Niyolik itech xiuit 1960. Nomomaj kipiaya 17 xiujmej uan nopopaj yekin kikaujka. Nomomaj uan nejua tinemiaj iniuan noueyitatuan itech se xolal tsikitsin ompa Burg, itech República Democrática Alemana (oso Alemania oriental). Ijkon kemej miakej, nokalyetouanij amo taneltokayaj itech Dios, yejua ika tejuan nion tepitsin tikneltokayaj ke nemia Dios.

Noueyitat nochipa nouan yetoya uan nejon nechyolpaktiaya. Nochipa nechiluiaya maj nikchiua tataman tekimej, kemej nitejkos itech koujmej uan nikinmaxijximas. Nochi nejon nikteluelitaya nikchiuas. Semi niyolpakia.

Se tonal, keman nikpiaya chikome xiuit uan peuaya niyaya ojpatika xiuit tamachtiloyan, nechpanok teisa tein tel amo kuali. Keman nimokepaya nochan, niknemilij nitejkos itech se torre de alta tensión. Keman nimoajsia kemej 8 metros uejkapan, nechchichinoj ichikaualis tit uan amo teyiok nikmatik. Niixpetanik kaltapajtiloyan, sayoj ke amo nikinmachiliayaok nomauan. Monekik nechintekiliskej porin semi chichinaujkaj uan kemej katkaj semi takokolmej ueliskia kimauas noesyo ika teisa. Nomomaj uan noueyitatuan semi moyolkokouayaj. Kemej sayoj nikatka se okichpiltsin, amo nikyekajsikamatia toni panotoya uan keniuj nechijtakoskia nejon itech nonemilis.

Keman nikauak kaltapajtiloyan, nimokepak kaltamachtiloyan, sayoj ke akin iniuan nimomachtiaya nechkejkelouayaj, nechtojtopeuayaj uan nechtamotiliayaj miak taman porin amo uelia nimopaleuiaya. Nechiluiayaj miak taman tein semi nechyolkokouaya. Satepan, nechuikakej ompa Birkenwerder kampa kinyekpiaj konemej akin kinpoloua teisa itech ininnakayo. Kemej uejka moajsia, nomomaj uan noueyitatuan amo ueliaj nechkalpanouayaj porin amo kipiayaj tomin, sayoj nikinitaya itech tonalmej keman amo kinmachtiayaj konemej. Majtakti xiuit amo iniuan niyetoya.

Nimomachtij nikchiuas miak taman ika nometsuan. ¿Tikonnemilia keniuj uelis se kikuis se cuchara oso tenedor ika se imetsuan uan ika se takuas? Nejua uelik nikchiuak nejon. No nimomachtij nimotanpajpakas, nimoxiluis uan hasta nikinolinis nometsuan keman nitajtoua. Nometsuan mochiujkej kemej yeskiaj nomauan.

 Keman katka nitelpoch nechyolpaktiaya tein moixmati kemej ciencia ficción. Niknemiliaya ke se tonal ueliskia nikinpias nomauan tein chijchiujtoskiaj ika tepos uan ijkon ueliskia nikchiuas tein yeski. Keman nikpiaya 14 xiujmej peuak nitachichina. Nejon kichiuaya maj nikmachili ke nikatka kemej oksekin. Niknemiliaya: “Kemaj, nejua no ueli nitachichina. Tachichinaj akin uejueykejya, kinpiaskej ininmauan oso amo”.

Nikchiuaya miak tataman tekimej itech xolal kampa ninemia. Nimoijkuiloj itech Juventud Libre Alemana, se oloch kampa pouiaj telpochmej akin kitemouayaj tapaleuiskej uan tekiuanij kinpaleuiayaj uan ompa nikpiaya se ueyi tekit kemej tajkuilojkej. No nimoijkuiloj kampa tamachtiayaj keniuj se mokuikatis uan keniuj se kikuis kualtsitsin tajtolmej tein moixmati kemej poesía, uan no nimauiltiaya iniuan akin moajsiaj kemej nejua. Keman nikisak kaltamachtiloyan uan satepan ke nimomachtij keniuj nitekitis, nikajsik se tekit ompakauin kampa ninemia. Peuak okachi nikui teposmej tein ika nimopaleuiaya oso prótesis porin niknekia nikmachilis ke nikinpiaya nomauan kemej oksekin.

