ညီအစ်ကို/မတွေ ကြောက်​ပေ​မဲ့ အစည်းအဝေး မပျက်​ကြဘူး။ ကြေညာသူ​တွေကို ကာကွယ်​ပေးဖို့ အကြီးအကဲတွေ ပညာရှိရှိ စီစဉ်​ပေးကြတယ်။ အဲဒီ​နှစ်တွေ​အတွင်း ညီအစ်ကိုတွေ​ကို ကာကွယ်​ပေးတဲ့ ကနေဒါ​လူမျိုး ရှေ့နေ ညီအစ်ကို အန်ဒြေ ကာဘိုနော ဒီလိုပြောတယ်– “ညီအစ်ကို​တစ်ယောက်​ကို အစည်းအဝေး ကျင်းပတဲ့​နေရာ​နား​မှာ လက်ကိုင်​ဖုန်း​တစ်လုံး​နဲ့ နေရာချ​ပေး​လေ့ရှိတယ်။ လူအုပ်​လာ​နေတာကို မြင်​တာနဲ့ အကြီးအကဲတွေ​ကို ချက်ချင်း အကြောင်းကြား​ရမယ်။”

ဆူပူ​တိုက်ခိုက်မှု ဖြစ်ပြီး​တိုင်း ညီအစ်ကိုတွေ​ကို အားပေးဖို့ ဌာနခွဲရုံး​က ကိုယ်စားလှယ်​နှစ်ယောက် လည်ပတ်​တယ်။ “အစည်းအဝေး​မှာ ညီအစ်ကို/မတွေ​ရဲ့ ပြုံးရွှင်​တဲ့ မျက်နှာထား​ကို မြင်ရ​လေ့​ရှိလို့ ဌာနခွဲ​ကိုယ်စားလှယ်​တွေ အံ့ဩ​ခဲ့ရတယ်” လို့ အန်ဒြေ ပြောတယ်။

ကျမ်းစာသင်သား​တွေ အပါအဝင် တိုက်ရိုက် တိုက်ခိုက်​မခံ​ရသူ​တွေလည်း အလားတူ သဘောထားမျိုး တင်ပြ​ကြ​တယ်။ နှစ်ခြင်း​မခံ​ရ​သေး​တဲ့ ကြေညာသူ ဖြစ်​ခါနီး အမျိုးသမီး​တစ်ယောက်နဲ့ စကားပြောတာ​ကို အန်ဒြေ မှတ်မိ​နေတုန်းပဲ။ “အဲဒီ​တိုက်ခိုက်မှု​တွေကို တီဗီ​မှာ မြင်ရ​တော့ ခရစ်ယာန်စစ်​ နဲ့ အတုအယောင်​တွေရဲ့ ကွာခြားမှု​ကို မြင်ခဲ့​ရတယ်။ ကျွန်မ ခရစ်ယာန်စစ် ဖြစ်ချင်​တယ်” လို့ အဲဒီ​အမျိုးသမီး ပြောတယ်။

အဲဒီ​ခက်ခဲတဲ့ နှစ်တွေ​အတွင်း ကြေညာသူ​တွေဟာ ဟောပြော​ခြင်း​လုပ်​ငန်း​မှာ အလုပ်များ​နေခြင်း​အားဖြင့် ထူးခြားတဲ့ ယုံကြည်ခြင်း​နဲ့ ရဲစွမ်းသတ္တိ တင်ပြ​ခဲ့ကြတယ်။ တရားရုံး​မှာ ညီအစ်ကို/မတွေကို ခုခံကာကွယ်​ပေးခဲ့​သူတွေ​လည်း အလားတူ ယုံကြည်ခြင်း​မျိုး တင်ပြ​ခဲ့ကြတယ်။

သက်သေခံ​တွေဟာ မိသားစု​ဖြိုခွဲ​သူ၊ ဆေးကုသမှု ငြင်းပယ်​သူ၊ နိုင်ငံတော် ဆန့်ကျင်သူ​တွေအဖြစ် သတင်းမီဒီယာ​တွေမှာ လွဲမှား​စွာ ဖော်ပြ​ ခံရ​လေ့ရှိတယ်။ သူတို့​ဘက်က​နေ ကာကွယ်​ပေးတဲ့ ရှေ့နေ​တွေအနေနဲ့ မိမိတို့ရဲ့ နာမည်ကောင်း​နဲ့ အလုပ်အကိုင် ထိခိုက်​နိုင်တယ်။

