtsin akin Ueyixtika xkeman ijkon kichiuaskia. Ika yejon, okijto ika maka keman matiknemilikan ika toTajtsin kichiua mamikikan akin kuakualtin ipampa akin xkuakualtin (Génesis 18:23, 25). Noijki, Biblia kijtoua ika “toTajtsin xkichiua tlen xkuajli” noso “xtetlajyouiltia” (Job 34:10-12).

Ijkuak titlajyouiyaj, xpampa toTajtsin techtlajyouiltia ipampa itlaj tlen xkuajli otikchiujkej. Jesús kuajli otemachti yejuin ijkuak yejua iuan inomachtijkauan okinextijkej se tlakatl akin xtlachiaya. “Niman on inomachtijkauan okitlajtoltijkej: ‘Temachtijketl, ¿tlika otlakat ciego in tlakatl? ¿Tlen manin pampa otlajtlakojkej itajuan, noso sa no yejua otlajtlakoj’. Jesús okimijlij: ‘Otlakat ciego xpampa tla yejua otlajtlakoj, noso itajuan otlajtlakojkej. Yej ijkon otlakat para itech nopantlantis on tlen Dios ueli kichiua’” (Juan 9:1-3).

Pampa ijkuakon noneltokaya tlen xmelauak, inomachtijkauan Jesús kanaj okinmojkatlachialti ijkuak okimijli ika nion yejua nion itajuan xkipiayaj tlajtlakojli niman ijkon yejua matlajyoui. Ijkuak Jesús okichiuj ika matlachia yejon tlakatl, yejua xsan  okipajti, okiteititi ika xmelauak tlen kineltokayaj (Juan 9:6, 7). Akin kipiyaj ueyi kokolistin melak kinyolseuiya ijkuak kasikamatij ika xtoTajtsin akin kichiujtok ika matlajyouikan.

Biblia kuajli techijlia:

• “Yejua in melauak pampa Dios xkeman kiselia tetlatlatalistli para ma tlajtlako, nion yejua kitlatlata yakaj para ma tlajtlako” (SANTIAGO 1:13). Niman xsan yejon, sa achijtsin poliui ijkuak toTajtsin kipopolos nochi tlajtlamach tlen xkuajli tlen yeuejkaui techuajtlajyouiltijtiuj, kijtosneki noijki kipopolos kokolistli, tekokojkayotl niman mikilistli.

• Jesucristo “okimpajtij nochimej on kokoxkej” (MATEO 8:16). Ijkuak otepajti Jesús, okiteititi tlenon kichiuas iTekiuajyo toTajtsin ipan nochi tlaltikpaktli.

• “Dios kimpopolouilis nochi ajmantli, niman xok onyas mikilistli, nion chokistli, nion ajmantli, nion kokolistli, pampa nochi tlen achtoj onkatka yopanok” (APOCALIPSIS [REVELACIÓN] 21:4).

Kuakon, ¿tleka onka miyek tekokojkayotl niman tlajyouilistli ipan tlaltikpaktli? Tla xtoTajtsin kichiujtok, ¿akinon techtlajyouiltijtikaj? Melak yeuejkaui ika, tlaltikpakchanejkej, kinekij kimatiskej kenon nonankiliaj yejuin tlajtoltilistin. Ipan okse tlamachtijli tiknextis kenon nonankiliaj.