PaJohannes 1:1-51
1 Petameko opwa li Ohapu; nOhapu oya li naKalunga, nOhapu oya li ya fa Kalunga.*
2 Nguka okwa kala naKalunga okuza petameko.
3 Iinima ayihe oya shitwa okupitila muye, nokakele kuye, kapu na nando osha sha shitwa inaashi pitila muye.
4 Omwenyo ogwe ya po okupitila muye, nomwenyo ogwa li uuyelele waantu.
5 Uuyelele otawu minikile momilema, ihe inawu sindwa komilema.
6 Opwa li omulumentu gumwe a tumwa e li omukalelipo gwaKalunga, nedhina lye oJohannes.
7 Omulumentu ngoka okwa li e ya e li ombangi, a gandje uumbangi kombinga yuuyelele, opo aantu yomaludhi agehe ya vule okwiitaala okupitila muye.
8 Haye a li uuyelele mboka, ihe ye okwa li owala e na okugandja uumbangi kombinga yawo.
9 Uuyelele washili, mboka wa li tawu ka gandja uuyelele kaantu yomaludhi agehe, owa li pokuya muuyuni.
10 Okwa li muuyuni, nuuyuni owe ya po okupitila muye, ihe inawu mu tseya.
11 Okwa li e ya kaantu yomoshitopolwa shaandjawo, ihe inaye mu taamba ko.
12 Nonando ongawo, okwe shi ningi tashi wapa, opo ayehe mboka ye mu taamba ko noya ulika kutya oye na eitaalo muye, ya ninge oyana yaKalunga.
13 Inaya valwa panyama nombinzi, nenge pahalo lyopantu, ihe oya za kuKalunga.
14 Onkee ano Ohapu oya ningi omuntu,* nokwa kala mokati ketu; neadhimo lye otwe li mona, eadhimo lya fa lyomumati epona ndyoka a pewa kuhe; nokwa li aluhe ha popi oshili nokwa udha esilohenda lyaKalunga.
15 (Johannes okwa kala nokuhempulula kombinga ye, ta igidha ta ti: “Nguka oye naanaa nda li tandi popi kombinga ye, sho nda tile: ‘Ngoka te ya konima yandje oku vule ndje, oshoka ye oko a kala nale manga kaanda li ko.’”)
16 Atuheni otwa mona esilohenda enene okuza kuye, oshoka okwa udha esilohenda.
17 Ompango oya gandjelwe okupitila muMoses, ihe esilohenda noshili oye ya po okupitila muJesus Kristus.
18 Kapu na nando omuntu a mona Kalunga nando olumwe; epona, ndyoka lya fa Kalunga* nolya kala puHe,* olyo lye mu holola.*
19 Uumbangi mbuka owo Johannes a li a gandja, sho Aajuda ya tumu aayambi nAalevi ya za kuJerusalem, ye ke mu pule taya ti: “Ongoye lye?”
20 Ina kakadhala okuyamukula. Okwa popi oshili ta ti: “Hangame Kristus.”
21 Opo nduno oye mu pula taya ti: “Ongoye lye ano nduno? Ongoye Elia?” Okwe ya yamukula ta ti: “Aawe, hangame!” “Ongoye Omuhunganeki?” Opo ihe okwe ya yamukula ta ti: “Aawe!”
22 Onkee ano oya ti kuye: “Ongoye lye ano nani? Tu lombwela, opo tu ka gandje eyamukulo kwaamboka ye tu tumu. Tu lombwela kutya ongoye lye?”
23 Okwa ti: “Ongame ewi lyaangoka ta igidha mombuga ta ti: ‘Lalakanitheni ondjila yaJehova,’ ngaashi owala omuhunganeki Jesaja a tile.”
24 Aantu mboka ya li taye mu pula oya li ya tumwa kAafarisayi.
25 Onkee ano oye mu pula taya ti: “Omolwashike nduno ho ninginitha, ngele hangoye Kristus, Elia, nenge Omuhunganeki?”
26 Johannes okwe ya yamukula ta ti: “Ngame ohandi ninginitha momeya. Mokati keni omu na gumwe ngoka kaamu mu shi,
27 ngoka te ya konima yandje, noinandi gwana nokuli okudhitulula omiya dhoongaku dhe.”
28 Iinima mbika oya ningilwa muBetania handiyaka yaJordan, hoka Johannes a li ta ninginithile aantu.
29 Esiku lya landula ko, Johannes okwa mono Jesus te ya kuye, nokwa ti: “Taleni, Onzigona yaKalunga ndjoka tayi kutha po oondjo dhuuyuni!
