Jehová kichijtok ma tikinpiakaj tochampoyouaj, uan kinnauatia tetajmej ma kinmokuitlauikaj ininkoneuaj (Colosenses 3:20). Tlaj ta titetata, moneki tikinmachtis ma kiiknelikaj Jehová uan kej nopa kema moskaltisej kuali monejnemiltisej (2 Timoteo 1:5; 3:15). Nojkia moneki tijmatis tlake kiyolmatij mokoneuaj, uan moneki kiitasej tlen ta tijchiua. Yeka, tlaj tijneki kuali tikinmachtis ika Biblia, achtoui moneki ta kuali timomachtis (Salmo 40:8).

TLEN KIIJTOUA BIBLIA: ‘Xijtlakakilikaj kuali kema seyok inmechkamanaljuia. Uan xikinkamanaljuikaj ika yamaktsi’ (Santiago 1:19). Tlaj tijneki mokoneuaj ma monojnotsakaj mouaya, moneki tijnextis nelia tijneki tikintlakakilis. Xijchiua kuali ma kiyolmatikaj, kiampa kinekisej mitsiljuisej tlen kinpanotok (Santiago 3:18). Tlaj kiitasej san tikualanis o tikinajuas, amo kinekisej mitsiljuisej tlen nelnelia kinpano. Xijpia moyolo uan nochipa xikiniljui tikiniknelia (Mateo 3:17; 1 Corintios 8:1).

TLEN UELISKIA TIJCHIUAS:

• Xikintlakakili mokoneuaj kema kinekisej mitsiljuisej tlen kinpano

• Nochipa ximonojnotsa ininuaya, amo san kema kipiasej kuesoli

TLEN KIIJTOUA BIBLIA: “Se tlakatl tlen kitlakakilia tlamachtili kipantis tlen kuali” (Proverbios 16:20). Tlaj tijneki tijmatis tlake nelnelia kiyolmatij, amo san xikinnojnotsa, pampa kemantika telpokamej amo kiijtouaj tlen melauak o amo moiljuiaj kuali tlen kiijtouaj. “Nelia se uiuiyotl uan se pinaualistli intla titlanankilis kema nojua aya tijkaktok nochi tlen kichiuaj kampeka para mitsiljuisej.” (Proverbios 18:13.) Yeka, amo nima xikualani ininuaya (Proverbios 19:11).

TLEN UELISKIA TIJCHIUAS:

• Xijkaua mokone ma mitsiljui nochi tlen kiyolmati uan amo xikualani

• Xikilnamiki kenijkatsa tijyolmatiyaya uan tlake tijpatiitayaya kema tieliyaya kej ya

TLEN KIIJTOUA BIBLIA: “Tinotelpoka, xijtlakakili tlen motata uan monana mitsmachtiaj, uan amo xijuejkamajkaua inintlajtol” (Proverbios 1:8). Jehová kinkajtok tetajmej ma kinnauatikaj ininkoneuaj. Uan moneki kinmachtisej ma tlatlepanitakaj uan ma tlaneltokakaj (Efesios 6:1-3). Konemej kiitaj kema inintatauaj amo “[kipiaj] sanse inintlalnamikilis” (1 Corintios 1:10). Yeka, tlaj amo mitspaktis tlen kichiuas mosiua o moueue, amo ximokualanikaj kema inmechtlachilijtosej inmokoneuaj, pampa nopa ueliskia kichiuas ayokmo ma inmechtlepanitakaj.

TLEN UELISKIA TIJCHIUAS:

• Ximoiljuikaj kenijkatsa inkintlalnamiktisej inmokoneuaj

• Tlaj amo sanse inmoiljuiaj kenijkatsa inkinmachtisej inmokoneuaj, xijchiua kampeka tijkuamachilis kenke mosiua o moueue kej nopa moiljuia

TLEN KIIJTOUA BIBLIA: ‘Xijnextili mokone ma yaui ipan nopa ojtli tlen toTeko kisenkauilijtok’ (Proverbios 22:6). Tlaj tijneki kuali tikiniskaltis mokoneuaj, amo san kemantika xikinmachti. Moneki timoiljuis kenijkatsa uelis tikintlalnamiktis (Salmo 127:4; Proverbios 29:17). Amo xikintlatsakuilti kema tikintlalnamiktis, xikinpaleui ma kikuamachilikaj kenke tikiniljuia amo ma kichiuakaj se tlenijki (Proverbios 28:7). Nojkia xikinpaleui ma kinpakti momachtisej Biblia uan ma kimatikaj tlen tetlajtolmaka (Salmo 1:2). Kiampa kipiasej kuali inintlalnamikilis (Hebreos 5:14).

TLEN UELISKIA TIJCHIUAS:

• Xikinmachti ma kineltokakaj nelia itstok toTeotsij uan uelis motemachisej ipan ya

• Xikinpaleui ma kimatikaj kenijkatsa amo kisokiuisej inintlalnamikilis ika tlen nesi ipan Internet. Xikinnextili ma momanauikaj tlen katli kinchiualtiaj konemej ma motekakaj ininuaya