Hechos 7:1-60
7 Sayoj ke tayekankatiopixkat kitajtanij:* “¿Melauj nejin tein kijtouaj?”.
2 Esteban tanankilij: “Nokniuan uan akin nantechixyekanaj, xinechkakikan. Toueyi Tajtsin Dios monextij iixpan touejkaujtat Abrahán keman yetoya Mesopotamia, achto ke mokaltaliskia ompa Harán,
3 uan kiluij: ‘Xikaua moaltepeuj, xikinkaua mochankauan uan xiouj itech altepet kampa nejua nimitstanextilis’.
4 Uan yejua kisak de Caldea uan mokaltalito Harán. Uan keman momikilijkaya itat, Dios kichiuak maj kisa de ompa uan maj mokaltaliki itech nejin tal kampa namejuan axkan nanemij.
5 Sayoj ke amo kitalmakak, amo kimakak nion tepitsin tal kampa kitalis se imets. Sayoj ke motenkauak kimakas yejua uan satepan ikoneuan, maski ayamo kipiaya nion se ikonetsin.
6 Uan no, Dios kiluij ke ikoneuan yeskiaj analtekos itech se tal tein amo ininaxka uan ke akin ompa nemiskiaj semi chikauak kintekitiltiskiaj uan kintajyouiltiskiaj 400 xiujmej.
7 Dios kijtoj: ‘Uan nejua niktatsakuiltis altepet kampa kinpiaskej kemej takeualmej’. Uan no kijtoj: ‘Satepan, yejuan kisaskej uan nechueyichiuaskej nikan’.
8 ”Dios no motenkauak iuan Abrahán ke yejua uan nochin iokichpipiluan kintekiskiaj,* uan Abrahán mochiuako itat Isaac uan chikueyi tonal satepan ke yolik, kitekik. Isaac mochiuako itat* Jacob, uan Jacob mochiuako inintat 12 touejkaujtatuan.
9 Uan touejkaujtatuan kitauelitakej José uan kinamakakej Egipto. Sayoj ke Dios iuan yetoya,
10 uan kipaleuij itech nochi tein kijyouij uan kichiuak maj tamatkej uan maj faraón,* akin tekiuajtia Egipto, kuali kiitani. Uan tekiuaj kiixtalij maj taixyekana Egipto uan ichan.
11 Sayoj ke tatasojtik itech nochi Egipto uan Canaán, kemaj, semi tajyouijkej, uan touejkaujtatuan amo kipiayaj nion teyi tein kikuaskej.
12 Sayoj ke Jacob kimatik ke onkaya takual Egipto uan ompa kintitanik touejkaujtatuan.
13 Keman oksepa yajkej, José kiniluij iikniuan akoni katka, uan akin tekiuajtia Egipto kimatik ke José kinpiaya ichankauan.
14 Yejua ika José tanauatij maj itat, Jacob, uan nochin ichankauan kisakan Canaán uan maj yakan Egipto: nochinya katkaj 75.
15 Yejua ika Jacob temok Egipto uan ompa momikilij, uan no touejkaujtatuan.
16 Kinuikakej Siquem uan kintalijkej itech miketekoch tein Abrahán kinkouilijka ikoneuan Hamor ompa Siquem.
17 ”Uan keman ajsitiayaya tonal keman mochiuaskia tein Dios motenkaujka iuan Abrahán, semi momiakilijkej israelitas ompa Egipto
18 hasta ke se tekiuaj akin amo kiixmatia José peuak tekiuajti ompa Egipto.
19 Nejin tekiuaj kinkajkayauak touejkaujtatuan uan tanauatij maj kinkauakan ininkoneuan para maj mikikan.
20 Nejon tonalmej, yolik Moisés, akin senkis kuakualtsin katka.* Uan itatuan kiiskaltijkej ininchan eyi metsti.
21 Sayoj ke, keman kikaujkej, isiuapil akin tekiuajtia Egipto kiajsik uan kiiskaltij kemej ikoneuj.
22 Yejua ika Moisés kimachtijkej nochi tein kimatiaj ompa Egipto. Tein melauj kinextiaya ke tamattoya itech nochi tein kijtouaya uan tein kichiuaya.
