TiiTlaixpantijkauan Jehová amo timokajkalakiaj itech política porque titlaneltokaj itech tlen kijtoua Biblia. Uan amikaj tikchiualtiaj ijkon makichiua, amo tikpejpenaj se partido político noso akin kineki mochiuas tekiua, uan amo tiauij kanin kinchiuaj votaciones para titlapaleuiskej noijki amo tikijtouaj moneki makipatlakan se tekiua. Itech Biblia kuali techyekiluia tleka amo moneki timokajkalakiskej itech política. Matikitakan:

•   Jesús amo okinek makichiuakan tekiua uan tejuan moneki ijkon matikchiuakan (Juan 6:15). Uan noijki okinmilui imachtijkauan yejuan “ayakmó de nin tlaltíkpaktli” ikinon amo omonekiaya kipaleuiskej se partido político (Juan 17:14, 16; 18:36; Marcos 12:13-17).

•   Moneki tikpaleuiskej san iTekiuajkayo toTajtsin Dios, tlen Jesús okijto: “Iwa [...] nin kualitlájtoli non techilia kenomi Dios tlanawatia [noso iTekiuajkayo toTajtsin Dios], motetlapowis itech nochi n tlaltíkpaktli” (Mateo 24:14). Tikpaleuiaj san iTekiuajkayo toTajtsin Dios, ikinon amo timokajkalakiaj itech política kanin tichantij noso itech okseki altepemej. Okachi kuali, titetlapouiaj itech non Tekiuajkayotl (2 Corintios 5:20; Efesios 6:20).

•   Amo timokajkalakiskej itech política techpaleuia matikintlapouikan nochtin itech iTekiuajkayo toTajtsin Dios, maski san tlen partido político kipaleuiaj. Timochijchikauaj tlen tikchiuaj uan tikijtouaj makiteititi tikneltokaj san iTekiuajkayo toTajtsin Dios kiyektlalis nochi ouijkayotl tlen kajki itech Tlaltikpak (Salmo 56:11).

•   Tla timokajkalakiskej itech política, ayakmo kuali timouikaskej iuan nochtin tokniuan tlen chantij itech okseki altepemej (Colosenses 3:14; 1 Pedro 2:17). Ikinon religiones tlen mokajkalakiaj itech política amo kuali mouikaj (1 Corintios 1:10).

 Tikintlakaitaj tekiuajkej. Maski amo timokajkalakiaj itech política, tejuan tikintlakaitaj nochtin tekiuajkej. Ijkon kijtoua Biblia matikchiuakan itech Romanos 13:1: “Nochteh n tlakah moneki makintlakitakah n tekiwajkeh”. Ikinon tikintlakamatij nochi tlanauatilmej, tiktlaxtlauaj nochi tlen moneki uan tiktlakamatij tlen tekiuajkej kichiuaj para techmaluiskej. Amo tikixnamikij intlanauatil tekiuajkej, okachi kuali, tikchiuaj tlen kijtoua Biblia: “Ximotiotsajtsilikah por akimeh nomechnawatiah iwa por nochteh n tekiwajkeh”, okachi ijkuak kinekij kichiuaskej itlaj tlen uelis techtsakuilis matikueyichiuakan toTajtsin Dios (1 Timoteo 2:1, 2).

 Uan tikintlakaitaj akinmej kinekij mokajkalakiskej itech política. Se neskayotl, amo tikintsakuiliaj tlen kichiuaj ijkuaj kipejpenaskej se tekiua uan amikaj tikiluiaj amo makichiua non.

 Amo timokajkalakiaj itech política, ¿yikin opejki ijkon tikchiuaj? Amo. Apóstoles uan akinmej achto opejkej kichiuaj ken Cristo noijki ijkon okichiuayaj. Se amochtli tlen tlajtoua itech nin tlamantli okijto: “Maski okimatiayaj moneki kintlakaitaskej tekiuajkej, akinmej achto opejkej kichiuaj ken Cristo okimatiayaj amo moneki mokajkalakiskej itech política” (Beyond Good Intentions—A Biblical View of Politics [Amo san okinekiayaj tlen kuali. Tlen kijtoua Biblia itech política]). Noijki, Orígenes, se tlakatl tlen omomachti itech religiones uan ochantik itech siglo II uan III, okijkuilo: “Akinmej achto opejkej kichiuaj ken Cristo amo okinekiayaj kinpaleuiskej tekiuajkej”.

 Amo timokajkalakiaj itech política, ¿kijtosneki tikchiuaj itlaj tlen amo kuali tlen uelis kimouijtilis oksekimej? Amo. Tekiuajkej amo moneki techmauiliskej, tejuan amo timokajkalakiaj itech ouijkayotl. Se neskayotl, matikitakan tlen kijtoua se amatlajkuilol tlen okichi Academia Nacional de Ciencias de Ucrania itech xiuitl 2001. Amo timokajkalakiaj itech política ikinon okijto: “Uelis nin tlamantli tlen kichiuaj iTlaixpantijkauan Jehová miakej amo kinpaktia. Uan san ika nin tlamantli, tekiuajkej nazis uan comunistas okintlajyouiltijkej akinmej ijkon okichiuayaj”. Uan noijki kijtoua ijkuak sovíeticos otetlajyouiltijkej, iTlaixpantijkauan Jehová “nochipa okintlakaitayaj tlanauatilmej”, uan “omochijchikauayaj kuali tekitiskej itech granjas uan itech fábricas” uan “amo keman omotaya kichiuiliskej itlaj amo kuali tlanauatijkayotl comunista”. Saiktlami nin amatlajkuilol okijto tlen kineltokaj uan kichiuaj iTlaixpantijkauan Jehová itech ninmej tonalmej “amo teouijtilia nion itech altepetl”.