PaJohannes 5:1-47
5 Konima yaashika, opwa li oshituthi shAajuda, na Jesus okwa yi kuJerusalem.
2 MuJerusalem pOsheelo shOonzi opwa li pu na ondama hayi ithanwa Betesda mOshihebeli, ya dhingolokwa komikala ntano.
3 Momikala moka omwa li hamu kala ongundu onene yaavu ya lala, aaposi, iitiningili naamboka ya sa ombanda.
4 ——
5 Ihe mpoka opwa li wo pu na omulumentu gumwe ngoka a kala ta ehama uule womimvo 38.
6 Sho Jesus a mono omulumentu ngoka a lala mpoka, nokwa li e shi kutya okwa kala ethimbo ele ta ehama, okwa ti kuye: “Owa hala okwaaluka?”
7 Omulumentu ngoka ta ehama okwe mu yamukula a ti: “Omusimanekwa, kandi na ngoka ta fala ndje momeya sho taga nyenganyengithwa. Uuna nda hala okuya mo, gumwe okwa teta ndje nale komeho.”
8 Jesus okwa ti kuye: “Thikama, kutha ontala* yoye e to ende.”
9 Mbalambala, omulumentu ngoka okwa aluka, nokwa kutha ontala* ye e ta tameke okweenda.
Esiku ndyoka olya li Esabati.
10 Onkee ano Aajuda oya ti komulumentu ngoka a aludhwa: “Nena esiku lyEsabati, nokashi li pampango okuhumbata ontala.”*
11 Ihe okwe ya yamukula a ti: “Omulumentu ngoka a aludha ndje oye a lombwele ndje a ti: ‘Kutha ontala* yoye e to ende.’”
12 Oye mu pula ya ti: “Omulumentu ngoka, e ku lombwele ta ti, ‘Kutha ontala yoye e to ende,’ olye?”
13 Ihe omulumentu ngoka, ka li e shi kutya olye e mu aludha, oshoka Jesus okwa li a ningine mongundu yaantu ndjoka ya li mpoka.
14 Konima yaashoka, Jesus okwe mu adha motempeli nokwa ti kuye: “Tala, ngashingeyi owa aluka, ihe ino yona we, opo kuu adhike kuuwinayi wu vule mboka.”
15 Opo nduno omulumentu ngoka okwa yi e ta ka lombwela Aajuda kutya Jesus oye e mu aludha.
16 Shoka osha ningitha Aajuda ya pataneke Jesus, molwaashoka okwa li ta longo iilonga mbyoka mEsabati.
17 Ihe Jesus okwa ti kuyo: “Tate okwa kala ta longo sigo ongashingeyi, nangame otandi tsikile okulonga.”
18 Omolwoohapu dhe ndhoka, Aajuda oya kala ya halelela oku mu dhipaga, oshoka kuyo ina yona owala ompango yEsabati, ihe okwa ipopi wo kutya oku thike puKalunga, sho a ti kutya Kalunga oye He.
19 Onkee ano Jesus okwe ya yamukula ta ti: “Oshili tandi mu lombwele, Omwana iha longo sha pahalo lye mwene, ihe ota longo owala shoka a mona He ta longo. Oshoka kehe shoka He ha longo, osho wo Omwana ta ningi.
20 Oshoka He oku hole Omwana, nohe mu ulukile iinima ayihe, mbyoka ye mwene ha longo, note ke mu ulukila iilonga iinene yi vule mbika, opo mu kumwe.
21 Ngaashi owala He ha yumudha aasi, nOmwana wo ota ka yumudha kehe ngoka a hala okuyumudha.
22 He ita ka pangula nando omuntu, ihe iilonga ayihe yokupangula okwe yi inekelela Omwana,
23 opo aantu ayehe ya simaneke Omwana, ngaashi owala haya simaneke He. Kehe ngoka ihaa simaneke Omwana ita simaneke wo He, ngoka e mu tuma.
