Apocalipsis 16:1-21
-
Chikome tazones tlen kipiaj ikualanilis toTajtsin Dios (1-21)
16 Ijkuakon onikkak ikaj chikauak otlajtouaya kanin kajki santo uan okinmiluiaya chikome ángeles: “Xiakan uan xiknokikan* ipan tlaltikpak chikome tazones tlen kipiaj ikualanilis toTajtsin Dios”.
2 Achto ángel oyajki uan okinoki* itazón ipan tlaltikpak. Akinmej okipiayaj imarca yolkatl temomojti uan okiueyichiuayaj iimagen, otlajyouijkej porque otemalkisayaj uan amo opajtiayaj.
3 Ángel ome okinoki* itazón ijtik mar. Mar omokopki estli ken ieso akin kimiktiaj uan omiki nochi tlen yoltok ijtik mar.
4 Ángel eyi okinoki* itazón ijtik aueyatl uan kanin meya atl. Nochi atl omokopki estli.
5 Ijkuakon onikkak ángel tlen kinauatia atl, okijto: “Te amo keman titekaua, axkan tika uan yotikatka. Te tiyolkuali porque otikijto mapano nin tlamantli.
6 Yejuan okinokijkej* inmieso akinmej yolchipauakej uan profetas ikinon otikinmakak makonikan estli porque kinnamiki”.
7 Noijki onikkak ikaj otlajto kanin kajki altar uan okijto: “ToTajtsin Dios Jehová te tikpia nochi chikaualistli, melauak titlaixkomaka uan kuali tikchiua”.
8 Ángel naui okinoki* itazón ipan tonaltsin uan tonaltsin okikauilijkej makintlati akinmej chantij tlaltikpak.
9 Yejuan otlatlakej ika chikauak totonik pero okiuijuikaltijkej itoka toTajtsin Dios uan amo omoyolkopkej. Amo okiueyichijkej toTajtsin Dios akin kipia chikaualistli para kichiuas mapano nochi non chauistli.
10 Ángel makuili okinoki* itazón ipan itrono yolkatl temomojti. Nochi tlen okinauatiaya otlileuak. Akinmej chantij tlaltikpak omonenepiltetexouayaj porque otlajyouiayaj.
11 Pero okiuijuikaltijkej toTajtsin Dios tlen iaxka iluikak porque otlajyouiayaj uan otemalkisayaj. Amo omoyolkopkej uan amo okikajkej tlen okichiuayaj.
12 Ángel chikuase okinoki* itazón ijtik aueyatl Éufrates. Atl ouaki para kinyektlaliliskej inmiojui tekiuajkej tlen oualayaj kanin kisa tonaltsin.
13 Noijki onikinmitak eyi espíritus sokiojkej tlen omotayaj ken kalamej.* Yejuan okisayaj ikamak dragón, ikamak yolkatl temomojti uan ikamak profeta tekajkaya.
14 Ejekamej* kintitlanij nonmej espíritus uan ipan nochi tlaltikpak tekiuajkej kinkakij nonmej espíritus. Espíritus kinchiuaj milagros para kinnechikoskej tekiuajkej ijkuak mochiuas guerra itech iueyi tonal toTajtsin Dios tlen kipia nochi chikaualistli.
15 “¡Xikkaki! Niuits ken se ichteki. Paki akin ijsatok uan tlakentok para amo nemis xipetstik uan oksekimej kitaskej uan pinauas”.
16 Noijki okinnechikojkej tekiuajkej kanin ika hebreo itoka Armagedón.*
17 Ángel chikome okinoki* itazón ipan ejekatl. Ijkuakon ikaj chikauak otlajto kanin santo desde kanin kajki trono uan okijto: “¡Yomochi!”.
18 Noijki otlapejpetlanki, omokak otlajtouayaj, otlatijtikuinki uan chikauak otlalolinki ken amo keman otlaloliniaya desde ijkuak okichijchijkej tlakatl ipan tlaltikpak. Ijkon sapanoua chikauak otlalolinki.
19 Ueyi altepetl omoxelo eyi partes. Ouetskej altepemej tlen katej ipan nochi tlaltikpak. ToTajtsin Dios okilnamik Ueyi Babilonia para kimakas makoni copa tlen kipia vino uan tentok ika ikualanilis.
20 Noijki nochi islas oapolakej uan tepemej opolikej.
21 Desde iluikak ouetski uejueyij tesiuitl inpan akinmej chantij tlaltikpak. Tesiuitl okatka ken uejueyij temej* uan sejse okipiaya kanaj 20 kilos.* Yejuan okiuijuikaltijkej toTajtsin Dios porque otesiuik uan tesiuitl sapanoua otlaijtlako.
Notas
^ Noso “xikmimilokan”, “xikxauanikan”, “xiktoyauakan”.
^ Noso “okimimilo”, “okixauani”, “okitoya”.
^ Noso “okimimilo”, “okixauani”, “okitoya”.
^ Noso “okimimilo”, “okixauani”, “okitoya”.
^ Noso “okimimilojkej”, “okixauanijkej”, “okitoyajkej”.
^ Noso “okimimilo”, “okixauani”, “okitoya”.
^ Noso “okimimilo”, “okixauani”, “okitoya”.
^ Noso “okimimilo”, “okixauani”, “okitoya”.
^ Noso “ranas”.
^ Noso “demonios”.
^ Ika griego moijtoua Har Maguedṓn. Nin tlajtoli kisa ika hebreo uan kijtosneki “tepetl Meguidó”.
^ Noso “okimimilo”, “okixauani”, “okitoya”.
^ Noso “tepejximej”.
^ Ika griego kijtoua “okatka etik kanaj se talento”. Xikita diccionario.
