Azi gba ta adɛ na gwɛ̃ sambela ma na lo mɛ ya ta ala ndo lwa agbinya na ndo alo mɛ ndo sɔ bɛ la ma. A bɛ se bo so ko, ale mɔ gwe bombi tɛ Atɛmwɛ tɛ Yehova lo nɛ? Ye mɛ mɔ na lwangɔ kai nɛ?

Mɔ na dungɔ na dengɔ bɛ ti dungɔ ka popo tɛrɛ azi mɛ na songo mɛ ndo da nga bɛ la na afɔ̃ la. Na siɛklɛ ti kɔi ti ngoi tɛ e, alɛkɛndó bombi tɛ awa Kristo, ti vɔrɔngɔ Nzapa ndoni kɔi, mandangɔ Ngbangɔ ndoni kɔi, nga ti sangbingɔ nguru bɛ kɔi na kɔi. (Aebreo 10:24, 25) Ka ya abombi ni ko ti songo, ala ndo mándó ya ani ka popo tɛrɛ abɛta akwa–ayata kɔli nga na awe mɛ kpengbani ka ya nyingɔ. (2 Tɛsalonikɛ 1:3; 3 Yoanɛ 14) Endo utɛ nzɔ̃ lɛlo tɛ awa Kristo ti siɛklɛ ti kɔi la e ndo lwa nga dengɔ bɛ ma se tɛ la.

Mɔ na lwangɔ mbana gɛrɛ ti mandangɔ se ti kpãngɔ andia ti Ngbangɔ na kwa. Kwɛ́ kɔi na ngoi ti uzu, akɔli, awe, nga na ayangambi zu ndo bombi ndɛ tɛrɛ la ndoni kɔi. Akɔli mɛ ahĩnga tɔndɔngɔ nda Ngbangɔ na seni ndo za e ya e hĩnga seti kpãngɔ andia ti ya Ngbangɔ na kwa ka ya du tɛ e ti lá kwɛ́. (Mibeko 31:12; Nehemia 8:8) Zo zu lengbi ti yengɔ bia, gbinyangɔ tɛnɛ se azi lége; ti fangɔ yango ye mɛ awa Kristo ndo kpã be la da.​—Aebreo 10:23.

Mɔ lengbi ti lwangɔ nzɔ̃ suru na lo mɛ ya loyengɔ tɛ mɔ akpengba. Apɔstrɔ Polo pandó hɛ mbɛni bombi ti ngoi tɛ lo ya: “Mbi ndo sepala sĩ ya mbi ga mbi ba ĩ, . . . wadila e sangbi nguru bɛ e, ĩ sa nguru bɛ mbi na lo ti loyengɔ tɛ ĩ, ko mbi sa nga nguru bɛ ĩ na lo ti loyengɔ tɛ mbi.” (Roma 1:11, 12) Bombingɔ tɛrɛ lá kwɛ́ na afɔ̃ e awa Kristo ndo kpengba na loyengɔ tɛ e nga na hɛ̃ngɔ nyɔ̃ tɛ e ti tɔndɔngɔ andia ti Ngbangɔ.

Mɔ lengbi ti gangɔ bombi tɛ e ti gesi wa mɔ lwa ambana gɛrɛ ko kwɛ́ mɔ nvɛ̃ni nga? E na yambangɔ mɔ nzɔ̃ni nvɛ̃ni. Abombi ni zu ndo du gɛgɛrɛ​—Ta ndo ɔ na ye ti lɔngɔ na faranga ma.

• Abombi tɛ e ndo landa lɛlo tɛ ana?

• E lwa mbana gɛrɛ ti abombi ni ko tɛ awa Kristo ngasia?