ဆေးခန်းပြရတာ၊ ဆေးရုံတက်ရတာက တကယ့်ကို စိတ်ဖိစီးမှု ဖြစ်စေနိုင်တယ်။ မာရီဘယ်လ်ရဲ့ အတွေ့အကြုံအရ သူငယ်ချင်းတစ်ယောက်၊ ဆွေမျိုးတစ်ယောက်ကြောင့် အကူအညီဖြစ်နိုင်တယ်။ ချစ်ရသူတစ်ဦးကို ဘယ်လို အကူအညီမျိုး ပေးနိုင်သလဲ။

ဆရာဝန်မပြခင်။ ရောဂါလက္ခဏာတွေ၊ မှီဝဲနေတဲ့ဆေးဝါးတွေ၊ ဖြည့်စွက်စာတွေကို စာရင်းပြုရာမှာ သူ့ကို ကူညီပေးပါ။ ဆရာဝန်ကို မေးချင်တဲ့ဘယ်မေးခွန်းကိုမဆို စာရင်းပြုထားပါ။ ရောဂါနဲ့ဆိုင်တဲ့ အသေးစိတ်အချက်အလက်တွေ ဒါမှမဟုတ် အဲဒီလိုရောဂါမျိုး မိသားစုမှာဖြစ်ခဲ့ဖူးသလားဆိုတာ သင့်ရဲ့မိတ်ဆွေ ဆန်းစစ်နိုင်အောင် ကူညီပေးပါ။ ဆရာဝန်က အဲဒီအချက်အလက်တွေသိပြီးသား ဒါမှမဟုတ် သူ့ဘက်ကမေးလာမယ်လို့ မယူမှတ်ပါနဲ့။

ဆရာဝန်ပြတဲ့အခါ။ သင်နဲ့ လူနာဟာ ဆရာဝန်ရဲ့ရှင်းပြချက်အားလုံးကို နားလည်ကြောင်း သေချာစေပါ။ မေးခွန်းတွေမေးပါ၊ ဒါပေမဲ့ တစ်ယူသန်ပြောဆိုခြင်းကို ရှောင်ပါ။ မေးတာ၊ ဖြေတာတွေကို လူနာကို လုပ်ခွင့်ပေးပါ။ အာရုံစိုက်နားထောင်ပြီး ဂရုတစိုက် မှတ်သားပါ။ ဘယ်လိုကုသမှုတွေ ရွေးချယ်နိုင်သလဲဆိုတာ မေးမြန်းပါ။ တချို့ကိစ္စတွေမှာဆိုရင် နောက်ဆရာဝန်တစ်ယောက်ရဲ့ ထင်မြင်ချက်ကိုရယူတာက ပညာရှိကြောင်း သူ့ကို အကြံပေးနိုင်တယ်။

ဆရာဝန်ပြပြီးနောက်။ ဆရာဝန်နဲ့ ဆွေးနွေးခဲ့တဲ့အကြောင်းတွေကို ပြန်သုံးသပ်ပါ။ ဖြစ်တဲ့ရောဂါနဲ့ ပေးတဲ့ဆေးမှန်ကြောင်း သေချာစေပါ။ ဆေးညွှန်းအတိုင်းသောက်ဖို့ အားပေးပါ၊ ဘေးထွက်ဆိုးကျိုး ဆိုးဆိုးရွားရွား ဖြစ်လာတာ သတိပြုမိရင် ဆရာဝန်ကို ချက်ချင်းအကြောင်းကြားပါ။ အပြုသဘောထားရှိဖို့ လူနာကို အားပေးပါ၊ ကုသမှုဆိုင်ရာ နောက်ထပ် လုပ်ဆောင်စရာတွေ စတဲ့ ထပ်ဆင့်ညွှန်ကြားချက်တွေအတိုင်း လိုက်နာဖို့ အားပေးပါ။ လူနာကို ရောဂါအခြေအနေအကြောင်း ပိုသိလာအောင် ကူညီပေးပါ။

