Sekimej techtlajtlaniaj
¿Akin “siuatl” tlen moijtoua itech Isaías 60:1 uan tlen kijtosneki moketsa uan petlani?
Isaías 60:1 kijtoua: “Ximoketsa siuatl uan xipetlani porque motlauil yopejki petlani. Mopan petlani iueyichiualis Jehová”. Versículos tlen satepan katej kiteititiaj “siuatl” kijtosneki Sion noso Jerusalén kanin okiualnauatiayaj Judá (Is. 60:14; 62:1, 2). Jerusalén kineskayotia nochi altepetl Israel. Axkan tikinnankiliskej nin ome tlajtlanilmej: “¿Ken omoketski Jerusalén uan opejki petlani uan keman ijkon opanok? ¿Tlen okse tlamantli kijtosneki tlen okijto Isaías?”.
¿Ken omoketski Jerusalén uan opejki petlani uan keman ijkon opanok? Judíos okinuikakej Babilonia 70 xiuitl. Ijkuakon Jerusalén uan templo oxixinkej. Pero ijkuak medos uan persas okimoaxkatijkej Babilonia, okinkauilijkej israelitas oksepa mamokopakan inmialtepe uan makiueyichiuakan toTajtsin Dios (Esd. 1:1-4). Kanaj xiuitl 537 achto itech xiuitl se, sekimej judíos tlen opouiayaj itech 12 familias omokopkej Jerusalén (Is. 60:4). Opejki kiiluichiuiliaj Jehová uan okitliokolijkej miak tlamantli. Noijki okiyektlalijkej templo (Esd. 3:1-4, 7-11; 6:16-22). Ikinon oksepa opejki petlani iueyichiualis toTajtsin Dios ompa Jerusalén. Nin kijtosneki ijkuak israelitas oksepa opejki kiueyichiuaj toTajtsin Dios. Yejuan omochijkej ken se tlauili porque okintlauilijkej okseki altepemej tlen amo okixmatiayaj toTajtsin Dios.
Tlen okijto Isaías amo nochi omochi ompa itech altepetl Jerusalén porque miakej israelitas ayakmo okitlakamatkej Jehová (Neh. 13:27; Mal. 1:6-8; 2:13, 14; Mat. 15:7-9). Noijki amo okiselijkej Mesías (Mat. 27:1, 2). Uan xiuitl 70 oksepa okixixinijkej altepetl Jerusalén uan templo.
Jehová yokijtojka ijkon panoskia (Dan. 9:24-27). Nochi tlen kijtoua Isaías capítulo 60 amo mochiuaskia ompa itech altepetl Jerusalén.
¿Tlen okse tlamantli kijtosneki tlen okijto Isaías? Siuatl kineskayotia “Jerusalén tlen kajki iluikak”. Non kijtosneki akinmej kitechiuiliaj Jehová ompa iluikak uan ompa pouij nochtin ángeles. Apóstol Pablo okijto “Jerusalén tlen kajki iluikak” “ye tomama” (Gál. 4:26). Ikoneuan siuatl kineskayotiaj Jesús uan 144,000 (ciento cuarenta y cuatro mil) tlen yaskej iluikak. Noijki ompa poui apóstol Pablo. Tlapejpenalmej katej se “altepetl chipauak” tlen moixmati ken Israel uan “iaxka toTajtsin Dios” (1 Ped. 2:9; Gál. 6:16).
¿Ken omoketski Jerusalén uan opetlanki? Opejki petlani ika tlapejpenalmej. Matikitakan tlen okinpanok tlapejpenalmej omochi ijkon ken kijtoua Isaías 60.
Itech siglo ome miakej okixnamikej toTajtsin Dios porque oixpolikej apóstoles. Ikinon tlapejpenalmej omonekiaya moketsaskej porque yetoskiaj ken okatkaj kanin tlayoua (Mat. 13:37-43). Ijkuakon opouiayaj itech religión tlen tlakajkayaua. Non moixmati ken Ueyi Babilonia. Ayakmo opouikej itech religión tlen tlakajkayaua ‘ijkuak opejki tlami tlen axkan onka’ uan non opejki 1914 (Mat. 13:39, 40). Satepan itech xiuitl 1919 yetoskia ken opejki petlanij ijkuak ayakmo opouikej itech religión tlen tlakajkayaua uan opejki tetlapouiaj tlen melauak tlamachtia Biblia. a Ijkuakon miakej opejki kimatij tlen tlamachtia iTlajtol toTajtsin Dios. Noijki okimatkej tlen tlamachtia Biblia akinmej pouij itech Israel tlen iaxka toTajtsin Dios tlen noijki katej ken tekiuajkej tlen moijtoua itech Isaías 60:3 (Apoc. 5:9, 10).
Satepan tlapejpenalmej okachi petlaniskej ijkuak yaskej iluikak. Yejuan pouiskej itech yankuik Jerusalén tlen kajki ken inovia Cristo. Ompa pouiskej 144,000 (ciento cuarenta y cuatro mil) tlen yetoskej tekiuajkej uan teopixkej (Apoc. 14:1; 21:1, 2, 24; 22:3-5).
Ijkon ken kijtoua Isaías 60:1 sapanoua miak ipati tlen kichiuas yankuik Jerusalén (noijki xikita Isaías 60:1, 3, 5, 11, 19, 20 uan Apocalipsis 21:2, 9-11, 22-26). Yiuejkika ompa altepetl Jerusalén okinnauatiayaj israelitas. Noijki yankuik Jerusalén uan Jesucristo peuas tlanauatiskej ijkuak nochi kuali yetos. ¿Tlen kijtosneki tlen ijkuilitok itech Apocalipsis kanin kijtoua yankuik Jerusalén “oualtemouaya iluikak desde kanin kajki toTajtsin Dios”? Kijtosneki tlayektlalis tlaltikpak. Biblia kijtoua ken yetoskej nochtin akinmej kitlakamatij toTajtsin Dios: “Itlauil altepetl kintlauilis ijkuak nejnemiskej” uan ayakmo kipiaskej tlajtlakoli nion amo ixpoliuiskej (Apoc. 21:3, 4, 24). Ijkon ken okijto Isaías uan oksekimej profetas, toTajtsin Dios “nochi kiyektlalis” (Hech. 3:21). Nin opejki mochiua ijkuak Cristo opejki tlanauatia uan tlamis nochi kiyektlaliskej ijkuak tlamis mil xiuitl.
a Ezequiel 37:1-14 uan Apocalipsis 11:7-12 kijtoua 1919 tokniuan opejki kiueyichiuaj toTajtsin Dios ijkon ken ye kipaktia. Ezequiel okijto nochtin tlapejpenalmej ayakmo yetoskiaj imak religión tlen tlakajkayaua. Profecía tlen moijtoua itech Apocalipsis kijtoua sekimej tlapejpenalmej tlen techyekanaj kintsakuaskiaj uan ayakmo kiueyichiuaskiaj toTajtsin Dios ijkon ken kipaktia. Pero 1919 okintlalijkej nonmej tokniuan mayetokan “tlakeuali yolmelajki uan ixtlamatki” (Mat. 24:45; xikita amochtli La adoración pura de Jehová: ¡por fin restaurada!, pág. 118).
