Hechos 4:1-37
-
Pedro uan Juan okintsakej (1-4)
-
Otlaneltokakej 5,000 tlakamej (4)
-
-
Akinmej opouiayaj Sanedrín okinmixkomakakej Pedro uan Juan (5-22)
-
“Amo uelis tikkauaskej tikijtoskej tlen yotikitakej uan yotikkakej” (20)
-
-
Okiluijkej toTajtsin Dios makinyolchikaua (23-31)
-
Discípulos okimotliokoliayaj tlen okipiayaj (32-37)
4 Ijkuak Pedro uan Juan okintlapouijtokaj akinmej ompa okatkaj, oajsitoj teopixkej, saduceos uan akin okimaluiaya templo.
2 Yejuan okualantiayaj porque apóstoles okinmachtiayaj oksekimej. Noijki porque okitematiltiayaj toTajtsin Dios okiyoliti Jesús.
3 Ijkuakon okinkitskijkej uan okintsakuatoj. Ompa okinkajkej hasta ijkuak otlaneski porque non tonal yotlayouatoka.
4 Pero miakej tlen okinkakej otlaneltokakej. Ijkuakon otlaneltokakej kanaj 5,000 tlakamej.
5 Mostlatika omonechikojkej ompa Jerusalén tekiuajkej, tlayekankej uan akinmej otlamachtiayaj tlanauatil.
6 Ompa okatka teopixki Anás tlen otlayekanaya, Caifás, Juan uan Alejandro. Noijki ompa okatkaj nochtin ifamiliares teopixki tlen otlayekanaya.
7 Pedro uan Juan okintlalijkej tlatlajkotia uan okintlajtlanijkej: “¿Akin onamechnauati ijkon xikchiuakan?”.
8 Pedro okiseli espíritu santo uan okinnankili:
“Tekiuajkej uan tlayekankej,
9 namejuan nantechtlajtlaniaj ken otikpaleuijkej nin tlakatl tlen amo onejnemiaya. Uan nankinekij nankimatiskej akin okipajti.
10 Nochtin namejuan uan akinmej chantij altepetl Israel, xikmatikan ye opajtik ika itoka Jesucristo Nazareno. Namejuan onankimiktijkej itech se kouitl pero toTajtsin Dios okiyoliti. Ye okichi mapajti nin tlakatl tlen namoixpan kajki.
11 Jesús ye ‘tetl uan namejuan tlen nankalchiuaj onankitakej amitlaj ipati, uan omochi tetl tlen okachi tlakitskijtok’.*
12 Amo onka okse akin uelis techmakixtis, porque amo onka ikaj okse ipan tlaltikpak tlen toTajtsin Dios okipejpenki para matechmakixti”.
13 Yejuan omotlajtlachialtijkej ijkuak okitakej Pedro uan Juan okatkaj yolchikauakej, maski amo oueyititokaj uan amo okachi omomachtijkej. Ijkuakon okajsikamatkej yejuan okatkaj iuan Jesús.
14 Amitlaj ouelik okinmiluijkej porque inuan okatka tlakatl tlen okipajtijkej.
15 Satepan okinnauatijkej makisakan itech Sanedrín uan yejuan opejki motlapouiaj.
16 Okijtouayaj: “¿Tlen tikintoktiskej ninmej tlakamej? Porque nochtin tlen chantij Jerusalén kimatij okichijkej se milagro tetlajtlachialti. Tejuan amo uelis tikijtoskej amo melauak tlen okichijkej.
