Moneki tijpiasej tomij uan kej nopa uelis tikinpanoltisej tochampoyouaj (Proverbios 30:8). Biblia kiijtoua nopa tomij “nelia tepaleuia ipan miak tlamantli” (Eclesiastés 7:12). Maske kemantika ouij inkiijtosej kenijkatsa kinamiki inkitekiuisej tomij, amo xijkauakaj ma kichiua ximokualanikaj (Efesios 4:32). Moneki ximotemachikaj uan sansejko ximoiljuikaj kenijkatsa inkitekiuisej inmotomij.

TLEN KIIJTOUA BIBLIA: “Intla se tlen inmojuantij kineki kichiuas se ueyi kali, uajka achtoui moseuis uan kipouas keski tomij monekis para kimatis intla kiaxilia” (Lucas 14:28). Sansejko xikijtokaj kenijkatsa inkitekiuisej inmotomij (Amós 3:3). Xikitakaj tlake moneki inkikouasej uan keski tomij monekis inkitekiuisej (Proverbios 31:16). Maske ueliskia inkikouasej se tlenijki, amo kiijtosneki moneki inkikouasej. Xijchiuakaj kampeka amo intetlauikilisej, san xijtekiuikaj tomij tlen inkipiaj (Proverbios 21:5; 22:7).

TLEN UELISKIA TIJCHIUAS:

• Tlaj sejse mestli mokauas se kentsi inmotomij, ximoiljuikaj kenijkatsa inkitekiuisej

• Tlaj amo inmechaxilia, xikitakaj tlake amo moneki inkikouasej. Uelis intlakualchiuasej inmochaj, kiampa amo monekis inkikouasej

TLEN KIIJTOUA BIBLIA: Xikijto tlen melauak “iixpa toTeko uan ininixpa nochi tlakamej” (2 Corintios 8:21). Xikiljui mosiua o moueue keski nelnelia mitstlaxtlauiaj uan keski tomij tijtekiuia.

Nochipa xikiljui mosiua o moueue kema monekis tijkouas se tlenijki (Proverbios 13:10). Tlaj nochipa inmoiljuisej kenijkatsa kinamiki inkitekiuisej inmotomij, inmechpaleuis kuali xiitstokaj. Amo ximoiljui tlen mitstlaxtlauiaj san ta moaxka, nojkia ininaxka mochampoyouaj (1 Timoteo 5:8).

TLEN UELISKIA TIJCHIUAS:

• Xitlajtlani mosiua o moueue keski tomij uelis tijtekiuis kema tiitstos moselti

• Nochipa ximoiljuikaj kenijkatsa kinamiki inkitekiuisej inmotomij, amo kema ayokmo inkipiaj