2 Timoteo 3:1-17
3 Sayoj ke moneki tikmatis ke itech tonalmej keman tatamitiya,* tein mochiujtos semi ouij yeski uan tamouilil.
2 Porin tel miakej sayoj yejuan motasojtaskej; semi kitemoskej motomintiskej, moueyichiuaskej ininselti, moueyimatiskej,* teuijuikaltiskej,* amo kintakamatiskej inintatuan, amo motasojkamatiskej uan tekauaskej,
3 amo kintasojtaskej ininchankauan, amo kinekiskej moyektenkauaskej iniuan oksekin, tetakajkayauiliskej, amo motsakuiliskej, kichiuaskej tein tel fiero, kiixtopeuaskej tein kuali,
4 kinchiuiliskej tein amo kuali inintasojikniuan uan amo takakiskej, senkis moueyimatiskej,* sayoj kitemoskej yejuan moyolpaktiskej uan amo Dios
5 uan kinextiskej ke semi taneltokaj,* sayoj ke ika tein kichiuaskej moitas ke amo melauak. Amo iniuan ximouika.
6 Iniuan moajsij takajkayauanij akin ika xolopijyot kalakij techan uan kintanejnektiaj siuamej akin amo chikaujkej. Nejon siuamej kinyolnotsa tajtakol uan mokauaj maj kintani tein yeski taman tein kinejnekij,
7 uan nochipa momachtijtokej sayoj ke amo keman kuali kiixmatij tamachtilis tein melauak.
8 Ijkon kemej Janes uan Jambres kiixnamikkej Moisés, yejuan no kisentokaj kiixnamikij tamachtilis tein melauak. Inintanemilil senkis uejueliujtok uan Dios kinixtopeua porin kiixnamikij tein tikneltokaj.
9 Sayoj ke, amo kuali kisas tein kichiuaskej, porin nochin kiitaskej ke amo kuatamatij, ijkon kemej kinpanok nejon ome takamej.
10 Sayoj ke tejua kuali tikchiuani tein nitamachtia, tikmati keniuj ninemi, tein nikixtalijtok nikchiuas, keniuj nitakuaujtamati, keniuj amo niyolijsiui, keniuj nitetasojta uan nitaxikoua,
11 uan tikmati keniuj nechtajyouiltijkej uan tein nikijyouij, kemej tein nechpanok ompa Antioquía, Iconio uan Listra. Nikxikoj nochi nejon, uan toTekotsin nochipa nechmakixtij.
12 Tein melauj, nochin akin kinekiskej kiueyichiuaskej Dios kemej itatojtokakauan Cristo Jesús, no kintajyouiltiskej.
13 Sayoj ke akin amo yolkualmej uan takajkayauanij okachi kichiuaskej tein amo kuali, takajkayauaskej uan kinkajkayauaskej.
14 Sayoj ke tejua, xiksentoka xikchiua tein mitsmachtijkej uan mitspaleuijkej xikneltoka, porin tikmati akonimej mitsmachtijkej.
15 No xikelnamiki ke desde ke tipiliok tikatka* tikixmati iTajkuilolamatsin Dios tein uelis mitspaleuis ximochiua xitamatkej para timakisas porin titakuaujtamati iuan Cristo Jesús.
16 Nochi tein ijkuiliujtok itech Tajkuilolamatsin ualeua imako Dios, uan tapaleuia para titamachtiskej, para technextilis tein amo kuali yetok,* para se kiyektalis nochi uan para techpaleuis maj tiktakamatikan itanauatiluan Dios,
17 ijkon akin kitekitilia Dios kimatis keniuj kuali kichiuas tein yeski uan kipias nochi tein kipaleuis maj kichiua nochi tein kuali.
Tajtolmelaualismej
^ Oso “itamian tonalmej”.
^ Oso “moueyinekiskej”.
^ Oso “tetejtelchiuaskej”.
^ Oso “moueyinekiskej”.
^ Oso “kiueyichiuaj Dios ika nochi ininyolo”.
^ Oso “desde ke tiyolik”.
^ Oso “techtakaualtis”.
