Ombiimbeli otayi ti shike kombinga yomukadhona Maria?
Shoka Ombiimbeli tayi ti
Ombiimbeli otayi ti kutya Maria, yina yaJesus, okwa li a pewa uuthembahenda wokuvala Jesus, manga a li natango omukadhona. Oshikumithalonga shika osha adhika nale sha hunganekwa membo lyaJesaja nokugwanithwa kwasho okwa nyolwa mEvaangeli lyaMateus naLukas.
Jesaja okwa li a hunganeke kombinga yokuvalwa kwaJesus a ti: “Omukadhona ta ningi omusimba nota vala omumati.” (Jesaja 7:14) Kewiliko lyaKalunga, omunyoli gwEvaangeli lyaMateus okwa li a nyola kombinga yaashoka Jesaja a li a hunganeka shi na ko nasha naMaria ta vala Jesus. Konima yokunyola kutya Maria okwa ningi omusimba pashikumithalonga, Mateus okwa gwedha ko a ti: “Shika ashihe osha ningwa, opo adhihe dhi gwanithwe ndhoka Omuwa e dhi lombwele omuhunganeki, sho ta ti: ‘Omukadhona * ota ningi omusimba nota vala okanona okamati, nedhina lyako otali lukwa Immanuel;’ otali ti: Kalunga oku li pamwe natse.’” — Mateus 1:22, 23.
Omunyoli gwEvaangeli lyaLukas okwa li wo a nyola kombinga yaMaria, sho a ningi etegelelo pashikumithalonga. Okwa li a nyola kutya. Kalunga okwa tumu omuyengeli Gabriel “komukadhona a yalekwa komulumentu, edhina lye Josef, gwomezimo lyaDavid. Edhina lyomukadhona oMaria.” (Lukas 1:26, 27) Maria okwa li e shi koleke kutya ye omukadhona natango. Sho u uvu kutya ota ka ninga yina yaJesus, ano Mesiasa, okwa pula a ti: “Otashi ka vulika ngiini, oshoka ngame omukadhona natango?” — Lukas 1:34.
Omukiintu omukadhona natango ota vulu ngiini okumona okanona?
Maria okwa ningi etegelelo kekwatho lyombepo ondjapuki, ndjoka yi li oonkondo ndhoka Kalunga ha longitha. (Mateus 1:18) Maria okwa li a lombwelwa taku ti: “Ombepo Ondjapuki otayi ku lambele, noonkondo dhaKalunga gwokombandambanda otadhi ku siikile. Onkee ano omunona nguka ota ka lukwa Omuna gwaKalunga.” * (Lukas 1:35) Kalunga okwa li a lundululile omwenyo gwaJesus pashikumithalonga moshivalelo shaMaria. Kungawo, Maria okwa ningi etegelelo.
Omolwashike Kalunga u unganeke, opo Jesus a valwe komukadhona?
Omolwaashoka osha li tashi ka ningitha tashi wapa, opo Jesus a valwe nolutu lwa gwanenena, ano inaalu thigulula uulunde. Kungawo, okwa li a vulu okuhupitha aantu muulunde nomeso. (Johannes 3:16; Aahebeli 10:5) Manga Jesus e li moshivalelo shaMaria, ombepo ondjapuki yaKalunga oya li ye mu gamene, opo kaa thigulule uulunde kuMaria. — Lukas 1:35.
Kungawo, sho Jesus a valwa ka li e na uulunde. Okwa li a fa Adam manga Adam inaa yona. Ombiimbeli otayi popi Jesus tayi ti: “Oye ina yona nando.” (1 Petrus 2:22) Molwaashoka Jesus ka li a thigulula uulunde, okwa li a vulu okugandja ekuliloyambo, opo a kulile mo aantu muulunde nomeso. — 1 Aakorinto 15:21, 22; 1 Timoteus 2:5, 6.
Mbela Maria okwa kala aluhe omukadhona?
Ombiimbeli onayi popya nando kutya Maria okwa kala omukadhona sigo aluhe. Pehala lyaashono, oyu ulika kutya Maria okwa ka mona aanona yalwe. — Mateus 12:46; Markus 6:3; Lukas 2:7; Johannes 7:5.
Ombiimbeli otayi ti kutya Jesus okwa li e na aamwayina oyendji
Mbela Maria okwa li kee shi omulunde sho a vala Jesus?
