Colosenses 3:1-25

  • Moneki tikpataskej kemej achto tikatkaj (1-17)

    • “Xikmiktikan tein amo kuali tein namotech yetok” (5)

    • “Keman titetasojtaj yekmelauj kualtsin timouikaj” (14)

  • Tein kinyolmajxitiaj kalyetonij (18-25)

3  Sayoj ke komo namejuan namomikilijkajya uan Dios kichiuak oksepa xinemikan* iuan Cristo, xiksentokakan xiktemokan tein yetok ne iluikak kampa Cristo tokotsyetok iyekmakopa Dios.  Xitanemilijtokan itech tein yetok ne iluikak uan amo itech tein onkak nikan taltikpak.  Porin namejuan namomikilijkej, uan namonemilis motatijtok* iuan Cristo, akin poui iuan Dios.  Keman monextis Cristo, akin kichiuak maj tinemikan,* namejuan no iuan namonextiskej uan namechueyitaliskej kemej yejua.  Yejua ika, xikmiktikan tein amo kuali tein namotech yetok, uan ijkon amo nanauilnemiskej,* amo nankichiuaskej tein pitsotik, amo nankitelnejnektoskej namotekaskej iuan aksa,* amo nankinejnekiskej nankichiuaskej tein amo kuali uan amo nankitelixnejnekiskej tein teaxka,* porin nejin kemej yeskia se kinueyichiujtoskia tatadiosmej.*  Dios kinnextilis iueyi kualanyo akin kichiuaj nejin.  Keman nanemiaj kemej yejuan, namejuan no nankichiuayaj nejon.  Sayoj ke axkan amo fiero xikualanikanok, amo xitauelmiktinemikanok, amo xikchiuakanok tein amo kuali uan amo xikijtokanok tein teyolkokos,* uan nion teyi tein pitsotik.  Amo ximokajkayauakan se iuan okse. Xikpatakan kemej achto nankatkaj uan amo xikchiuakanok tein achto nankichiuayaj, 10  uan xipeuakan xinemikan* kemej Dios kineki. Uan nejin uelis okachi kuali nankichiujtiaskej ijkon kemej okachi nankiixmattiaskej Dios. Uan ijkon nankichiuaskej tein yejua kichiua.* 11  Uan keman se nemi kemej Dios kineki, amo tayekantokok ox aksa griego oso judío, ox kitekkejya* oso amo, ox analtekoj oso nemi koujtaj,* ox temako yetok oso amo, porin Cristo yetok itech nochi uan tinochin iuan tipouij. 12  Yejua ika, kemej Dios namechijitak,* nanchipaujkej iixpan uan namechtasojta, xiteyoliknelikan,* xiyolkualmej, xiyolyemankej, xiyolnejmachmej uan amo xiyolijsiuikan. 13  Xiksentokakan ximoxikojtokan se iuan okse uan ximotapojpoluijtokan ika nochi namoyolo maski aksa namechchiuilis tein amo kuali. Jehová* namechtapojpoluij ika nochi iyolo, yejua ika no ijkon xikchiuakan iniuan oksekin. 14  Uan amo sayoj nejon, ta xitetasojtakan,* porin keman titetasojtaj yekmelauj kualtsin timouikaj se iuan okse. 15  Uan maj Cristo nochipa namechyolseuijto,* porin Dios namechnotsak para nansenpouiskej uan nanyolseujtoskej. Uan nochipa ximotasojkamatikan. 16  Maj itajtol Cristo senkis yeto namotech uan maj namechpaleui xitamattokan. Keman namomachtiskej uan namoyolchikauaskej* se iuan okse xikuikan salmos, xikueyitalikan Dios uan xikuikan tatsotson tein ika nantaueyichiuaj uan namotasojkamatij, uan ijkon xiksentokakan. Xikueyichiuakan Jehová* namoyolijtik ika tatsotson. 17  Tein yeski taman tein nankijtoskej uan tein nankichiuaskej, xikchiuakan nochi itokaykopa toTekotsin Jesús, uan itechkopa xiktasojkamatilikan toTajtsin Dios. 18  Siuatsitsin, ximokauakan maj namechixyekana namotakauj, porin nejon kiyolpaktia toTekotsin. 19  Takamej, xiksentokakan xikintasojtakan namosiuauan, uan amo eliuis iniuan xikualantokan.* 20  Konemej, xikintakamatikan namotatuan itech nochi, porin nejon kiyolpaktia toTekotsin. 21  Tetatmej,* amo xikinkualantikan* namokoneuan, para maj yejuan amo moyolkokokan. 22  Takeualmej, xikintakamatikan namotekouan itech nochi, amo sayoj keman yejuan namechitstokej para maj kuali namechitakan oksekin, ta xikintakamatikan ika nochi namoyolo, porin nankimojkatokaj Jehová.* 23  Tein yeski taman tein nankichiuaskej, xikchiuakan ika nochi namoyolo kemej yeskia nankitekitilijtoskiaj Jehová* uan amo oksekin, 24  porin nankimatij ke Jehová* namechtayokolis tein kiixtalijtok namechmakas. Xiktekitilikan namoTeko, Cristo. 25  Akin kichiuas teisa tein amo kuali kitaxtaualtiskej tein kichiuak, uan Dios amo techichikotasojta.*

Tajtolmelaualismej

Itech griego, “ximoajokuikan”.
Oso “mocholtijtok”.
Oso “Cristo, tonemilis”.
Tajtol griego, pornéia. Xikonita auilnemilis.
Oso “akin”, “akaj”.
Oso “amo nanyeskij nanxijxikuimej”.
Oso “tiotsitsin”.
Oso “amo xiteuijuikaltikanok (xitatejtelchiuakanok)”.
Oso “uan ximoyankuilikan ijkon kemej namotaliliskiaj se yankuik tasal”.
Oso “nantamatiskej kemej yejua”.
Oso “kichiuilijkejya circuncisión”. Xikonita circuncisión.
Oso “escita”. Ijkon kiluiayaj se akin amo taixmatia.
Oso “namechixpejpenak”.
Oso “ximopatakan uan xiteyoliknelikan”.
Xikonita Jehová.
Oso “ximopatakan uan xitetasojtakan”.
Itech griego, “maj iyolseuilis Cristo kitsakuili namoyolo”.
Oso “namoyolmajxitiskej”.
Xikonita Jehová.
Oso “amo xikineliuisuikan”.
Nikan kinnojnotstok takamej.
Oso “amo xikinyolajxitikan”.
Xikonita Jehová.
Xikonita Jehová.
Xikonita Jehová.
Oso “amo techichikouia”.