အေးဆေးတည်ငြိမ်ပြီး နိုးကြားနေပါ။ ဆေးရုံတက်ရတဲ့ လူနာတစ်ယောက်ဟာ စိုးရိမ်ပူပန်စိတ်များပြီး ကူကယ်ရာမဲ့ ခံစားနေရနိုင်တယ်။ သင်က အေးဆေးတည်ငြိမ်ပြီး သတိရှိနေရင် ပါဝင်ပတ်သက်နေသူအားလုံးကို စိတ်တည်ငြိမ်နေအောင်၊ အမှားတွေမလုပ်မိအောင် ကူညီပေးနိုင်ပါတယ်။ လျှောက်လွှာဖြည့်တဲ့အခါ မှန်ကန်စွာ ဖြည့်စွက်ထားကြောင်း သေချာစေပါ။ ဆေးကုသမှုနဲ့ပတ်သက်လာရင် လူနာရဲ့ ဆုံးဖြတ်ပိုင်ခွင့်ကို လေးစားပါ။ သူက အရမ်းကို နေမကောင်းဖြစ်နေလို့ ဆုံးဖြတ်ချက်မချနိုင်တဲ့ အခြေအနေဆိုရင် ဆေးကုသမှုဆိုင်ရာ လူနာရဲ့ရေးသားချက်ဆန္ဒအတိုင်း လုပ်ပါ ဒါမှမဟုတ် အနီးစပ်ဆုံး ဆွေမျိုးသားချင်း၊ သူတာဝန်လွှဲအပ်ထားတဲ့ ကျန်းမာရေး စောင့်ရှောက်မှု ကိုယ်စားလှယ်ပြောတဲ့အတိုင်း လိုက်နာပါ။ *

အစပြုလုပ်ဆောင်ပါ။ ပွင့်ပွင့်လင်းလင်းပြောဆိုဖို့ မကြောက်ပါနဲ့။ လေးစား၊ ယဉ်ကျေးစွာ ပြောဆိုတာက ဆေးရုံဝန်ထမ်းတွေ လူနာအပေါ် အရေးတယူရှိလာအောင်၊ ပိုကောင်းတဲ့ ကျန်းမာရေးစောင့်ရှောက်မှုတွေ ပေးနိုင်အောင် လှုံ့ဆော်ပေးနိုင်ပါတယ်။ ဆေးရုံအတော်များများမှာ လူနာတွေကို ဆရာဝန်တစ်ယောက်ထက်မက ကြည့်ရှုစစ်ဆေးတယ်။ တခြားဆရာဝန်တွေ ဘာမှတ်ချက်တွေပေးထားသလဲဆိုတာ သူတို့ကို ပြောပြခြင်းဖြင့် ကူညီပေးနိုင်တယ်။ လူနာရဲ့ ကာယပိုင်း၊ စိတ်ပိုင်းပြောင်းလဲမှုအခြေအနေ တစ်ခုခုကို သတိပြုမိတယ်ဆိုရင် ပြောပြနိုင်ပါတယ်။

လေးစားမှုပြပါ၊ ကျေးဇူးတင်လေးမြတ်စိတ် တင်ပြပါ။ ဆေးရုံဝန်ထမ်းတွေဟာ စိတ်ဖိစီးမှုများနေနိုင်တယ်။ ကိုယ့်ကို ဆက်ဆံစေချင်သလိုမျိုး သူတို့ကို ဆက်ဆံပါ။ (မဿဲ ၇:၁၂) သူတို့ရခဲ့တဲ့လေ့ကျင့်မှုနဲ့ အတွေ့အကြုံတွေကို အသိအမှတ်ပြုပြီး လေးစားမှုပြပါ၊ သူတို့အပေါ် ယုံကြည် စိတ်ချမှုပြပြီး လုပ်ဆောင်ပေးမှုတွေအတွက် ကျေးဇူးတင်ကြောင်းပြောပါ။ အဲဒီလို ပြောမယ်ဆိုရင် သူတို့ဘက်က အတတ်နိုင်ဆုံးလုပ်ဆောင်စေဖို့ အားပေးရာရောက်ပါတယ်။

ဖျားနာမှုကို ဘယ်သူမှ မရှောင်လွှဲနိုင်ဘူး။ ဒါပေမဲ့ ကြိုတင်စီစဉ်မှုတွေနဲ့ လက်တွေ့ကျတဲ့ အကူအညီတွေက သူငယ်ချင်း၊ ဆွေမျိုးသားချင်းကို ခက်ခဲတဲ့အခြေအနေအောက်မှာ အကောင်းဆုံးရင်ဆိုင်ဖြေရှင်းနိုင်အောင် ကူညီပေးမှာ ဖြစ်တယ်။—သုတ္တံ ၁၇:၁၇။