Aawe. Embo lyo-New Catholic Encyclopedia olya ti kutya elongo ndyoka otali ti kutya “omukadhona Maria okwa li inaa thigulula uulunde okuza ngaa pokuvalwa kwe. Aantu ayehe oya thigulula uulunde, ihe Maria okwa li i ikalekelwa nokwa mona esilohenda, opo kaa thigulule uulunde.” *
Mepingathano naashono, Ombiimbeli itayi popi nando kutya Maria ina valwa omulunde. (Episalomi 51:5; Aaroma 5:12) Maria okwa li nokuli u ulike kutya ye omulunde, sho a gandja eyonondjambo ndyoka aakiintu ayehe mboka ya mona aanona ya tegelelwa ya gandje paMpango yaMoses. (Levitikus 12:2-8; Lukas 2:21-24) Embo lyo-New Catholic Encyclopedia otali ti: “Elongo kutya ka li omulunde sho a vala Jesus inali popiwa mo mOmbiimbeli. Ohali longwa owala kOngeleka.”
Maria otu na oku mu tala ko ngiini?
Maria okwe tu tulila po oshiholelwa oshiwanawa shokukala neitaalo, shokuvulika, sheifupipiko noshokukala tu hole Kalunga shili. Oye gumwe gwomaantu aadhiginini mboka tu na okuholela. — Aahebeli 6:12.
Nonando okwa li e na oshinakugwanithwa shi ikalekelwa shokuninga yina yaJesus, Ombiimbeli itayi ti nando kutya natu longele Maria nenge tu mu galikane. Jesus ka li a pe yina esimano lyi ikalekelwa nenge a lombwele aalanduli ye ye shi ninge. Kakele kiikando mbyoka Maria a tumbulwa mOmavaangeli noshikando shimwe shoka a tumbulwa membo lyIilonga, ina popiwa mo nando momambo galwe 22 ngoka ge li mEtestamendi Epe. — Iilonga 1:14.
MOmbiimbeli inamu popiwa nando kutya Maria okwa li a pewa esimano lyi ikalekelwa kAakriste yopetameko. Pehala lyaashono, Ombiimbeli otayi longo Aakriste ya longele owala Kalunga. — Mateus 4:10.
^ okat. 10 Oshitya shOshihebeli shoka sha tolokwa “omukadhona” mehunganeko lyaJesaja osho ʽalmah’ tashi ulike komukiintu ngoka inaa ya momilalo. Ihe kewiliko lyaKalunga, Mateus okwa li a longitha oshitya shOshigreka parthenos, shoka tashi ti “omukadhona.”
^ okat. 13 Aantu yamwe kaye hole uutumbulilo “Omuna gwaKalunga,” oshoka oyi itaala kutya uutumbulilo mboka otawu ulike kutya Kalunga okwa ya momilalo nomukiintu. Ihe Ombiimbeli hasho tayi ti. Pehala lyaashono, mOmbiimbeli Jesus ota popiwa mo e li “Omuna gwaKalunga” noku li “omutango gwiishitwa ayihe,” oshoka okwa shitwa kuKalunga shu ukilila noye a shitwa tango kiinima ayihe. (Aakolossa 1:13-15) Ombiimbeli oya popi omuntu gwotango, Adam, e li ‘Adam yaKalunga’ nenge Omuna gwaKalunga. (Lukas 3:38) Adam oti ithanwa ngawo, molwaashoka okwa li a shitwa kuKalunga.
^ okat. 20 Embo etiyali, Volume 7, epandja 331
Opu na ishewe uuyelele mbuka
OMAPULO GOPAMBIIMBELI TAGA YAMUKULWA
Mbela Maria oye yina yaKalunga?
Omanyolo Omayapuki nosho wo ondjokonona yUukriste otayi tu pe eyamukulo lya yela li na ko nasha nepulo ndika.
NATU HOLELENI EITAALO LYAWO
Maria— Tala, “ongame omuntu gwOmuwa”!
Omukalo moka Maria i inyenge sho a lombwelwa komuyengeli Gabriel otagu holola shike kombinga yeitaalo lye? Maria okwa li u ulike uukwatya wuni uuwanawa?
OMAPULO GOPAMBIIMBELI TAGA YAMUKULWA
Mbela Jesus okwa li a hokana? Mbela okwa li e na aamwayina?
Otatu ka tseya ngiini kutya Jesus okwa li a hokana nenge ina hokana, sho Ombiimbeli inaayi shi popya kondandalunde?