Miakej akin uejka kayomej kiitatij cascadas tein moajsij kampa ika xolal Pagsanján (Filipinas). Ompa moskaltij nopopaj, Nardo Lerón, kampa semi tatasojtia. Kemej kiitaya ke tekiuanij, policías uan akin iniuan tekitia semi takajkayauayaj, nejon kichiuak maj nochipa kualanto.

 Notatuan semi tekitiaj uan ijkon ueliskia kinixpanoltiskej chikueyi ininkoneuan. Amo semi yetoyaj kalijtik, porin miak tonalmej yayaj tajpiatij itech tepemej kampa onkaya tatok. Miakpa, nokniuj Rodelio uan nejua monekia tikinyekpiaskej toikniuan uan miakpa tikpanouayaj mayan. Maski katkaj tikonemej, amo semi uelik timauiltijkej. Keman tikpiayaj chikome xiuit, monekia titekitiskejya kampa onkayaj koujmej tein kitemakaj cocos. Tiojtokayaj kampa ika semi tejkolis katka tikmamajtiayaj miak cocos tein semi etik katka. Komo amo uelia tikmamayaj, monekia tiktitilatsaskej.

 Topopaj semi techmaaya uan monekia tikxikoskej nejon, sayoj ke okachi techyolkokouaya tikitaskej keniuj kimaaya tomomaj. Tiknekiaj tiktsakuiliskej, sayoj ke amo tiueliaj. Rodelio uan nejua ichtaka tikixtalijkej tikmiktiskej topopaj keman timoskaltiskiaj. ¡Semi niknekia maj topopaj techtasojtani!

 Kemej nikmachiliaya ke amo teyi uelia nikchiuaya uan nikualania porin nopopaj nochipa kualantoya, nikisak nokalijtik keman nikpiaya 14 xiujmej. Ninemik itech ojti seki tonalmej uan peuak nikui marihuana. Satepan, peuak niknejnemiltia se tsikitsin barco kampa nikinuikaya akin uejka kayomej maj kiitatij cascadas.

 Seki xiujmej satepan, peuak nimomachtia universidad ompa Manila. Sayoj ke, kemej monekia nitekititiuj Pagsanján itamian semana, amo uelia semi nimomachtiaya. Amo niyolpakia uan marihuana amo nechyolseuiayaok. Peuak nikui metanfetaminas, cocaína uan heroína. Nejon kichiuak maj peua niauilnemi. Noyampa onkaya mayan, teikamauiltilis uan tajyouilis. Nikintauelitaya tekiuanij uan nikintajtakoltiaya nochi tein mochiuaya. Niktajtaniaya Dios: “¿Keyej nemilis ijkon?”. Sayoj ke amo nikajsik tanankilil itech nion semej taneltokalismej kampa niyajka. Kemej niknekia nimoyolseuis peuak okachi nikui drogas.

 Itech xiuit 1972, akin momachtiayaj Filipinas mosentilijkej uan kinixnamikkej tekiuanij. Peuak iniuan nitaixnamiki, uan nejon taixnamikilis kichiuak maj onka tateuilis. Miakej kintsakkej uan seki metsti satepan moixtalij tanauatil tein tapaleuiskia maj motamatilianij akin takuejmolchiujtoyaj.

 Oksepa ninemik ojti, sayoj ke axkan nikmouiliaya maj tekiuanij teisa nechchiuilianij porin no nitakuejmolchiuak keman kinixnamikkej. Kemej niknekia niksentokas nikouas drogas, peuak nitachteki uan nimonamaka itech auilnemilis iniuan akin kipiayaj tomin uan akin uejka ualeuayaj. Amo nechtekipachouaya ox niksentokaya niyoltoya oso nimomikiliaya.

 Ijkuak, nomomaj uan se nokniuj akin okachi telpoch peuak momachtiaj Biblia iniuan itaixpantijkauan Jiova. Nopopaj semi kualanik uan kichichinoj amaixmej tein kipiayaj. Sayoj ke yejuan taxikojkej uan mochiujkej itaixpantijkauan Jiova.

 Se tonal, se itaixpantijkauj Jiova kitapouij nopopaj ke Dios motenkaua itech Biblia ke satepan sayoj mochiuas tein melauak itech nochi taltikpak (Salmo 72:12-14). Nopopaj semi kiuelitak nejon netenkaualis uan yejua ika peuak kitemoua tein Biblia tamachtia. Amo sayoj kiajsik ke Dios motenkaua kiixtalis se tekiuajyot tein kichiuas tein melauak, ta no tein Dios kichia maj kichiua se takat akin kipia inamik uan se tepopaj (Efesios 5:28; 6:4). Tepitsin satepan, yejua uan okseki nokniuan no mochiujkej itaixpantijkauan Jiova. Kemej uejka niyetoya, amo nikmatik toni panotoya.

