Hechos 11:1-30
11 Apóstoles uan tokniuan tlen okatkaj Judea okimatkej miakej tlen amo judíos okineltokakej iTlajtol toTajtsin Dios.
2 Ikinon akinmej okijtouayaj omonekiaya kimochiuiliskej circuncisión omokualanijkej iuan Pedro ijkuak ye oajsito* Jerusalén.
3 Yejuan okiluijkej: “¿Tleka otikalak inchan akinmej amo kimochiuiliaj circuncisión uan inuan otitlakua?”.
4 Pedro okinyekilui tlen opanok. Okinmilui:
5 “Ijkuak onimotlatlaujtijtoka itech altepetl Jope itlaj onechmonextili. Onikitak iluikak oualtemouaya itlaj ken se ueyi tsotsoli* de lino tlen kikitskijtiuitsej itech naui iyakyo. Satepan oajsito kanin ne onikatka.
6 Onikyekitak non tsotsoli* uan ipan okatkaj yolkamej tlen okipiayaj naui inmikxiuan, tekuanimej, yolkamej tlen motilanaj uan noijki totomej.
7 Noijki onikkak ikaj onechilui: ‘¡Ximoketsa Pedro, xitlamikti uan xitlakua!’.
8 Pero ne oniknankili: ‘Amo noTeko. Amo keman nikkua tlen amo chipauak noso tlen sokio’.
9 Satepan ikaj oksepa otlajto iluikak uan okijto: ‘Amo xikijto amo chipauak tlen toTajtsin Dios yokichipa’.
10 Ijkon opanok eyi uelta uan nochi oksepa omokopki iluikak.
11 Ijkuakon eyi tlakamej oajsitoj kanin otimokalotijtokaj. Yejuan okatkaj Cesarea uan okintitlankej manechtemotij.
12 Espíritu santo onechilui san niman inuan manio. Noijki nouan oyajkej ninmej chikuase tokniuan uan otikalakej ichan non tlakatl”.
13 “Ye otechilui okitak se ángel ompa ichan uan ángel okilui: ‘Xikintitlani sekimej tlakamej mayakan altepetl Jope makinotsatij Simón tlen kiluiaj Pedro.
14 Ye mitsiluis ken timomakixtis te uan akinmej mouan chantij’.
15 Pero ijkuak opejki nikintlapouia, espíritu santo inpan oualtemok ijkon ken tejuan achto topan oualtemok.
16 Ijkuakon onikilnamik tlen toTeko okijtouaya: ‘Juan oteapolakti ijtik atl pero namejuan namechapolaktiskej ika espíritu santo’.
17 ToTajtsin Dios okintliokoli espíritu santo ijkon ken otechtliokoli akinmej tikneltokaj toTeko Jesucristo. Ikinon ¿tleka nikiluis toTajtsin Dios amo ijkon makichiua?”.
18 Ijkuak Pedro ijkon okinmilui, ayakmo itlaj okiluijkej uan okiueyichijkej toTajtsin Dios. Okijtojkej: “¡ToTajtsin Dios noijki kinkauilia akinmej amo judíos mamoyolkopakan para mayoltokan!”.
19 Ijkuak okimiktijkej Esteban, tokniuan ocholojkej porque opejki kintlajyouiltiaj uan oajsitoj Fenicia, Chipre uan Antioquía. Yejuan san judíos okinmatiltiayaj kuali tlajtoli.
20 Pero sekimej tokniuan tlen oualayaj Chipre uan Cirene oyajkej Antioquía. Okintlapouiayaj akinmej otlajtouayaj griego uan okinmatiltijkej kuali tlajtoli tlen kijtoua akin toTeko Jesús.
21 Jehová okinpaleuiaya ikinon miakej otlaneltokakej uan opejki kichiuaj ken toTeko.
22 Akinmej omonechikouayaj* Jerusalén okimatkej tlen opanotoka uan okititlankej Bernabé mauia Antioquía.
23 Ijkuak ye oajsito uan okitak toTajtsin Dios okinteochijtoka, sapanoua opaki uan nochtin okinmilui nochipa makitlakamatikan* toTeko ika nochi inyolo.
24 Bernabé okatka yolkuali, otlaneltokaya uan okipiaya espíritu santo. Uan miakej opejki kineltokaj toTeko.
25 Satepan oyajki altepetl Tarso uan okitemojtinemiaya Saulo.
26 Ijkuak okajsik okiuikak Antioquía. Se xiuitl omonechikojkej iuan tlanechikol uan sapanoua miakej okinmachtijkej. Ompa Antioquía discípulos opejki kinmixmatij ken cristianos. ToTajtsin Dios ijkon okichi makinmixmatikan.
27 Ijkuakon sekimej profetas tlen okatkaj Jerusalén oyajkej* Antioquía.
28 Se profeta itoka Ágabo oualmoketski, uan espíritu santo okichi makijto tlaapistiskia ipan nochi tlaltikpak. Nin opanok ijkuak otlanauatiaya Claudio.
29 Discípulos omotlapouijkej kintitlaniliskiaj tlen okinpolouaya tokniuan tlen ochantiayaj Judea. Yejuan kinpaleuiskiaj ika tlen okipiayaj
30 uan ijkon okichijkej. Nochi tlen okololojkej okinmakakej Bernabé uan Saulo. Yejuan okinuikilijkej tlayekankej.
Notas
^ Noso “otlejkok”.
^ Noso “tlakemitl”, “tilmajtli”.
^ Noso “tlakemitl”, “tilmajtli”.
^ Ika griego moijtoua “tlanechikol”.
^ Noso “makiuelkakikan”.
^ Noso “otemokej”.
