Mbela Kalunga oku li apuhe?
Shoka Ombiimbeli tayi ti
Kalunga oha vulu okumona kehe shimwe, noha vulu okukatuka momukalo kehe a hala. (Omayeletumbulo 15:3; Aahebeli 4:13) Nonando ongawo, Ombiimbeli itayi longo nando kutya Kalunga oku li apuhe nenge oku li moshinima kehe. Pehala lyaashono, otayi ulike kutya Kalunga oku li omuntu noku li megulu.
Kalunga okwa tya ngiini?: Kalunga oku li omuntu gwopambepo. (Johannes 4:24) Iha monika kaantu yonyama nombinzi. (Johannes 1:18) Omamoniko gaKalunga ngoka ga nyolwa mOmbiimbeli otaga ulike Kalunga e li mehala lye li ikalekelwa. Ina popiwa nando e li apuhe. — Jesaja 6:1, 2; Ehololo 4:2, 3, 8.
Ehala moka mu na Kalunga: Kalunga oku li mehala lyopambepo, ndyoka lya yooloka ko kewangandjo ndyoka hatu mono. Ombiimbeli otayi ti kutya Kalunga oku li ‘megumbo lye megulu.’ (1 Aakwaniilwa 8:30) Ombiimbeli oya popya pompito yimwe sho iishitwa yopambepo ya “holoka koshipala shOmuwa [Jehova],” * naashoka otashi ulike kutya Kalunga oku na ehala lye lyokondandalunde moka ha kala. — Job 1:6.
Ngele Kalunga ke li apuhe, mbela ota vulu tuu okukala e na ko nasha nangame paumwene?
Eeno. Kalunga oku na ko nasha lela nakehe gumwe gwomutse. Nonando Kalunga oku li megulu, oku wete ayehe mboka ye li kombanda yevi mboka ya hala shili oku mu nyanyudha, nohe ya kwathele. (1 Aakwaniilwa 8:39; 2 Ondjalulo 16:9) Tala nkene Jehova u ulike kutya oku na ko nasha naapiya ye:
Uuna to galikana: Jehova oha kala a pulakena kegalikano lyoye pethimbo mpoka to galikana. — 2 Ondjalulo 18:31.
Uuna wa gwililwa po: “Omuwa oku li popepi naamboka ya dhengwa pevi; ota hupitha mbo ya kanitha etegameno.” — Episalomi 34:18.
Uuna wa pumbwa ewiliko: Jehova ote “ku ulukile ondjila ndjo u na okulandula” okupitila mOohapu dhe, Ombiimbeli. — Episalomi 32:8.
Omauvoko ga puka kombinga yokutya Kalunga oku li apuhe
Euvoko lya puka: Kalunga oku li kehe pamwe meshito.
Oshili: Kalunga ke li kombanda yevi noke li kehe pamwe mewangandjo. (1 Aakwaniilwa 8:27) Odhoshili kutya oonyothi nosho wo iinima yilwe meshito ngaashi ‘eyalelo, otayi holola esimano lyaKalunga.’ (Episalomi 19:1) Nonando ongawo, Kalunga iha kala meshito lye ngaashi owala omuthaneki ihaa kala momathano ge. Nonando osho shi li ngaaka, ethano otali vulu oku tu lombwela sha kombinga yomuthaneki ngoka e li thaneka. Sha faathana, eshito ndyoka tu wete, otali tu lombwele kombinga yomaukwatya gOmushiti, ngaashi oonkondo, uunongo nohole, “nando oye iha monika.” — Aaroma 1:20.
Euvoko lya puka: Kalunga oku na okukala e li apuhe, opo a vule okutseya iinima ayihe noku kale Omunankondoawike.
Oshili: Ombepo ondjapuki yaKalunga, oyo oonkondo dhaKalunga tadhi longo. Okupitila mombepo ondjapuki, Kalunga ota vulu okuninga sha ethimbo kehe nota vulu oku shi ninga momukalo kehe, nokaa pu na ekwatho lyomuntu. — Episalomi 139:7.
Euvoko lya puka: Episalomi 139:8, otali longo kutya Kalunga oku li apuhe sho tali ti: “Ngele tandi londo kegulu, oko u li; ngele tandi ka lala muuyuni wokuusi, naamoka omo u li.”
Oshili: Enyolo ndika itali popi nando kutya Kalunga oku li peni. Ihe otali popi kutya kape na ehala mpoka Kalunga itaa vulu okuthika, opo e tu kwathele.
^ okat. 3 Jehova olyo edhina lyaKalunga ngaashi tali holoka mOmbiimbeli.
Opu na ishewe uuyelele mbuka
OMAPULO GOPAMBIIMBELI TAGA YAMUKULWA
Ombepo ondjapuki oshike?
Omolwetompelo ewanawa, Ombiimbeli oya popya ombepo ondjapuki yu ukitha “kiikaha” yaKalunga.
KOMBINGA YETU
Pula ekonakonombiimbeli
Kundathaneneni epulo lyopaMbiimbeli nenge wu ilonge oshindji kombinga yOonzapo dhaJehova.