အဲဒီ​နှစ်တွေ​အတွင်း ဂျော်ဂျီယာမှာ​ရှိတဲ့ ညီအစ်ကိုတွေ​ကို ကူညီပေး​ခဲ့​တဲ့ ကနေဒါ​ဌာနခွဲ​က ရှေ့နေ ဂျွန် ဘားန် ဒီလိုပြောတယ်– “ရှေ့​နေ​အလုပ်လုပ်​တဲ့ ဒေသခံ​ညီအစ်ကိုညီအစ်မ​တွေဟာ မိမိတို့​ကိုယ်​ကို အသုံးတော်ခံ​ခဲ့ကြတယ်။ အလုပ်အကိုင်​နဲ့ပတ်သက်ပြီး နောက်​ဆက်​တွဲ ဆိုးကျိုး​တွေ​ရှိ​နိုင်​ပေ​မဲ့  တရားရုံး​သွားပြီး  ကိုယ့်ကိုယ်ကိုယ် ယေဟော​ဝါသက်သေ​အဖြစ် မကြောက်မရွံ့ ဖော်ပြ​ခဲ့ကြတယ်။” “သတင်း ကောင်း ဟောပြောခွင့်​ကို ခုခံကာကွယ်​ပြီး တရားဥပဒေ​အရ အတည်​ဖြစ်​ အောင်” လုပ်နိုင်ဖို့ အဲဒီ​သတ္တိရှိ​တဲ့ သက်သေခံ​တွေ ကူညီပေး​ခဲ့ကြတယ်။—ဖိ. ၁:၇။

ဒီ​အတောအတွင်း အကြမ်းဖက်​လုပ်ရပ်တွေ​ကို သက်သေခံ​တွေ ဆက်​ကြုံခဲ့​ရတယ်။ ဒါကြောင့် အုပ်စု​လိုက် တိုက်ခိုက်မှု​တွေကနေ အကာအကွယ် ရစေ​တဲ့၊ ငြိမ်းချမ်း​စွာ နေထိုင်သူ​တွေကို တိုက်ခိုက်သူ​တွေ​အပေါ် တရားစွဲ​ထားတဲ့ အသနားခံ​စာ​ကို ၂၀​၀၁ ခုနှစ်၊ ဇန်နဝါရီ ၈ ရက်​စပြီး သက်သေခံ​တွေ ဖြန့်ဝေ​ခဲ့တယ်။

အသနားခံ​စာ​ရဲ့ ရည်ရွယ်ချက်​ကို ညီအစ်ကို ဘားန် ဒီလို​ရှင်းပြ​တယ်– “ကျွန်တော်တို့ရဲ့ ရည်ရွယ်ချက်​က ယေဟောဝါသက်သေ​တွေ​အပေါ် အကြမ်းဖက်​တာ​ကို ဂျော်ဂျီယာ​လူမျိုး​အများစု မနှစ်သက်​ကြောင်း၊ ဒီလို​လုပ်ရပ်​အတွက် ဘာသာရေး​အစွန်းရောက် အုပ်စု​မှာ တာဝန်ရှိ​ကြောင်း ဖော်ထုတ်​ဖို့ ဖြစ်တယ်။”

 နှစ်ပတ်​အတွင်း ဂျော်ဂျီယာ​ဒေသ အားလုံး​က ဩသဒေါ့ အများစု​ပါဝင်တဲ့ လူကြီး ၁၃​၃,၃၇၅ ယော​က်​က အသနားခံ​စာမှာ လက်မှတ်ထိုး​ခဲ့တယ်။ အသနားခံ​စာ​ဟာ သမ္မတ ရှီဗာနာဇီဆီ ရောက်​သွားပေ​မဲ့ အကြမ်းဖက်မှု​က​တော့ ရပ်​မသွား​ဘူး။ ဘာသာရေး​အစွန်းရောက်​တွေ​က သက်သေခံ​တွေကို တမင်​သက်သက် ပစ်မှတ်​ထား တိုက်ခိုက်​နေဆဲပဲ။

ဒီ​အတောအတွင်း မိမိလူ​မျိုး​ကို ယေဟောဝါ ဆက်​ကောင်းချီးပေး​ခဲ့တယ်။ ဘုရားသခင့်​လူမျိုး​ကို ဘာသာရေး အစွန်းရောက်​တွေ ဆက်​ဒုက္ခ​ပေးပေမဲ့ ယေဟောဝါ​ဘုရားက​တော့ မှားယွင်းတဲ့​ဘာသာ​ထဲက စိတ်ရင်းမှန်​သူများ​စွာကို ဆက်​ခေါ်ထုတ်​ခဲ့တယ်။

ဘာဘီလီနာ ခါရာတီရှဗီလီ​ဟာ တစ်ဘဝလုံး​နီးပါး တက်ကြွ​ထက်သန်တဲ့ ဂျော်ဂျီယာ ဩသဒေါ့​ချာ့ခ်ျ အဖွဲ့ဝင် ဖြစ်ခဲ့တယ်။ အသက် ၃၀ ဝန်းကျင်​လောက်မှာ တစ်မြို့​ပြီး တစ်မြို့၊ တစ်ရွာ​ပြီး တစ်ရွာ လှည့်လည်​ပြီး သူတော်စင်​တွေရဲ့ ဘဝအသက်တာ​အကြောင်း လူတွေကို သင်ပေးတယ်။

