Hechos 5:1-42
-
Ananías uan Safira (1-11)
-
Apóstoles okinchijkej milagros (12-16)
-
Okintsakej apóstoles uan satepan okinkixtijkej (17-21a)
-
Oksepa okinuikakej inmixpan akinmej opouiayaj Sanedrín (21b-32)
-
“Moneki tiktlakamatiskej toTajtsin Dios ken tekiua uan amo tlakamej” (29)
-
-
Gamaliel otlajto (33-40)
-
Mojmostla otlamachtiayaj kajkalpan (41, 42)
5 Se tlakatl itoka Ananías uan isiua itoka Safira omotlalnemakakej.
2 Pero ye okimokaui seki tomin uan san isiua okilui. Satepan okseki tomin okinuikili apóstoles.
3 Pero Pedro okilui: “Ananías, ¿tleka Satanás omitsyolini xikkajkayaua espíritu santo, uan san ichtaka otikmokaui seki tomin tlen ika omitstlaxtlauilijkej motlal?
4 ¿Amo okatka moaxka non tlali ijkuak ayamo otiknemakaya? ¿Amo uelis tikchiuaskia san tlen tiknekiskia ika non tomin? ¿Tleka otikchi tlen amo kuali? Otikkajkaya toTajtsin Dios uan amo otikinkajkayaj tlakamej”.
5 Ijkuak Ananías ijkon okikak, ouetsito ipan tlali uan oixpoliuik. Sapanoua omomojtijkej akinmej okimatkej tlen opanok.
6 Ijkuakon sekimej telpochmej omotokijkej, okikimilojkej ika tsotsoli* uan okitokatoj.
7 Kanaj eyi hora satepan oajsito isiua Ananías pero amo okimatiaya tlen opanok.
8 Pedro okitlajtlani: “Techilui, ¿melauak ijkon ipati tlali tlen onankinemakakej?”. Siuatl okinankili: “Kema ijkon ipati”.
9 Pedro okilui: “¿Tleka onanmokajkej nankiyejyekoskej iespíritu Jehová? Kaltempa katej akinmej okitokatoj monamik uan te noijki mitskixtiskej”.
10 Safira san niman ouetsito ikxitlan Pedro uan oixpoliuik. Ijkuak telpochmej okalakej, okitakej yoixpoliuik, okikixtijkej uan okitokatoj inakastlan inamik.
11 Nochtin discípulos* tlen okatkaj Jerusalén sapanoua omomojtijkej uan noijki akinmej okimatkej tlen opanok.
12 Apóstoles okinchiuayaj miakej milagros tetlajtlachialtijkej inmixpan oksekimej. Yejuan omonechikouayaj kanin kajki korredor tlen itoka Salomón.
13 Sekimej amo omixeuiayaj mouikaskej inuan discípulos pero nochtin okintlakaitayaj.
14 Noijki okachi omomiaktilijkej tlakamej uan siuamej tlen okineltokayaj toTeko.
15 Sekimej okinkixtiayaj kokoxkej itech ojtli kanin miakej opanouayaj. Okintlaliayaj ipan inpetl ijkon ijkuak panoskia Pedro, sekimej kinmajsiskia maski san iekauilo.
16 Noijki okinuikayaj kokoxkej tlen ochantiayaj ik Jerusalén. Noijki okinuikayaj akinmej otlajyouiayaj porque okinpiayaj ejekamej* uan nochtin opajtiayaj.
17 Pero teopixki tlen otlayekanaya uan akinmej opouiayaj itech inreligión saduceos, okualankej uan omoketskej.
18 Okinkitskijkej apóstoles uan okintsakej itech non altepetl.
19 Pero youak iángel Jehová otlatlapo kanin otsaktokaj, okinkixti uan okinmilui:
20 “Xiakan templo uan nochtin xikintlapouikan ken uelis nochipa yoltoskej”.
21 Yejuan okikakej tlen okijto ángel. Ijkuak otlaneski, okalakej itech templo uan opejki tlamachtiaj.
Ijkuakon oajsito teopixki tlen otlayekanaya uan akinmej iuan okatkaj. Yejuan okinnechikojkej akinmej opouiayaj Sanedrín uan akinmej otlayekanayaj itech altepetl Israel. Satepan otlanauatijkej makinnotsatij apóstoles tlen otsaktokaj.
22 Pero ijkuak otlachiatoj akinmej otlamaluiayaj, yejuan ayakmo ompa okatkaj. Satepan omokopkej akinmej otlamaluiayaj uan okitematiltitoj tlen opanok.
