TLAJTOLTILISTLI 1
¿Akinon melauak nejua?
¿TLENON TIKCHIUASKIA?
Xtlanemili itech yejuin: Karen kemach kipiya diez minutos ika yoajsik ipan iluitl, sakin kikaki yakaj akin kixmati kinotsa ikuitlapan:
“¿Tlenon tikchiujtika nikan san moselti?”
Ijkuak ontlachia ikuitlapan, kita ika Rebeca akin iuan nouika kuajkui ome cerveza. Kitekiuiltia se niman kijlia: “Xok tisiuakonetl. Uelis timoyolpaktis maski san achijtsin, ¿noso ka?”.
Karen xkineki kiselis pampa ok pitentsin, san ika, kuajli nouika iuan Rebeca niman xkineki makinemili ika yejua xkeman noyolpaktia. Niman noijki, Rebeca se kuajli ichpochtli. Kuakon, tla yejua koni, xsajnoye temojti yes. “San se cerveza, kinemilia, xken tijkuis drogas”.
Tla tiKaren yeskia, ¿tlenon tikchiuaskia?
XMOTELTI NIMAN XTLANEMILI
Tla tikneki kuajli tiktlapejpenis tlen tikchiuas ijkuak ijkon mopan panos, noneki kuajli tikmatstos akinon tejua. Yejuin kijtosneki ika se kuajli kimatstika akinon niman tlenon kineltoka. Tikmatstos yejuin mitspaleuis niman mitsmakas chikaualistli ika tejua xyekana monemilis niman maka oksekimej (1 Corintios 9:26, 27, TNM).
¿Kenon uelis tikpiyas yejon chikaualistli? Tla peua tikinnankilia yejuin tlajtoltilistin.
1 ¿TLENON KUAJLI NIKCHIUA?
Tla tikmatstika tlenon kuajli tikchiua niman tlen kualneskayomej tikinpiya, kuajli titlaneltokas itech tlen tikchiua.
NESKAYOTL ITECH BIBLIA. Pablo, itlatitlankauj Cristo, okijkuilo: “Maski xmás ueli nitenojnotsa, nikpia tlaixmachilistli ika Dios” (2 Corintios 11:6). Pampa kuajli kixmatstoya tlen kijtouaya tlajkuiloltin, xokijtlakoj ijkuak okitejteneujkej. Xokikauili ika ken xkuajli otlajtokej itech, makichiua maka sa matlaneltoka itech (2 Corintios 10:10; 11:5).
XKITA TLEN TIUELI: Xkijkuilo yeyi tlemach tlen tikuelitaskia tikchiuas ipan yeuin xiuitl.
Aman xkijkuilo se kualneskayotl tlen melak kuajli tikteititia (tla titetlasojtla, tiktemaka tlen tikpiya, motech tlaneltokaj noso nimantsin tajsi kampa mitsnotsaj).
2 ¿TLENON NECHTEKIYOMAKA?
Ijkon ken se mekatl tlen kotoni kampa yopitsauj, tejua uelis nimantsin tikilkauas akinon tejua tla timokauilia mamitstlani yejon tlen mitstekiyomaka.
NESKAYOTL ITECH BIBLIA. Pablo kimatstoya tlen kitekiyomakaya. Ika yejon okijkuilo: “Ipan noyojlo nikuelita itlanauatil Dios. Pero ipan notlalnakayo nikmati ika onkaj yejua in okse tlanauatijli yejuan no kineki nechnauatis. Yejua in tlanauatijli de tlajtlakojli kitlauelixnamiki on itlanauatil Dios yejuan noyojlo kuelita. Yejua in tlanauatijli de tlajtlakojli yejuan onkaj ipan notlalnakayo, nechpia ken nitsakutikaj” (Romanos 7:22, 23).
XKITA TLEN TIUELI: Itech tlen mitstekiyomaka, ¿tlenon noneki tikyektlalis?
3 ¿TLENON NIKNEKI NIKCHIUAS?
¿Titlejkoskia ipan se taxi niman tikijliskia akin kuika ika san mamitstlamamalakacholtiti niman noteltis ijkuak tlamis igasolina? Ijkon tikchiuas tla xok kuajli titlanemilia, pampa san tikpopolos motomin.
¿Tlenon tiuelij? Tla tikneki tikchiuas itlaj ipan monemilis, xsan titlamamalakachojtos. Tikmatstos kanon tiauj niman kenon tajsis.
NESKAYOTL ITECH BIBLIA. Pablo okijkuilo: “Ken ninotlalojtok nikmatstika kanon niauj” (1 Corintios 9:26, TNM). Yejua kimatstoya kanon yaya, kuajli kimatstoya tlenon kinekiya kichiuas niman onochikauj ipan inemilis ijkon kichiuas (Filipenses 3:12-14).
XKITA TLEN TIUELI: Aman, xkijkuilo yeyi tlemach tlen tikuelitaskia tikchiuas ipan yejuin xiuitl.
4 ¿ITECH TLENON NITLANELTOKA?
Tla kuajli tikmatstika akinon tejua, timochiuas kentla se kojtli tlen uejkatlan notlaluayotia niman ijkon kixikoua ajakakiyaujtin.
Tla xkuajli tikmati itech tlen titlaneltoka, xtikmatis tlen tikchiuas. Nochipa timopatlas niman tikchiuas ken akin imiuan timouika, ijkon ken se camaleón akin nopatla ken tlachia ijkon ken kampa nemi. Akin ijkon kichiua xkimati akinon yejua.
San ika, tla tejua tikchiua ijkon ken tikneltoka, maski san tlenon makijtokan oksekimej, xtikilkauas akinon tejua.
NESKAYOTL ITECH BIBLIA. Kanaj Daniel san telpochtli katka ijkuak okixelojkej itech ichanejkauan. Maski ijkon, yejua “ipan iyojlo okijto” kitlakamatis itlanauatiluan toTajtsin (Daniel 1:8). Xokinek kilkauas akinon yejua niman oyolmelaujkanen itech tlen kineltokaya.
XKITA TLEN TIUELI: ¿Itech tlenon titlaneltoka? Se neskayotl: ¿Titlaneltoka itech toTajtsin? ¿Tleka? ¿Tlenon mitstlaneltokiltia ika toTajtsin nemi?
¿Tiknemilia ika itlanauatiluan toTajtsin itech auilnemilistli mitspaleuiyaj? ¿Tleka?
Kuakon ¿tlenon tikuelitaskia tiyes: se ixiujyo kojtli tlen kuika ejekatl noso se kojtli tlen kixikoua ajakakiyaujtin? Tla tejua tikneki timochiuas ken se kojtli, xmokojtili niman ijkon xtikilkauas akinon tejua. Yejuin mitspaleuis xnankili yejuin tlajtoltilistli: ¿Akinon yemelak nejua?
Puede que también le interese
LO QUE OPINAN OTROS JÓVENES
¿Kuajli ninoixmatstok?
Tla kema timoixmati, mitspaleuis xtlaxico ijkuak tikixnamikis itlaj tlen ouijtika.