Se tonal, keman nikchixtoya tren tein nechuika kampa nitekiti, se takat motokij kampa niyetoya uan nechtajtanij ox nikneltokaya ke Dios ueliskia oksepa nechmakas nomauan. Niknemilij ke nejon amo ueliskia panos. Tein melauj niknekia oksepa nikinpias nomauan, sayoj ke amo nikneltokaya ke ueliskia mochiuas. Amo nitaneltokaya itech Dios uan senkis nikmatia ke Dios amo nemia. Yejua ika peuak niktemoj keniuj amo niknamikis nejon takat.

Seki tonalmej satepan, se siuat akin iuan nitekitia nechyoleuak maj nikinixmatiti ichankauan. Keman titayitoyaj café, itatuan peujkej ika tajtouaj Dios. Kitokaytiayaj Jiova. Ijkuak nikmatik ke Dios kipia se tokayit (Salmo 83:18). Nejua niknemilij: “Dios amo nemi, maski kitokaytiskej kemej yeski. Nikinnextilis ke mokajkayaujtokej”. Kemej niknemiliaya ke katka melauak tein nikneltokaya, nikselij nitajtos ika Biblia iniuan. Sayoj ke, nikmoujkaitak maj amo uelini nikinnextilis ke Dios amo nemi.

Ijkon kemej tikitstiyajkej tein achto kijtojka Biblia ke mochiuaskia, tein nikneltokaya mopatatiyajki. Nikitak ke miak taman tein Dios kijtojka ke mochiuaskia, seki tein miak xiujmej achto moijtojka ke panoskia, mochiujkajya. Se tonal, tikitakej tein axkan mochiujtok iuan tein achto moijtojka itech Mateo, capítulo 24; Lucas, capítulo 21 uan 2 Timoteo, capítulo 3. Ijkon kemej tein kimachilia se akin mokokoua kipaleuia tapajtijkej maj kimati toni kokolis kipia, no ijkon nochi tein kijtoua nejon capítulos nechpaleuij maj nikita ke tinemij “itech itamian tonalmej” * ijkon kemej kijtoua Biblia. Nejon semi nikmoujkaitak. Senkis moita ke mochiujtokya nejon tein moijtojka.

Senkis nikneltokak ke tein nimomachtijtoya katka tein melauak. Peuak nimotataujtia iuan Jiova uan nikauak tachichinalis, maski panouayaya majtakti xiuit ke nitachichinaya. Niksentokak nimomachtij Biblia se xiuit uan itech tonal 27 metsti abril xiuit 1986, ichtaka  nimoauij itech se tina porin itech nejon tonalmej kitsakuilijtoyaj tekit tein kichiuayaj itaixpantijkauan Jiova itech altepet Alemania oriental.

Kemej tekiuanij amo techkauayaj maj tikueyichiuakan Dios, amo timiakej timonechikouayaj itech kalmej kampa amo techitaskiaj. Yejua ika, amo miakej itaixpantijkauan Jiova nikinixmatia. Sayoj ke, se tonal tekiuanij nechkaujkej maj niyouj Alemania occidental, kampa tekiuanij amo kitsakuilijtoyaj totekiuj. Ompa, uelik niyajki itech uejueyi nechikolmej kampa nikinitak tel miakej nokniuan. Amo keman nikelkauas nejon.