17 Matikinmomojtikan uan matikinmiluikan ayakmo matlajtokan ika itoka Jesús para ayakmo makimatikan oksekimej”.
18 Satepan okinnotskej uan okinnauatijkej ayakmo matetlapouikan nion ayakmo matlamachtikan ika itoka Jesús.
19 Pero Pedro uan Juan okinmiluijkej: “Namejuan xikijtokan kox kuali kita toTajtsin Dios timechtlakamatiskej* namejuan noso ye tiktlakamatiskej.*
20 Tejuan amo uelis tikkauaskej tikijtoskej tlen yotikitakej uan yotikkakej”.
21 Satepan oksepa okinmomojtijkej, pero okinkixtijkej porque okitakej amitlaj intlajtlakol para kintlajyouiltiskej. Noijki okinmauiliayaj* akinmej ochantiayaj itech non altepetl porque nochtin okiueyichijkej toTajtsin Dios ijkuak okimatkej tlen opanok.
22 Tlakatl tlen opajtik ika non milagro yokipiaya kanaj 40 xiuitl.
23 Ijkuak okinkajkajkej, yejuan okinmitatoj oksekimej discípulos uan okinmiluijkej tlen okijtojkej tlayekankej uan teopixkej tlen otlayekanayaj.
24 Ijkuak okinkakej san sekan okitlatlaujtijkej toTajtsin Dios uan okiluijkej:
“ToTeko te tiUeyititok, te otikchijchi iluikak, tlaltikpak, mar uan nochi tlen ompa onka.
25 Ika moespíritu santo otikchi touejkatata David tlen omitstekichiuili makijto: ‘¿Tleka okualankej akinmej chantij itech altepemej uan nochtin kineltokaj tlen amitlaj ipati?
26 Yomoyektlalijkej tekiuajkej tlen katej tlaltikpak. Noijki akinmej tlanauatiaj omonechikojkej para kixnamikiskej Jehová uan akin ye okipejpenki’.
27 Ijkon opanok porque Herodes uan Poncio Pilato omonechikojkej itech nin altepetl inuan israelitas. Noijki omonechikojkej inuan oksekimej tlen chantij itech okseki altepemej para kixnamikiskej Jesús akin te otikpejpenki tlen yolkuali uan mitstekichiuilia.
28 Yejuan omonechikojkej para kichiuaskej tlen te yotikijtojka. Ijkon opanok porque te tikpia chikaualistli uan ijkon tikneki mamochiua.
29 Jehová axkan xikkaki ken kinekij techmomojtiskej. Techpaleui matimoyolchikauakan para matitetlapouikan motlajtol.
30 Mota mochikaualis ijkuak tikinpajtia oksekimej uan tikinchiua milagros. Noijki tikchiua okseki tlamantli tetlajtlachialti ika itoka Jesús tlen yolkuali uan mitstekichiuilia”.
31 Ijkuak otlanki omotlatlaujtijkej ika nochi inyolo, otlalolinki kanin omonechikojkej. Nochtin okiselijkej espíritu santo, omoyolchikajkej uan opejki tetlapouiaj iTlajtol toTajtsin Dios.
32 Nochtin tlen otlaneltokayaj san se tlamantli omokuayejyekouayaj* uan san se tlamantli okimachiliayaj. Noijki okimotliokoliayaj tlen okipiayaj uan amo okijtouayaj san yejuan inmiaxka.
33 Ika miak chikaualistli apóstoles okitematiltijkej toTajtsin Dios okiyoliti toTeko Jesús. Uan toTajtsin Dios nochtin sapanoua okinteochi.
34 Amikaj itlaj okipolouaya porque akinmej okipiayaj intlal noso inkal okinemakayaj, tomin okiuikayaj
35 uan okinmakayaj apóstoles. Non tomin okinxejxeliliayaj akinmej okinpolouaya.
36 Se levita itoka José tlen oneski* Chipre uan apóstoles okitokayotiayaj Bernabé,*
37 omotlalnemakak uan tomin okinuikili apóstoles.
Notas
^ Noso “tlachikajtok”.
^ Noso “timechuelkakiskej”.
^ Noso “tikuelkakiskej”.
^ Noso “okinmimakasiayaj”.
^ Noso “omonejneuiliayaj”.
^ Noso “otlakatki”.
^ Nin kijtosneki “teyolchika”.