23 ”Uan keman kiajxitij 40 xiujmej, kinemilij kinkalpanotiuj israelitas, akin katkaj iikniuan.
24 Keman kiitak ke se takat kayot Egipto kitajyouiltijtoya se israelita, kipaleuij uan kimiktij nejon takat.
25 Yejua kinemilij ke iikniuan kiajsikamatiskiaj ke Dios kinmakixtijtoya itechkopa, sayoj ke yejuan amo kiajsikamatkej.
26 Mostika yajki kampa sekin moteuijtoyaj uan para maj amo moteuikanok, kiniluij: ‘Takamej, namejuan naniknimej. ¿Keyej namoteuijtokej?’.
27 Sayoj ke akin tateuijtoya kitopeuak Moisés uan kiluij: ‘¿Akoni mitsixtalij kemej totaixyekankauj uan tojuez?
28 ¿Tikneki tinechmiktis kemej yalua tikmiktij takat akin nikan kayot?’.
29 Keman kikakik nejin, Moisés choloj uan nemito kemej analtekoj itech tal tein poui Madián, kampa kinpiak ome ipiluan.
30 ”Uan 40 xiujmej satepan, Moisés yetoya taluakyan itech tepet Sinaí uan se ángel monextij iixpan itech kouit tein uitsyoj tein xotatoya.
31 Yejua kimojkaitak nejon. Keman motokij para okachi kuali kiitas, kikakik ke Jehová* kijtoj:
32 ‘Nejua ininDios mouejkaujtatuan, iDios Abrahán, iDios Isaac uan iDios Jacob’. Moisés peuak uiuiyoka uan amo moixeuij kisentokas tachixtos.
33 Jehová* kiluij: ‘Ximokixtili motekakuan porin tiijkatok itech tal tein sayoj nejua noaxka.
34 Yekmelauj nikitani keniuj kintajyouiltiaj nokoneuan israelitas ompa Egipto, uan nikakini keniuj tayokolchokaj uan nitemok nikinmakixtiko. Axkan xiuiki, nimitstitaniti Egipto’.
35 Nejin Moisés kiixtopeujkaj keman kijtojkej: ‘¿Akoni mitsixtalij kemej totaixyekankauj uan tojuez?’. Sayoj ke, Dios itechkopa ángel tein monextij iixpan itech kouit tein uitsyoj kiluij Moisés maj kiixyekana uan maj kimakixti ixolal.
36 Nejin takat kinkixtij ika uejueyi taman tein se kimojkaita uan milagros ompa Egipto, itech mar Rojo uan itech taluakyan 40 xiujmej.
37 ”Yejua nejin Moisés akin kiniluij israelitas: ‘Dios kiixtalis semej namokniuan maj mochiua tanauatijkej* kemej nejua para maj namechpaleui’.
38 Yejua akin yetoya iniuan israelitas itech taluakyan, akin yetoya iuan ángel tein kinojnotsak itech tepet Sinaí uan iniuan touejkaujtatuan. Yejua kikakik itajtoluan Dios tein kemej yeskia yoltokej uan techmatiltij.
39 Touejkaujtatuan amo kinekkej kitakamatiskej, ta kiixtopeujkej uan kinekiaj kichiuaskej kemej kichiuayaj akin kayomej Egipto
40 uan kiluijkej Aarón: ‘Xitechinchijchiuili tatadiosmej* tein techyekantiaskej. Porin amo tikmatij toni kipanok nejin Moisés, akin techkixtij Egipto’.
41 Yejua ika itech nejon tonalmej kichijchiujkej se tatadios* tein tamatia kemej se kuakuejkonet, kimaktilijkej tapialmej uan peujkej moyolpaktiaj ika nejon tein kichiujkaj.
42 Yejua ika Dios kinsenkauak uan kikauak maj kiueyichiuanij tonaltsin, metsti uan sitalimej tein onkakej ne iluikak, ijkon kemej ijkuiliujtok itech ininamatajkuilol Tanauatianij: ‘Namejuan israelitas, ¿melauj ke amo nejua nanechmaktilijkej tapialmej tein nankinmiktijkej uan okseki taman itech 40 xiujmej ompa taluakyan?
