PaMateus 5:1-48
-
EUVITHO LYOKONDUNDU (1-48)
-
Jesus ta tameke okulonga aantu kondundu (1, 2)
-
Iinima omugoyi mbyoka hayi eta enyanyu (3-12)
-
Omongwa nosho wo uuyelele (13-16)
-
Jesus omugwanithi gwOmpango (17-20)
-
Omayele kombinga yongeyo (21-26), yoluhondelo (27-30), yeteyondjokana (31, 32), yokugana (33-37), yokushunithila omuntu uuwinayi (38-42), yokuhola aatondi yetu (43-48)
-
5 Sho Jesus a mono oongundu dhaantu, okwa londo kondundu, nokonima sho a kuutumba, aalongwa ye oye ya kuye.
2 Opo nduno okwa tameke oku ya longa, ta ti:
3 “Mboka ye shi kutya oya pumbwa ewiliko lyaKalunga oya nyanyukwa, oshoka Uukwaniilwa womegulu owawo.
4 “Mboka ya nika oluhodhi oya nyanyukwa, oshoka otaya ka hekelekwa.
5 “Mboka ye na omwenyo omwaanawa oya nyanyukwa, oshoka otaya ka thigulula evi.
6 “Mboka ya sa ondjala nenota lyuuyuuki oya nyanyukwa, oshoka otaya ka kutithwa.
7 “Mboka aanahenda oya nyanyukwa, oshoka otaya ka silwa ohenda.
8 “Mboka ye na omitima dha yela oya nyanyukwa, oshoka otaya ka mona Kalunga.
9 “Mboka ye li aakondjeli yombili oya nyanyukwa, oshoka otaya ka ithanwa oyana yaKalunga.
10 “Mboka taya hepekwa omolwuuyuuki oya nyanyukwa, oshoka Uukwaniilwa womegulu owawo.
11 “Kaleni mwa nyanyukwa uuna aantu taye mu sheke, taye mu hepeke, nuuna taye mu popile muuwinayi noku mu lundila omolwandje.
12 Nyanyukweni nokunyanyukililwa, oshoka ondjambi yeni onene megulu. Osho wo ya li ya hepeke aahunganeki mboka ye mu tetekele.
13 “One omongwa guuyuni, ihe ngele omongwa ogwa kanitha omulyo,* otagu vulu ngaa we okutoyalekwa? Ihagu kala we gu na oshilonga shasha, ihe ohagu ekelwahi pondje e tagu lyatagulwa kaantu.
14 “One uuyelele wuuyuni. Oshilando sha tungilwa kondundu itashi vulu okukala sha holama.
15 Aantu ihaya tema olamba e taye yi tula kohi yontungwa, ihe okoshihukikwa, opo yi vule okuminikila ayehe megumbo.
16 Sha faathana, uuyelele weni nawu yele, opo aantu ya mone iilonga yeni iiwanawa noya hambelele Ho yeni gwomegulu.
17 “Inamu dhiladhila kutya onde ya okuhulitha po Ompango nenge oohapu dhaahunganeki. Inandi ya okuhulitha po iinima mbyoka, ihe oku yi gwanitha.
18 Oshili tandi mu lombwele: Nonando andola egulu nevi oyi hule po, mOmpango itamu zi nando okandanda kamwe nenge okankwanu kamwe, sigo oosho ayihe ya gwanithwa po.
19 Onkee ano kehe gumwe ngoka ta yono shimwe shomiipango mbika iishona, nota longo yalwe ya ninge sha faathana, ita ka kala a gwana okukala gumwe gwomwaamboka taya ka ya mUukwaniilwa womegulu. Ihe kehe ngoka ta vulika kompango, nota longo yalwe ya vulike kuyo, ota ka kala a gwana okuninga gumwe gwomaapangelwa yUukwaniilwa womegulu.
20 Oshili tandi mu lombwele, uuyuuki weni ngele kawu vule waalongimpango nowAafarisayi, itamu ka kala mwa gwana okuya mUukwaniilwa womegulu.
21 “Omu shi kutya oohokulululwa yeni oya lombwelelwe taku ti: ‘Ino dhipaga; ngoka ta dhipaga okwi ilongela okufalwa kompangu.’
22 Oshili tandi mu lombwele: Kehe ngoka ta tsikile okukala a geela omumwahe, okwa ilongela okugeelwa. Kehe ngoka ta ula omumwahe omalaka omawinayi ota falwa kOmpangu yoPombanda, naangoka ta ula mukwawo ta ti, ‘Egoya ngoye!’ okwa ilongela okuya muGehenna.*
23 “Uuna to fala omagano goye koshiyambelo e to dhimbulukwa kutya pokati keni nomumwaho kapu na ombili,
24 thiga po omagano goye e to yi tango wu ka pange ombili nomumwaho, opo ihe to galuka, wu ye wu gandje omagano goye.
