1 Pedro 2:1-25
2 Xikkauakan nochi tlen amo kuali, amo xitlakajkayauakan, amo xikpiakan ome namoixko, amo xitlaixnekikan uan amo xikinteneuakan* oksekimej para amo kuali makinmitakan.
2 Ijkon ken konemej kitemouaj inmama porque kinekij chichiskej, namejuan noijki ximochijchikauakan xiktemokan melauak iTlajtol toTajtsin Dios tlen namechpaleuis ximoskaltikan uan ximomakixtikan. ITlajtol toTajtsin Dios yetoskia ken leche tlen amitlaj kitlaliliaj.
3 Namejuan uelis ijkon nankichiuaskej porque kuali nankimatij toTeko tetlasojtla.
4 Tlakamej amo okinekej tetl tlen yoltok pero toTajtsin Dios okipejpenki uan okipatioitak. Namejuan inauak nanmotokiaj
5 ken nanyetoskiaj temej* tlen yoltokej. Namechiskaltijtiuij para kichiuaskej se kali ika espíritu santo. Ijkon nanyetoskej nanteopixkej yolchipauakej. Espíritu santo namechpaleuis xiktemakakan tetliokolil uan Jesucristo tlapaleuis makiseli toTajtsin Dios non tetliokolil.
6 Porque iTlajtol toTajtsin Dios kijtoua: “Ompa Sion niktlalia se tetl tlapejpenali. Non tetl miak ipati uan okachi tlakitskijtok kanin motlakxilijtok kali. Amo keman mopinatis akin kineltokas”.
7 Namejuan nankipatioitaj porque nantlaneltokaj. Pero akinmej amo tlaneltokaj “tetl tlen amo okinekej akinmej kalchiuaj, omochi tetl tlen okachi tlakitskijtok”,*
8 uan “se tetl tlen teikxitlanuia uan tetsakuilia”. Yejuan mokxitlanuiaj porque amo kitlakamatij* iTlajtol toTajtsin Dios. Non tlen omoijto kinpanoskia.
9 Pero namejuan “nanpouij itech se familia tlen okipejpenkej, nanteopixkej uan nantekiuajkej, nanpouij itech se altepetl chipauak uan nankatej itech altepetl tlen okipejpenki toTajtsin Dios. Moneki nouian nankitematiltiskej toTajtsin Dios yolkuali”. Ye onamechkixti kanin tlayoua uan onamechseli kanin kajki kualtsin itlauil.
10 Porque achto amo onanpouiayaj itech se altepetl pero axkan nanpouij itech ialtepe toTajtsin Dios. Achto amo onamechiknomatiayaj pero axkan namechiknomatij.
11 Nokniuan tlen yetoskia ken oksekan namoaltepe uan san nanmokalotijtokej nikan tlaltikpak, namechtlatlaujtia amo xikchiuakan tlen kineki namocuerpo. Namejuan nanmochijchikauaj nankixnamikiskej non tlamantli.
12 Xiyeknemikan inmixpan oksekimej. Ijkon ijkuak namechteluiskej nankichiuaj tlen amo kuali, kitaskej nankichiuaj tlen kuali. Noijki kiueyichiuaskej toTajtsin Dios ijkuak tlaixkomakaki.
13 Xikchiuakan tlen kineki toTeko uan xikinkauilikan manamechyekanakan nochtin akinmej tlanauatiaj. Maski yetos se tekiua tlen ueyititok,
14 noso tekiuajkej tlen ye kintitlani makintlajyouiltitij akinmej kichiuaj tlen amo kuali uan makinueyitlalikan akinmej kichiuaj tlen kuali.
15 ToTajtsin Dios kineki xikchiuakan tlen kuali para nankinkamatsakuaskej xoxojtin tlen amo kimatij tlen kijtouaj.
16 Xinemikan ken amitlaj namechtsakuilia pero amo xikchiuakan tlen amo kuali san porque amitlaj namechtsakuilia. Okachi kuali ximochiuakan itlakeualuan toTajtsin Dios.
17 Nochtin xikintlakaitakan, xikintlasojtlakan nochtin tokniuan, xikmauilikan toTajtsin Dios uan xiktlakaitakan tekiua.
18 Tlakeualmej makintlakamatikan* intekouan uan makintlakaitakan. Amo san makintlakamatikan* akinmej yolkualmej uan akinmej teajsikamatij, noijki makintlakamatikan* akinmej amitlaj kinpaktia.
19 ToTajtsin Dios paki tla ikaj tlaxikoua ijkuak tlajyouia uan kixikoua tlen kitoktiaj porque kitlakamati.*
20 ¿Tlen nankitlanij tla nantlaxikouaj ijkuak namechuitekij porque nantlajtlakolchiuaj? Pero toTajtsin Dios paki tla nantlaxikouaj ijkuak namechtlajyouiltiaj porque nankichiuaj tlen kuali.
21 Namejuan onamechnotskej porque Cristo namopatka otlajyoui uan ijkon onamechititi ken nankichiuaskej tlen ye okichi.
22 Ye amo keman otlajtlakolchi uan amo otlakajkaya.
23 Amo otlauijuikalti ijkuak okiuijuikaltijkej. Amo okijto momakopas ijkuak otlajyouijtoka. Ye okika makimalui Juez tlen kuali teixkomaka.
24 Ye okimama nochi totlajtlakol ijkuak icuerpo okipilojkej itech kouitl. Ijkon otechmakixti imak tlajtlakoli uan otechpaleui matiyoltokan para tikchiuaskej tlen kuali. Noijki “namejuan onanpajtikej porque ye okikojkojkej”.
25 Namejuan onankatkaj ken ichkamej tlen opolitokaj pero axkan oksepa onanmokopkej inauak tlajpixki tlen kiyekana namonemilis.
Notas
^ Noso “xikinmijtokan”, “xikinpojpouakan”.
^ Noso “tepejximej”.
^ Noso “tlachikajtok”.
^ Noso “kiuelkakij”.
^ Noso “makinuelkakikan”.
^ Noso “makinuelkakikan”.
^ Noso “makinuelkakikan”.
^ Noso “kiuelkaki”.
