Apocalipsis 14:1-20
14 Ijkuakon onikitak Ichkatsin omoketoka ipan tepetl Sion. Noijki iuan okatkaj 144,000* tlen inmixkuak oijkuilitoka itoka ye uan itoka iTajtsin.
2 Onikkak itlaj omokak iluikak uan omokakiaya ken ijkuak ijkoyoka miak atl uan ken ijkuak chikauak tlatikuini. Tlen onikkak okatka ken ijkuak tlakuikaj akinmej kitsotsonaj inmiarpa.
3 Omokakiaya yejuan otlakuikayaj ken se yankuik tlakuikali ixpan trono, inmixpan naui querubines* uan tlayekankej. Amikaj ueli okimomachtiaya non tlakuikali. Okimatiayaj san 144,000* tlen toTajtsin Dios okinko ipan tlaltikpak.
4 Yejuan amo oauilnenkej inuan siuamej uan kipiaj chipauak innemilis. Kitokaj Ichkatsin maski san kanin yaui. Yejuan okatkaj inuan akinmej chantij tlaltikpak, pero okinkojkej ken yetoskiaj tlakilotl tlen achto tlaki* para kinmakaskej toTajtsin Dios uan Ichkatsin.
5 Amo keman otlakajkayajkej uan amo kipiaj itlaj tlen amo kuali.
6 Onikitak okse ángel uejkapan opatlaniaya. Ye okinmatiltiaya kuali tlajtoli tlen amo keman tlamis akinmej chantij ipan tlaltikpak. Kinmatiltis akinmej oksekan chantij, tlatlamantli familias, akinmej tlatlamantli intlajtol uan akinmej chantij itech tlatlamantli altepemej.
7 Chikauak okijtouaya: “Xikmauilikan toTajtsin Dios uan xikueyichiuakan porque yoajsik hora tlaixkomakas. Ikinon xikueyichiuakan akin okichijchi iluikak, tlaltikpak, mar uan kanin meya atl”.
8 Satepan ouala ángel ome uan okijtouaya: “¡Youetski! ¡Youetski Ueyi Babilonia! Ye okichi nochi altepemej makonikan vino tlen kichiua makinekikan auilnemiskej”.*
9 Ángel eyi okintokak uan chikauak okijtouaya: “Tla ikaj kiueyichiuas yolkatl temomojti, kiueyichiuas iimagen uan kiselis marca ixkuak noso itech ima,
10 noijki konis vino tlen kipia ikualanilis toTajtsin Dios. Non vino amitlaj iuan nelitok uan toTajtsin Dios kitekas itech copa kanin kitlalis ikualanilis. Akin ijkon kichiuas kitlajyouiltiskej ika tlitl uan azufre inmixpan ángeles yolchipauakej uan ixpan Ichkatsin.
11 Amo keman tlamis ipokyo tlitl tlen kintlajyouiltis. Akinmej kiueyichiuaj yolkatl temomojti, kiueyichiuaj iimagen uan akinmej kiseliaj marca tlen kipia itoka amo moseuiskej tlajka nion youak.
12 Ikinon akinmej yolchipauakej moneki tlaxikoskej. Yejuan kintlakamatij* itlanauatiluan toTajtsin Dios uan kineltokaj Jesús”.
13 Noijki onikkak ikaj otlajto iluikak uan okijtouaya: “Xikijkuilo nin: ‘Desde axkan pakiskej idíscipulos toTeko tlen ixpoliuiskej. Espíritu kijtoua ayakmo matekipanokan uan mamoseuikan porque amo moilkauas tlen okichijkej’”.
14 Ijkuakon onikitak se mixtli istak uan onikitak ikaj okatka* ipan mixtli tlen omotaya ken se ikone tlakatl. Okipiaya se corona ipan itsonteko uan okikitskijtoka se tepostli tlateki.
15 Okse ángel oualkiski itech templo uan chikauak okilui akin okatka* ipan mixtli: “Xikonana motepos uan xikteki trigo porque yochikauak uan yoajsik hora kololoskej”.
16 Akin okatka* ipan mixtli okikalaki tepostli ijtik tlaltikpak uan okololo tlen otlaki.*
17 Okse ángel oualkiski itech templo tlen kajki iluikak. Ye noijki okipiaya se tepostli tlateki.
18 Okse ángel oualkiski itech altar uan ye okinauatiaya tlitl. Ye chikauak okilui akin okipiaya tepostli tlateki: “Xikonana motepos tlateki uan xikteki itlakilo uvajkouitl tlen kajki tlaltikpak porque uva yochikauak”.
19 Ángel okikalaki tepostli ijtik tlaltikpak uan okiteki uvas ipan tlaltikpak. Okitlamotlak kanin kipatskaj uvas tlen kineskayotia ikualanilis toTajtsin Dios.
20 Caballos otlajtlaksakej* ipan uvas itempa altepetl. Kanin okipatskakej uvas okiski estli tlen oajsiaya hasta itech infrenos caballos uan estli omonokijtiaj* kanaj 300 kilómetros.*
Notas
^ Ciento cuarenta y cuatro mil.
^ Querubines kijtosneki ángeles tlen okachi tlanauatiaj.
^ Ciento cuarenta y cuatro mil.
^ Noso “mochiua”, “pankisa”.
^ Ika griego moijtoua pornéia. Xikita diccionario kanin kijtoua auilnemi.
^ Noso “kinuelkakij”.
^ Noso “oeuatoka”, “oyetoka”.
^ Noso “oeuatoka”, “oyetoka”.
^ Noso “oeuatoka”, “oyetoka”.
^ Noso “otlamochi”, “otlapankis”.
^ Noso “omokejketskej”.
^ Noso “omomimilojtia”, “omoxauanijtia”, “omotoyajtia”.
^ Ika griego moijtoua 1,600 estadios uan kijtosneki kanaj 300 kilómetros. Yiuejkika griegos ijkon otlatamachiuayaj.