43 Nankiuikatinenkej itakenkal Moloc uan tatadios* sitalin tein monotsa Refán, nejin tatadiosmej tein nankinchijchiujkej para nankinueyichiuaskej. Yejua ika, nikchiuas ximoajsikan temako okachi uejka ke Babilonia’.
44 ”Itech taluakyan, touejkaujtatuan kipiayaj takenkal tein kiixnextiaya ke Dios yetoya iniuan, ijkon kemej yejua kinauatij uan kinextilij Moisés maj kichijchiua.
45 Satepan, ininkoneuan touejkaujtatuan kikuikej nejin takenkal uan kiuikakej iuan Josué keman moaxkatilijtiayaj talmej kampa nemiaj akin Dios kinkixtiaya. Ompa mokauak hasta keman nemik David.
46 Yejua semi kiyolpaktij Dios uan kijtoj ke kinekia kichijchiuilis se kali iDios Jacob.
47 Sayoj ke Salomón kichijchiuilij se kali.
48 Sayoj ke Dios akin okachi ueyichiujkej amo nemi itech kalmej tein kichijchiuaj nikan taltikpak. Ijkon kemej kijtoua tanauatijkej:
49 ‘Jehová* kijtoua: Iluikak, yejua noueyi silla, uan taltikpak yejua nometstapech. ¿Toni taman kali nanechchijchiuiliskej? ¿Oso kani yetok kampa nimoseuis?
50 ¿Melauj ke nejua nikchijchiuak nochi nejin?’.
51 ”Takamej akin nanyoltakuaujkej, namonakastsakuaj uan amo nankinekij nankipataskej namotanemilil, namejuan nochipa nankiixnamiktokej ichikaualis Dios. Nankichiuaj tein kichiujkej namouejkaujtatuan.
52 Namouejkaujtatuan kintajyouiltijkej nochin tanauatianij. Kemaj, yejuan kinmiktijkej akin achto kitematiltijkej ke ualaskia akin yolmelauak, akin namejuan nankitemaktijkej uan nankimiktijkej.
53 Inintechkopa ángeles, Dios namechmakak iTanauatil Moisés, sayoj ke amo nankitakamattokej”.
54 Keman kikakkej nejin, yejuan semi kualankej, kisenixitayaj uan peujkej tananatskaj.
55 Sayoj ke Dios kimakak ichikaualis, senajkotachiak ne iluikak uan kiitak ikualtsinyo uan no kiitak Jesús ijkatoya iyekmakopa Dios,
56 uan kijtoj: “¡Xikitakan! Nikita ke ne iluikak tatapotok uan akin yolik kemej takat* ijkatok iyekmakopa Dios”.
57 Uan yejuan semi chikauak tsajtsikej, monakastsajtsakkej uan nochin ipan yajkej.
58 Satepan ke kikixtijkej den ueyi xolal, peujkej kitetemaj.* Ompa yetoya se okichpil akin monotsaya Saulo, uan akin kitakajkayauilijkej Esteban kikauilijteujkej ininpantaken.
59 Keman kitetentoyaj,* Esteban motataujtij: “NoTekotsin Jesús, nimitsmaktilia nonemilis”.*
60 Uan motankuaketsak uan chikauak kijtoj: “Jehová* amo xikintatsakuilti porin kichiujkej nejin tajtakol”. Satepan ke kijtoj nejin, momikilij.*
Tajtolmelaualismej
^ Oso “kitajtoltij”.
^ Oso “kinchiuiliskiaj circuncisión”. Xikonita circuncisión.
^ Oso xa “no ijkon kichiuak iuan”.
^ Ijkon kintokaytiayaj akin tekiuajtiaj Egipto.
^ Oso “kuakualtsin katka iixpan Dios”.
^ Xikonita tanauatijkej.
^ Oso “tiotsitsin”.
^ Oso “tiotsin”.
^ Oso “tiotsin”.
^ Xikonita akin yolik kemej takat.
^ Oso “kitepoxoniaj”, “kimojmotaj ika tet”.
^ Oso “kitepoxonijtoyaj”, “kimojmottoyaj ika tet”.
^ Tajtol griego, pnéuma. Xikonita chikaualis.
^ Itech griego, “kochik”.