30 Nguka oye nda li te popi, sho nda tile: ‘Ngoka te ya konima yandje oku vule ndje, oshoka ye oko a kala nale, manga kaanda li ko.’
31 Nangame kanda li ndi mu shi, ihe onde ya okuninginitha momeya, opo a tseyike muIsraeli.”
32 Johannes okwa gandja wo uumbangi ta ti: “Onda mono ombepo ondjapuki yi li molupe lwonguti, tayi kuluka okuza megulu noya kala kombanda ye.
33 Nonando nangame kanda li ndi mu shi, Ngoka* a tumu ndje ndi ninginithe momeya okwa lombwele ndje ta ti: ‘Ngoka to mono kuye taku kulukile ombepo e tayi kala kombanda ye, oye te ya okuninginitha nombepo ondjapuki.’
34 Onde shi mona, nonde shi tseyitha kutya nguka oye Omuna gwaKalunga.”
35 Natango, esiku lya landula ko, Johannes okwa li a thikama naalongwa ye yaali,
36 naasho a tala kuJesus ta ende, okwa ti: “Taleni, Onzigona yaKalunga!”
37 Sho aalongwa mboka yaali ya uvu shoka a ti, oya landula Jesus.
38 Opo nduno Jesus okwa punguluka, naasho e ya mono ye mu landula, okwa ti kuyo: “Otamu kongo shike?” Oya ti kuye: “Rabbi (shoka tashi ti, “Muhongi”), oho zi peni?”
39 Okwa ti kuyo: “Ileni mu ka tale po.” Onkee ano oya yi noya mono mpoka ha zi e taya kala naye esiku ndyoka. Osha li lwopotundi ontimulongo.*
40 Andreas, omumwayina gwaSimon Petrus, okwa li gumwe gwomaalongwa yaali mboka ya uvu shoka Johannes a popi, noya landula Jesus.
41 Tango okwa yi komumwayina Simon e ta ti kuye: “Otwa mona Mesiasa” (sha hala okutya, “Kristus”),
42 opo nduno okwe mu fala kuJesus. Sho Jesus e mu mono, okwa ti: “Ongoye Simon, omuna gwaJohannes; oto ka ithanwa Kefas” (sha hala okutya, “Petrus”).
43 Esiku lya landula ko, Jesus okwa li a hala okuya kuGalilea, opo ihe okwa tsakaneke Filippus e ta ti kuye: “Ninga omulanduli gwandje.”
44 Filippus okwa li a za kuBetsaida, koshilando hoka kwa za Andreas naPetrus.
45 Sho Filippus a tsakanene naNatanael, okwa ti kuye: “Otwa mona ngoka a popiwa mOmpango yaMoses nomomambo gAahunganeki, Jesus gwokuNasaret, omuna gwaJosef.”
46 Ihe Natanael okwa ti kuye: “MuNasaret otamu vulu ngaa okuza sha oshiwanawa?” Filippus okwa ti kuye: “Ila wu ka tale.”
47 Jesus okwa mono Natanael te ya kuye, nokwa popi kombinga ye, ta ti: “Taleni, Omuisraeli gwashili ngoka kee na nando omakoto gasha!”
48 Natanael okwa ti kuye: “Owu shi ndje ngiini?” Jesus okwe mu yamukula ta ti: “Onde ku mona sho wa li momukwiyu, omanga Filippus inee ku ithana.”
49 Natanael okwa yamukula ta ti: “Muhongi,* ongoye Omuna gwaKalunga, Omukwaniilwa gwaIsraeli.”
50 Jesus okwa ti kuye: “Mbela shoka owe shi itaale owala molwaashoka nde ku lombwele kutya onde ku mona momukwiyu? Oto ka mona iinima iikumithi yi vule mbika.”
51 Opo nduno okwa ti kuye: “Oshili tandi mu lombwele, otamu ka mona egulu lya eguluka, naayengeli yaKalunga taya londo notaya londoloka, ya uka kOmuna gwomuntu.”
Omanyolo gopevi
^ Nenge “oya li kalunga.”
^ Eln., “onyama.”
^ Eln., “kalunga epona.”
^ Nenge “mekolo lyaHe.” Shika otashi ulike kokukala wa hokiwa.
^ Nenge “olyo lye mu yelitha.”
^ Sha hala okutya, Kalunga.
^ Sha hala okutya, lwopone yokomatango.
^ Nenge “Rabbi.”
