Ngoi yakere uzu ti Yezo kpingɔ ko, lo pandó ya: “Apa gbanda nzɔ̃ pa ti Lo-lengɔ Gbia tɛ Nzapa na lɛ sese zu ya, azi zu amá tɛnɛ ni uzu, wa di la [nda lo akɔ, NW].” (Matie 24:14) Kanda alengbi ti lingɔ kwa ni ko ge lɛ sese zu ngasia? Na landangɔ lɛlo mɛ ndó Yezo zia ngoi mɛ ndó lo ge tise.​—Luka 8:1.

E ndo li kpengba ni ti tengbingɔ na azi ka ya da tɛ la. Yezo handó na ava lo fangɔ tɛnɛ ya da na ya da. (Matie 10:11-13; Awa Pangɔ Kwa 5:42; 20:20) A ndo hɛ̃ndó awa fangɔ tɛnɛ ti uzu ndo mɛ zo na zo fa tɛnɛ da. (Matie 10:5, 6; 2 Kɔrinto 10:13) Kwɛ́ kɔi ndɛ na ngoi tɛ e, alɛkɛ kwa tɛ e ti fangɔ tɛnɛ nzɔ̃ni, ando hɛ bombi kɔi kɔi ndo ti fangɔ na tɛnɛ. Ni la a hɛ e lége ti tɔndɔngɔ nyɔ̃ mɛ ndó Yezo hɛ ya “epa tɛnɛ tɛ ni hɛ azi.”​—Awa Pangɔ Kwa 10:42.

E ndo li kpengba ni ti tengbingɔ na azi ndo zu mɛ elengbi ti lwangɔ la. Yezo ziandó nzɔ̃ lɛlo na hangɔ azi na tɛnɛ tɛ Nzapa ka gbɛlɛ azi zu, ka tɛrɛ tɛ, nga na ndo mɛ azi zu ndo tɔ̃ na ngu. (Marko 4:1; Yoanɛ 4:5-15) E ndo tɛnɛ nga tɛnɛ na azi na ndo Ngbangɔ ndo zu​—ka lége, ka lɛ ngere (ka pa), ka lɛ yaka, bere na telefɔnɛ. E ndo tɛnɛ nga tɛnɛ na awa mbage lɛ e, na akwa e ti kwa, ti kalasi nga na asongo e na ngoi mɛ alengbi. Ase kɔdɛ ko zu ndo zi lége ya a miliɔ tɛ azi amá “nzɔ̃ pa ti songɔ kwa.”​—Nzembo 96:2.

Mɔ na zo mɛ mɔ lengbi ti pangɔ hɛ lo nzɔ̃ pa ti Lo-lengɔ Gbia tɛ Nzapa nga na anzɔ̃ lo mɛ ni na gangɔ na ni? Ta mɔ bata nzɔ̃ pa olo na ndombali mɔ kɔi ma. Banda pangɔ hɛ la nzɔ̃ pa ni na olo se alengbi!

• “Nzɔ̃ pa” mɛ elengbi ti pangɔ nɛ?

• Atɛmwɛ tɛ Yehova ndo manda kɔdɛ tɛ Yezo ti fangɔ tɛnɛ ngasia?