23 Yejuan okijtojkej: “Kuali otlatsaktoka kanin okatkaj. Soldados omoketokaj kaltempa pero ijkuak otlatlapojkej amikaj ompa okatka”.
24 Akin okimaluiaya templo uan teopixkej tlen otlayekanayaj, amo okimatiayaj tlen kichiuaskej ijkuak ijkon okikakej. Yejuan amo okimatiayaj tlen panoskia.
25 Pero ikaj oajsito uan okinmilui: “Tlakamej tlen onankintsakej tlamachtijtokej templo”.
26 Soldados uan akin okinyekanaya oyajkej okinkitskitoj, pero amitlaj okintoktijkej porque okinmauiliayaj* oksekimej. Okineltokayaj kinmojmotlaskiaj ika tetl.
27 Satepan okinuikakej inmixpan akinmej opouiayaj Sanedrín. Teopixki tlen otlayekanaya inuan omotlapoui.
28 Okinmilui: “¿Amo otimechnauatijkej ayakmo xitlamachtikan ika itoka non tlakatl? Pero yonankinmachtijkej nochtin akinmej chantij Jerusalén tlen otlamachtiaya non tlakatl. Nankinekij nantechtlajtlakoltiskej tejuan otikmiktijkej non tlakatl”.
29 Pedro uan oksekimej apóstoles okijtojkej: “Moneki tiktlakamatiskej* toTajtsin Dios ken tekiua uan amo tlakamej.
30 InDios touejkatatajuan okiyoliti Jesús akin namejuan onankimiktijkej itech se kouitl.
31 ToTajtsin Dios okiueyitlali Jesús ijkuak okitlali iyekma. Okitlali para matechmakixti uan matechpaleui matiyoltokan. Ijkon mamoyolkopakan akinmej chantij Israel uan toTajtsin Dios makintlapojpoluili intlajtlakol.
32 Tejuan otikitakej uan tiktematiltiaj nochi nin tlamantli. Noijki ijkon kitematiltia espíritu santo tlen toTajtsin Dios kinmaka akinmej kitlakamatij* ken tekiua”.
33 Yejuan okualankej uan okinekiayaj kinmiktiskej ijkuak ijkon okikakej.
34 Pero se fariseo itoka Gamaliel omoketski tlatlajkotia uan otlanauati makinkixtikan tepitsin nonmej tlakamej. Non tlakatl otlamachtiaya iTlanauatil Moisés uan nochtin okitlakaitayaj.
35 Satepan ye okinmilui oksekimej: “Tlakamej tlen nanchantij Israel, kuali xikitakan tlen nankinekij nankintoktiskej ninmej tlakamej.
36 Xikilnamikikan yiuejkika okatka se tlakatl itoka Teudas. Ye okijtouaya oueyititoka, uan kanaj 400 tlakamej okipaleuiayaj. Pero ijkuak okimiktijkej, ochocholojkej nochtin tlen okipaleuiayaj uan nochi ompa otlanki.
37 Satepan ijkuak omochi censo, okatka Judas tlen oualaya Galilea uan miakej okipaleuiayaj. Ye noijki oixpoliuik uan ochocholojkej nochtin tlen okipaleuiayaj.
38 Ikinon namechiluia xikinkauakan ninmej tlakamej uan amitlaj xikintoktikan. Amo uejkauas tlen kichiuaj tla kinyekana se tlakatl.
39 Pero amitlaj uelis nankintoktiskej tla toTajtsin Dios kinyekana. Xamo hasta nankixnamikiskej toTajtsin Dios”.
40 Yejuan okichijkej tlen okinmilui Gamaliel. Okinnotskej apóstoles, okinuitekej uan okinmiluijkej ayakmo matetlapouikan ika itoka Jesús. Satepan okinkauilijkej mayakan.
41 Apóstoles opakiayaj ijkuak okiskej itech Sanedrín, porque toTajtsin Dios okinkauili matlajyouikan porque okitematiltiayaj itoka Jesús.
42 Mojmostla otlamachtiayaj kuali tlajtoli itech templo uan kajkalpan. Yejuan okitematiltiayaj Jesús ye Cristo.
Notas
^ Noso “tlakemitl”, “tilmajtli”.
^ Ika griego moijtoua “tlanechikol”.
^ Noso “demonios”.
^ Noso “okinmimakasiayaj”.
^ Noso “tikuelkakiskej”.
^ Noso “kiuelkakij”.