24 Oshili tandi mu lombwele, kehe ngoka ta uvu oohapu dhandje e ta itaale Ngoka a tuma ndje, oku na omwenyo gwaaluhe, noita pangulwa, ihe okwa za mo meso nokwe ya momwenyo.
25 “Oshili tandi mu lombwele, ethimbo otali ya nolya thika, sho aasi taya ka uva ewi lyOmuna gwaKalunga, naamboka ya pulakenene nokuvulika kuye otaya ka kala nomwenyo.
26 Ngaashi owala He e na oonkondo dhokugandja omwenyo,* okwa pa wo Omwana oonkondo dhokugandja omwenyo.
27 Okwe mu pa wo oonkondo dhokupangula, oshoka oye Omuna gwomuntu.
28 Inamu kuminwa oshinima shika, oshoka ethimbo otali ya, uuna ayehe mboka ye li moombiladhimbuluko taya ka uva ewi lye
29 e taya zi mo. Mboka ya longo uuwanawa otaya ka yumudhwa e taya kala nomwenyo, naamboka ya longo uuwinayi otaya ka yumudhwa e taya pangulwa.
30 Ihandi longo sha pahalo lyandje mwene. Ohandi pangula owala sha ikolelela kwaashoka Tate a lombwele ndje, nohandi pangula pauyuuki, oshoka ihandi longo ehalo lyandje, ihe olyaTate, ngoka a tuma ndje.
31 “Ngele onda ipopi mwene kutya onda tumwa kuKalunga, nena aantu itaya ka itaala shoka tandi popi.
32 Opu na gulwe ngoka ta hokolola kombinga yandje, nondi shi kutya shoka ta hokolola kombinga yandje oshoshili.
33 Omwa tumine aantu kuJohannes, nokwe ya lombwele oshili kombinga yandje.
34 Ihe ngame inandi pumbwa okuhokololwa komuntu, ihe otandi mu lombwele iinima mbika, opo mu vule okuhupithwa.
35 Omulumentu ngoka okwa li ngaashi olamba ya tema notayi minikile, nomwa li mwa nyanyukilwa uuyelele we uule wokathimbo okafupi.
36 Ihe ngame ondi na uumbangi owundji wu vule mboka wa gandjwa kuJohannes, oshoka Tate okwa pa ndje iilonga, mbika tandi longo, ndi yi gwanithe po, notayi gandja uumbangi kutya onda tumwa kuTate.
37 Tate, ngoka a tuma ndje, oye mwene a gandja uumbangi kombinga yandje. Inamu uva ewi lye nando olumwe, noinamu mu mona nkene a tya.
38 Oohapu dhe kadhi mo mune, molwaashoka inamu itaala ngoka a tuma.
39 “Ohamu konakona Omanyolo, molwaashoka otamu dhiladhila kutya ogo tage ke mu petha omwenyo gwaaluhe, ihe Omanyolo ngoka otaga popi kombinga yandje.
40 Nonando ongawo, inamu hala okulandula ndje, opo mu ka mone omwenyo.
41 Inandi hala okupewa esimano kaantu,
42 nondi shi shi nawa kutya ohole yokuhola Kalunga kayi mo mune.
43 Ngame onde ya medhina lyaTate, ihe inamu taamba ndje ko. Ihe ando gulwe okwa ile medhina lye mwene, andola omwe mu taamba ko.
44 Otamu vulu ngiini okwiitaala, ngele ohamu paathana esimano noihamu kongo esimano, ndyoka hali zi kuKalunga awike?
45 Inamu dhiladhila kutya otandi ke mu popya kuTate, ihe ngoka te ke mu popya oMoses, ngoka mwa inekela.
46 Nokuli ngele omwa itaala Moses, andola nangame omu na okwiitaala ndje wo, oshoka okwa nyola kombinga yandje.
47 Ihe ngele inamu itaala shoka a nyola, otamu ka itaala ngiini shoka tandi popi?”
Omanyolo gopevi
^ Nenge “ombete.”
^ Nenge “ombete.”
^ Nenge “ombete.”
^ Nenge “ombete.”
^ Eln., “e na omwenyo muye mwene.”