Satepan keman kiuetsiltijkej tepamit ompa Berlín, tekiuanij kinkaujkej maj itaixpantijkauan Jiova kiueyichiuakan Dios. ¡Axkan kemaj amo teyi techtsakuiliayaok titaueyichiuaskej! Niknekia okachi nitanojnotsas ika Biblia, sayoj ke nimouia nitajtos iniuan akin amo nikinixmatia. Nikmachiliaya ke amo teyi nichiujkej porin amo nikpiaya nomauan uan porin miak tonalmej nipanok kampa kinyekpiaj akin kinpoloua teisa itech ininnakayo. Maski ijkon, itech xiuit 1992 nimochikauak nikteixmatiltis iTajtol Dios sesenta horas itech se metsti. Kuali nikpanok uan semi nechyolpaktij, yejua ika nikixtalij niksentokas okseki metsti uan ijkon nikchiuak eyi xiuit.

Nochipa nikelnamiki nejin tajtolmej tein moajsij itech Biblia: “¿Uan komo se tokniu taneltokakke mokokojtinemi, ijkuakon nejua no nikyolmachilijtinemi ne kokolisti?” (2 Corintios 11:29). Ueli nitanemilia uan nitajtoua, yejua ika nikchiua nochi tein niueli uan nikinpaleuia oksekin. Kemej amo nikinpia nomauan, ueli nikinajsikamati keniuj momachiliaj akin no kinpoloua se taman itech ininnakayo. Nikmati toni se kimachilia keman se kineki se kichiuas teisa uan amo se ueli. Yejua ika, niktemoua nikinyolchikauas nochin akin ijkon momachiliaj. Semi nechyolpaktia nikinpaleuis oksekin.

Tein melauj, kemansa tepitsin nimotayokoltia porin niknekiskia kuali niyetos kemej oksekin. Maski noselti ueli nikchiua miak taman, okachi niuejkaua uan okachi nimochikaua ke oksekin. Sayoj ke mojmostaj nikelnamiki nejin tajtolmej: “Itech nochi taman nikpia chikaualis itechkopa akin nechmaka chikaualis” (Filipenses 4:13, TNM). Jiova nochipa nechmaka chikaualis tein nechpaleuia maj nikchiua tein moneki mojmostaj. Yejuatsin nochipa nechpaleuiani uan nejua nochipa nikneki niktekitilis.

Jiova nechmakani nokalyetouanij, tein amo nikpiak keman nimoskaltijtoya uan keman katka nitelpoch. Nikpia se kuali nonamik akin itokay Elke. Semi tetasojta uan teiknelia. Uan no, tel miak millones itaixpantijkauan Jiova noyampa taltikpak mochiuanij nokniuan.

Semi nechyolseuia nikmatis ke Dios motenkaua kichiuas se xochital kampa kichiuas yankuik “nochi ten ongak”, uan no nomauan (Apocalipsis [Revelación] 21:5). Okachi nikajsikamati nejin tein Dios motenkaua keman nitanemilia itech tein Jesús kichiuak keman yetoya nikan taltikpak. Kinpajtij akin kinpolouaya teisa itech ininnakayo, hasta kipajtij se takat akin kitekilijkaj inakas (Mateo 12:13; Lucas 22:50, 51). Tein Jiova motenkaua uan tein kichiuak Jesús ika inepaleuil Dios senkis nechmatiltia ke amo uejkaua oksepa nikinpias nomauan.

Sayoj ke, tatiochiualis tein okachi ueyi tein nikseliani yejua nikixmatis Jiova. Mochiuani noPopaj, se akin kuali iuan nimouika, akin nechyolseuia uan akin nechyolchikaua. Nimomachilia ijkon kemej tekiuaj David, akin kijtoj: “Jiova yejuatsin nochikaualis [...] uan nechpaleuiani, yejua ika niyolpaki” (Salmo 28:7). Nikseliani tamachtilis tein melauak, uan amo keman nikauas. Maski amo nikinpia nomauan, nikselia ika nochi nochikaualis.