Hechos 10:1-48
10 Ompa Cesarea yetoya se takat akin monotsaya Cornelio, akin kinixyekanaya 100 soldados akin ualeuayaj Italia.
2 Nejon takat semi taneltokaya uan kimojkatokaya Dios iniuan nochin akin nemiaj ichan. Semi kinpaleuiaya pobres uan nochipa kitatautiaya Dios.
3 Kemej eyi hora tiotak,* kiyekitak* keniuj se iángel Dios monextij uan kalakik kampa yejua yetoya uan kiluij: “¡Cornelio!”.
4 Cornelio kisenitak, mojkakalakik uan kitajtanij:* “¿Toni panoua noTekotsin?”. Yejua kiluij: “Dios kikaki monetataujtiluan uan kiita keniuj tikinpaleuia pobres.
5 Yejua ika xikintitani seki takamej maj yakan Jope maj kikuitij se takat akin monotsa Simón, akin moixmati kemej Pedro.
6 Mokaujtok ichan Simón, se akin tekiti ika tapialkuetax uan chanchiua ueyiatenoj”.
7 Niman keman ángel akin kinojnotsak yajki, kinnotsak ome itekitikauan uan se soldado akin semi taneltokaya,
8 kintapouij nochi uan kintitanik maj yakan Jope.
9 Mostika, keman yejuan ojtokatoyaj uan ajsitiayajya ueyi xolal, Pedro tejkok* kalkuako, kichiuato netataujtil kemej nepantaj.*
10 Sayoj ke semi mayanak uan takuasnekik. Keman kichijchiujtoyaj takual, sepasan peuak tajtachia
11 uan kiitak ke tatapotoya ne iluikak uan ke ualpantemotiualaya se taman tein tamatia kemej se ueyi linojtasal, tein naujkan ilpitoya.*
12 Itech nejon ueyi tasal yetoyaj nochi tataman tapialmej tein kipiaj naui ininmetsuan uan tapialmej tein moxoxolatsaj uan totomej.
13 Uan kikakik ke kiluijkej: “¡Ximoketsa Pedro, xitamikti uan xitamajseua!”.
14 Sayoj ke Pedro tanankilij: “Amo noTekotsin, amo ueli nikchiua nejon. Amo keman nikuajtok teisa tein amo chipauak oso tein pitsotik”.
15 Oksepa kikakik ke kiluijkej: “Amo xikijtook ke pitsotik tein Dios kichipauakya”.
16 Uan expa kikakik nejon, uan nejon ueyi tasal nimantsin oksepa pankisak iluikak.
17 Pedro amo kimatia toni kichiuas uan kisentokaya kinemiliaya toni kijtosnekia nejon tein kiitak. Uan keman kinemilijtoya nejon, takamej akin Cornelio kintitanik tajtankaj kani yetoya ichan Simón uan yetoyajya kaltenoj.
18 Tanotskej uan tajtankej ox ompa mokauaya Simón, akin moixmatia kemej Pedro.
19 Keman Pedro kisentokaya tanemilijtoyaok itech tein kiitaka, Dios kiluij ika ichikaualis: “¡Xikita! Eyi takamej mitstemouaj.
20 Yejua ika ximoketsa, xitemo uan amo xiknenemilijto ox tias iniuan, porin nejua nikintitanik”.
21 Pedro temok kampa yetoyaj nejon takamej uan kijtoj: “Nikan nietok. Nejua nanechtemouaj. ¿Keyej nanualajkej?”.
22 Yejuan kijtojkej: “Cornelio yejua se akin kinixyekana 100 soldados, se takat yolmelauak akin kimojkatoka Dios uan nochin judíos kuali ika tajtouaj. Itechkopa se ángel, Dios kinauatij maj mitsyoleua ichan uan maj kikaki tein tejua tikijtos”.
23 Yejua ika, Pedro kinyoleuak maj kalakikan uan ompa mokaujkej nejon youak.
Mostika yajki iniuan, uan seki tokniuan akin nemiaj Jope iuan yajkej.
24 Se tonal satepan, ajsik Cesarea. Cornelio kinchixtoya,* uan kinsentilijka ichankauan uan akin semi kuali iniuan mouikaya.
25 Keman Pedro kalakik kalijtik, Cornelio kinamikito, motankuaketsak uan moixpiloj iixpan.*
26 Sayoj ke Pedro kiajokuik uan kiluij: “Ximoketsa. Nejua no nitakat ijkon kemej tejua”.
27 Keman iuan tajtojtoya, kalakik uan kiitak ke miakej ompa mosentilijkaj.
28 Yejua kiniluij: “Namejuan kuali nankimatij ke tanauatil kijtoua ke amo kuali yetok maj se judío mouika iuan se akin amo judío nion maj iuan tajto. Sayoj ke Dios nechnextilij maj amo akin nikita ke amo chipauak oso ke pitsotik.
