Kema se tlakatl uan se siuatl mosenkauaj, kipiaj kuesoli pampa amo sanse tlalnamikij, amo sanse kiniskaltijkej o pampa amo sanse tlen moiljuiaj. Nojkia kipiasej kuesoli kema kinpanos tlen amo moiljuiyayaj tlaj panoskia.

Biblia kiijtoua kema tijpias kuesoli, moneki tijsenkauas (Mateo 5:23, 24). Tlaj tijchiuas tlen Biblia tetlajtolmaka, mitspaleuis kuali tijsenkauas kuesoli.

TLEN KIIJTOUA BIBLIA: “Onka tonali para tikama[nal]tis” (Eclesiastés 3:1, 7). Kema inkipiasej kuesoli nochipa ximoiljuikaj kenijkatsa uelis inkisenkauasej. Xikiljui mosiua o moueue kenijkatsa tijyolmati uan kenijkatsa tikita nopa kuesoli, nochipa xikiljui tlen melauak (Efesios 4:25). Maske tikualantos, amo xijtlaijiljui. Tlaj inmonankilisej ika kuali tlajtoli, amo inmokualanisej (Proverbios 15:4; 26:20).

Tlaj amo mitspaktis tlen moiljuia mosiua o moueue, amo xikualani, nochipa xijnexti tikiknelia uan tijtlepanita (Colosenses 4:6). Xijchiua kampeka nimantsi tijsenkauas nopa kuesoli, uan amo ximoiljui ayokmo tijnojnotsas (Efesios 4:26).

TLEN UELISKIA TIJCHIUAS:

• Xikiljui mosiua o moueue kema kualtiaskia inmonojnotsasej

• Kema mosiua o moueue mitsnojnotstos, amo xijnankilijtiuetsi. Moneki tikamanaltis kema kinamikis

TLEN KIIJTOUA BIBLIA: “Ximoiknelikaj se ika seyok [...]. Uan xikintlepanitakaj sekinok” (Romanos 12:10). Kuali xijtlakakili mosiua o moueue uan xijchiua kampeka tijkuamachilis tlen kiyolmati, ‘xijpia sanse moyolo iuaya’ uan “ximoiknochiua” o amo ximoueyimati (1 Pedro 3:8; Santiago 1:19). Amo san xitlachiua tijtlakakilijtok mosiua o moueue. Tlaj timotekiuijtok, xijkaua tlen tijchiua uan kuali xijtlakakili o xikiljui tlaj ueliskia inmonojnotsasej teipa. Tlaj tikitas mosiua o moueue kej se mouampo uan amo kej se mokualankaitaka, mitspaleuis ‘amo tikualanis nimantsi’ (Eclesiastés 7:9).

TLEN UELISKIA TIJCHIUAS:

• Xijtlakakili mosiua o moueue maske amo mitspaktis tlen mitsiljuis

• Xijkuamachili tlen mitsiljuia. Xikita kenijkatsa nesi iixayak uan kenijkatsa kakisti tlen kiijtoua

TLEN KIIJTOUA BIBLIA: “Tlen tekitij kuali kiselisej inintlaxtlauil. Pero tlen san kamatij uan axkichiuaj ininteki mokauasej teikneltsitsij” (Proverbios 14:23). Amo san xikijtokaj kenijkatsa inkisenkauasej se kuesoli, nojkia moneki inkichiuasej tlen inkiijtouaj. Maske ouij inkimatisej, tlauel inmechpaleuis (Proverbios 10:4). Tlaj inmopaleuisej ‘más inkitlanisej’ pampa inkisenkauasej nopa kuesoli (Eclesiastés 4:9).

TLEN UELISKIA TIJCHIUAS:

• Ximoiljui tlake uelis inkichiuasej uan kiampa inkisenkauasej nopa kuesoli

• Kej panotias tonali, xikitakaj kenijkatsa mosenkajtia inmokuesol