 Itech xiuit 1978 ninemito Australia. Nion itech nejon altepet kampa onkak yolseuilis uan amo tatasojti uelik niyolseuik. Niksentokak nitauana uan nikui drogas. Satepan, no itech nejon xiuit itaixpantijkauan Jiova nechkalpanojkej. Nikuelitak keman nechnextilijkej itech Biblia ke satepan onkas yolseuilis itech taltikpak, sayoj ke ouij nechkisaya iniuan nitakuaujtamatis.

 Tepitsin satepan, niyajki Filipinas seki semanas. Nokniuan nechiluijkej ke topopaj mochikaujtoya kuali monejnemiltis, sayoj ke nejua niksentokaya niyolkualantoya uan amo niknekik nikitas.

 Nokniuj siuat akin okachi nojnel, nechmelauilij ika Biblia keyej semi onkak tajyouilis uan teikamauiltilis. Nikmoujkaitak maj se siuapil akin ayamo kimatia miak taman tein se kipanoua itech se inemilis kimatini itanankililuan netajtanilmej tein nejua nimochiuiliaya. Achto ke nimokepaskia, nopopaj nechmakak amatajkuilol Usted puede vivir para siempre en el paraíso en la Tierra. a Nechiluij: “Amo xiksentoka xiktemo. Nejin amatajkuilol mitspaleuis xikajsi tein tiktemojtok”. Nechyoleuak maj nikintemo itaixpantijkauan Jiova keman niajsiskia Australia.

 Ǹikchiuak tein nechyolmajxitij nopopaj uan nikajsik se Kali kampa Mosentiliaj iTaixpantijkauan Jiova kampa ika ninemia, ompa Brisbane. Peuak nimomachtia Biblia. Ika tein achtook moijtojka itech Biblia ke mochiuaskia, kemej tein moijtoua itech Daniel capítulo 7 uan Isaías capítulo 9, nikmatik ke iTekiuajyo Dios, tein sayoj kichiuas tein melauak, techixyekanas satepan. No nikmatik ke amo uejkaua taltikpak yeski se xochital. Niknekia kuali nimouikas iuan Dios, sayoj ke nikmatia ke monekia niktsakuilis tein nikmachiliaya, nikauas drogas, amo nitauanasok nion niauilnemis. Nikauak siuat akin iuan ninemia uan amo nikuiaok drogas nion nitauanayaok. Ijkon kemej okachi nitakuaujtamatia iuan Jiova, niktataujtiaya maj nechpaleui maj nikpatani okachi taman.

 Yolik nikajsikamattiyajki ke tein nimomachtijtoya yekmelauj uelia kipataya aksa. Biblia kijtoua ke komo timochikauaj uelis tikpiaskej se “chipauak talnamikilis” (Colosenses 3:​9, 10). Keman nimochikaujtoya nikchiuas nejon, nikajsikamatik ke nopopaj yekmelauj mopatatoya kemej nokniuan nechiluijkaj. Amo nikualantoyaok nion nikitayaok nopopaj kemej aksa akin nechtauelitaya, ta niknekia kuali nimouikasya iuan. Niktapojpoluij uan nimoijkuanilij netauelitalis tein peuak nikmachilia keman niokichpilok nikatka.

 Keman katka nitelpoch, nimonejnemiltiaya kemej oksekin akin kijtakojtoyaj ininnemilis. Tein Biblia tanejmachtia mochiuak itech nonemilis, porin amo kuali tasojiknimej kichiujkej maj amo kuali nimonejnemilti (1 Corintios 15:33). Sayoj ke nikinajsik kuali tasojiknimej iniuan itaixpantijkauan Jiova, akin nechpaleuijkej maj okachi kuali nimonejnemilti. Ompa no nikixmatik nonamik, Loretta, akin semi niktasojta. Tiomen tikinmachtiaj oksekin keniuj Biblia uelis kinpaleuis.

 Biblia kipaleuij nopopaj maj yeskia kemej amo keman niknemilij ke yeskia: kitasojtaya nomomaj uan katka se itekitikauj Dios yolyemanik uan kuali mouikaya iniuan oksekin. Keman timoitakej satepan ke nimoauij kemej itaixpantijkauj Jiova itech xiuit 1987, nechnauaj, se taman tein yekinika kichiuaya.

 Nopopaj uan nomomaj kiteixmatiltijkej panoua 35 xiujmej, kualtsin nemilis tein tikpiaskej satepan kemej kijtoua Biblia. Nopopaj mochiuak se takat tekitikej uan yolkuali, akin kiixmatiaj porin kinpaleuiaya oksekin. Ijkon kemej panokej xiujmej, uelik nikpoujkaitak uan niktasojtak. Semi niyolpakia porin katka niikoneuj. Nopopaj momikilij itech xiuit 2016, sayoj ke nikelnamiki ika miak netasojtalis uan nikmati ke tiomen tikpatakej miak taman itech tonemilis keman tiktakamatkej tein Biblia tamachtia. Axkan amo nitetauelitaok. Semi nimotasojkamati porin nikixmatik notajtsin, Jiova, akin moajsi iluikak, akin motenkaua kiixpolos nochi tein kintajyouiltia kalyetouanij.