25 “Paathaneni ombili nziya nomutamaneki gwoye omanga mu li mondjila yokuya kompangu, opo omutamaneki gwoye kee ku gandje komupanguli, nomupanguli kee ku gandje komuyakuli gwomompangu e to edhililwa mondholongo.
26 Oshili tandi ku lombwele, ito zi mo nandonando, sigo oosho wa futu okamaliwa koye kahugunina.
27 “One omwa uvu kutya okwa tiwa: ‘Ino hondela.’
28 Ihe ngame otandi mu lombwele kutya kehe ngoka ta tala omukiintu e mu haluka, okwe mu hondela nale momutima gwe.
29 Ngele eho lyoye lyokolulyo otali ku yonitha, li tsipula mo e to li ekelehi. Oshoka oshi li hwepo wu kanithe shimwe shomiilyo yoye yolutu, pehala olutu lwoye aluhe lwu umbilwe muGehenna.*
30 Shimwe ishewe, ngele oshikaha shoye shokolulyo otashi ku yonitha, shi teta ko e to shi ekelehi. Oshoka oshi li hwepo wu kanithe shimwe shomiilyo yoye yolutu, pehala olutu lwoye aluhe lwu ye muGehenna.*
31 “Kakele kaashono, okwa tiwa wo: ‘Kehe ngoka ta teya ondjokana nomukulukadhi gwe, oku na oku mu pa onzapo yeteyondjokana.’
32 Ihe ngame otandi mu lombwele, kehe ngoka ta teya ondjokana nomukulukadhi gwe, omolwoshinima shilwe kaashi shi omilalo dha nyata,* ote mu ningitha a hondele, nakehe ngoka ta hokana omukiintu ngoka, ota hondele.
33 “Natango, one omwa uvu kutya oohokulululwa oya lombwelelwe taku ti: ‘Ino gana e to kala inoo shi gwanitha, ihe gwanitha po shoka wu uvanekela Jehova.’
34 Ihe ngame otandi mu lombwele: Inamu gana nandonando, kutya nduno okegulu, oshoka olyo oshipangelapundi shaKalunga;
35 nenge kevi, oshoka olyo oshilyatelo shoompadhi dhe, nenge kuJerusalem, oshoka osho oshilando shOmukwaniilwa omunene.
36 Ino gana komutse gwoye, oshoka ito vulu okulundulula nando efufu limwe li ninge etokele, nenge eluudhe.
37 ‘Eeno’ gwoye na kale owala eeno, ‘naAawe’ gwoye na kale owala aawe. Shoka tashi gwedhwa po osha za kumwiinayi.
38 “One mwa uvu kutya okwa tilwe: ‘Eho okeho, eyego okeyego.’
39 Ihe ngame otandi mu lombwele: Inamu shunithila omuntu uuwinayi, ihe ngele opu na ngoka te ku dhenge enkawa kolupanda lwokolulyo, mu etha wo e ku dhenge kolukwawo.
40 Ngele omuntu okwa hala oku ku fala kompangu, e ku kuthe onguwo yoye yokohi, mu pa wo yokombanda;
41 nongele gumwe ote ku thiminike wu mu thindikile oshinano shokilometa yimwe, mu thindikila oshinano shookilometa mbali.
42 Pa ngoka te ku indile, noino tindila ngoka a hala oku ku lya oongunga.*
43 “One omwa uvu kutya okwa tiwa: ‘Hola mukweni, ihe tonda omutondi gwoye.’
44 Ihe ngame otandi mu lombwele: Kaleni mu hole aatondi yeni, nokugalikanena mboka taye mu hepeke,
45 opo mu ulike kutya one oyana yaHo yeni gwomegulu, oshoka etango lye ohe li pitithile mboka haya longo uuwinayi naamboka haya longo uuwanawa, nomvula ye ohe yi lokithile mboka aayuuki naamboka kaaye shi aayuuki.
46 Ngele omu hole owala mboka ye mu hole, otamu pewa ondjambi yashike? Mbela aafendelithi nayo hasho haya ningi?
47 Nongele ohamu popitha owala aamwaho, mbela omu shi otamu ningi oshinima oshiwanawa mu vule yalwe? Aantu yomiigwana nayo hasho mbela haya ningi?
48 Kaleni ano mwa gwana mwa pwa,* ngaashi Ho yeni gwomegulu a gwana a pwa.
Omanyolo gopevi
^ Nenge “ogwa hahuka.”
^ Ehala lyokufikila iiyagaya, ndyoka lya li kondje yaJerusalem. Tala Omafatululo giitya.
^ Tala omafatululo giitya.
^ Tala Omafatululo giitya.
^ MOshigreka porneia. Tala omafatululo giitya.
^ Sha hala okutya, okulya oongunga, kaapu na okufuta iihohela.
^ Nenge “mwa gwanenena.”