29 Yejua ika keman nechtemotoj nimantsin niualaj uan amo nikijtoj ke amo niueliskia. Axkan xinechiluikan, ¿keyej nanechnotskej?”.
30 Cornelio kijtoj: “Kichiuakya naui tonal, nikchiujtoya netataujtil nochan nejin hora, kemej eyi hora tiotak,* uan sepasan se takat akin kipiaya itasal tein pepetakaya* monextij noixpan
31 uan nechiluij: ‘Cornelio, Dios kikakik monetataujtil, uan kielnamiktok keniuj tikinpaleuia pobres.
32 Yejua ika, xitatitani ompa Jope maj kinotsatij Simón, akin moixmati kemej Pedro. Yejua mokaujtok ichan Simón, se akin tekiti ika tapialkuetax, uan chanchiua ueyiatenoj’.
33 Nimantsin nitanauatij maj mitstemotij, uan tasojkamatik tiualaj. Axkan tinochin nikan tietokej iixpan Dios para tikakiskej nochi tein Jehová* mitsnauatij xitechilui”.
34 Keman Pedro kikakik nejon, peuak kijtoua: “Axkan yekmelauj nikajsikamati ke Dios amo techichikotasojta,*
35 ta itech tein yeski altepet, akin kimojkatoka uan kichiua tein kuali yetok, kiyolpaktia.
36 Yejua kinmatiltij israelitas kuali tanauatilmej* tein kinextia keniuj kuali se mouikas iuan Dios itechkopa Jesucristo. Yejua ininTeko nochin.
37 Namejuan nankiixmatij toni ika motajtouaya itech nochin tal tein poui Judea, se taman tein peuak ompa Galilea, satepan ke Juan kinmatiltijtinemik nochin ke monekia moauiskej:
38 ika motajtouaya Jesús akin kayot Nazaret. Dios kijitak* ika ichikaualis uan kichikauak, uan ijkon yajtinemik noyampa* kichiujtinemik tein kuali uan kinpajtijtinemik nochin akin Amokuali kintajyouiltiaya, porin Dios iuan yetoya.
39 Tejuan tikitakej nochi tein kichiuak itech ininaltepeuj judíos uan ompa Jerusalén, sayoj ke yejuan kimiktijkej keman kipilojkej itech se kouit.
40 Eyi tonal satepan Dios kichiuak maj oksepa nemi* uan kikauak maj monexti,
41 amo ininixpan nochin, ta toixpan, akin titamajseujkej uan titatayikej iuan satepan ke oksepa nemik.* Dios achto techijitak* maj tikitakan uan maj ika titajtokan.
42 Yejua no technauatij maj titanojnotsakan uan maj kuali* tikteixmatiltikan ke yejua akin Dios kiixtalij kemej ininjuez akin yoltokej uan akin momikilijkejya.
43 Nochin tanauatianij* kiteixmatiltiaj uan kijtouaj ke nochin akin iuan takuaujtamatij kintapojpoluiliaj inintajtakoluan itokaykopa”.
44 Keman Pedro kijtojtoyaok nejin, Dios kinmakak ichikaualis nochin akin ompa takaktoyaj.
45 Uan taneltokanij judíos* akin iuan yajkaj Pedro semi kimojkaitayaj, porin Dios no kintayokolijtoya ichikaualis akin amo judíos,
46 porin yejuan kinkakiaj ke tajtouayaj itech tataman tajtolmej uan kiueyitaliayaj Dios. Satepan, Pedro kijtoj:
47 “Dios kinmakak ichikaualis yejuan, ijkon kemej tejuan. ¿Akoni uelis kijtos maj amo kikuikan at para moauiskej?”.
48 Yejua tanauatij maj kinauianij itokaykopa Jesucristo. Uan kiluijkej maj iniuan mokauani seki tonalmej.
Tajtolmelaualismej
^ Itech griego, “chiknauitika hora”.
^ Oso “kiyekitak keman majya takochitstoya”.
^ Oso “kitajtoltij”.
^ Oso “pankisak”.
^ Itech griego, “chikuasentika hora”.
^ Oso “tsikaujtoya”.
^ Oso “kinchatoya”.
^ Oso “kitakachiuak”.
^ Itech griego, “chiknauitika hora”.
^ Oso “mimilikaya”.
^ Oso “amo techichikouia”.
^ Oso “tajtolmej”.
^ Oso “kiixpejpenak”.
^ Oso “nouian”.
^ Itech griego, “kiajokuik”.
^ Itech griego, “moajokuik”.
^ Oso “techixpejpenak”.
^ Oso “ajsitok”.
^ Xikonita tanauatijkej.
^ Oso “tokniuan akin kintekkajya”. Xikonita circuncisión.