ဒါပေမဲ့ ဘုရားသခင်​အကြောင်း ဘာဘီလီနာ ပို​သိချင်​တယ်။ ဒါကြောင့် ဂျော်ဂျီယာ ဩသဒေါ့ ကျမ်းစာကျောင်း​တက်ဖို့ ဆုံးဖြတ်​လိုက်တယ်။ တစ်ကြိမ်​မှာ ဘုန်းတော်ကြီး​က ထာဝရအသက် ရစေ​သော အသိပညာ စာအုပ်ကို ပြပြီး ယေဟောဝါသက်သေ​တွေဆီက တစ်အုပ်​ရယူ​ဖို့ နား​ထောင်သူ​တွေကို အားပေးခဲ့တယ်။ “ဒီစာအုပ်​က ကျမ်းစာ​အကြောင်း အများကြီး သင်ပေး​လိမ့်မယ်” လို့ပြောတယ်။

ဘာဘီလီနာ တော်တော်​အံ့ဩ​သွားတယ်။ သက်သေခံ​တွေကို သူ တစ်ချိန်လုံး ရှောင်​လာ​ခဲ့တာ။ အခုတော့ ဘုန်းတော်ကြီး​က သူတို့ရဲ့ စာအုပ်ကို ထောက်ခံအားပေး​နေတယ်။ ‘ဘုရားသခင်​အကြောင်းကို ယေဟောဝါသက်သေ​တွေဆီကနေ သင်ယူ​ရမယ်​ဆို​မှတော့ ဒီ​မှာ ဘာ​လုပ်​တော့မှာ​လဲ’ လို့ ကိုယ့်ကိုယ်ကိုယ် ပြောမိတယ်။ ပိုတီ​မြို့မှာ​ရှိတဲ့ သက်သေခံ​တွေနဲ့ ချက်ချင်း ဆက်သွယ်​ပြီး ကျမ်းစာ စလေ့လာ​ခဲ့တယ်။

 ကျမ်းစာ​အကြောင်း ဘာဘီလီနာ ပို​သိလာတဲ့​အ​ခါ ဘဝ​မှာ အရေးကြီးတဲ့ ပြုပြင်ပြောင်းလဲမှု​တွေ ပြုလုပ်ခဲ့​တယ်။ “ရုပ်တုကိုးကွယ်​တာ မှား​မှန်း ကျမ်းစာက​နေ ကိုယ်တိုင်​မြင်တွေ့​မှ ရုပ်တုကိုးကွယ်​မှု​ပုံစံ​အားလုံးကို ရှောင်နိုင်​မယ်။ ဒါ လုပ်သင့်လုပ်ထိုက်​ရာ​ဖြစ်မှန်း ငါ​ယုံကြည်​တယ်” လို့ တစ်ချိန်က သူ​ပြောခဲ့​ဖူးတယ်။ အသက် ၈၀ ပြည့်​ခါနီး​မှာ ယေဟောဝါသက်သေ​လုပ်ဖို့ ဆုံးဖြတ်​ခဲ့တယ်။

ဝမ်းနည်းစရာကတော့ ၂၀​၀၁ ခုနှစ်မှာ ဘာဘီလီနာ နေမကောင်း​ဖြစ်ပြီး နှစ်ခြင်း​မခံ​ခင် သေဆုံးသွားတယ်။ ဒါပေမဲ့ မြေး​မ​လေး အစ်ဇဘဲလာ​က​တော့ နောက်ပိုင်း နှစ်ခြင်းခံ​လိုက်​ပြီး အခု ယေဟောဝါကို သစ္စာရှိရှိ ဝတ်ပြု​နေတယ်။

အဲလီ​ဆို ဒဇီဒဇီရှဗီလီ​ဟာ အသက် ၂၈ နှစ်အရွယ်​တုန်းက သီလရှင် ဖြစ်ချင်​ခဲ့တယ်။ ဇာတိမြို့ တကီဘူလီ​မှာ သီလရှင်ကျောင်း မရှိတဲ့အတွက် ၂၀​၀၁ ခုနှစ်မှာ တဘီလီဆီ​မြို့​ကို ပြောင်းရွှေ့​ခဲ့တယ်။ သီလရှင်ကျောင်း​မှာ လစ်လပ်​တဲ့​နေရာ​ကို ရှာ​ရင်း စာပြ​တဲ့ အချိန်ပိုင်း​အလုပ် လုပ်တယ်။ သူ့ရဲ့ တပည့်​တစ်ယောက်က နူးနူး​ဆိုတဲ့ ညီအစ်မ​တစ်ယောက်​ရဲ့ သမီး ဖြစ်နေ​တယ်။

 အဲလီ​ဆို ဒီလိုပြောတယ်– “ကျမ်းစာ​အကြောင်း ကျွန်မတို့ ပြောလေ့ရှိ​တယ်။ ဩသဒေါ့​ဘာသာ​ကို ကျွန်မ အစွမ်းကုန် ကာကွယ်​ပြောတဲ့အခါ နူးနူး​က ကျမ်းချက် တစ်ချက်​ပြီး​တစ်ချက် စိတ်ရှည်ရှည် ပြ​ပေးတယ်။ တစ်နေ့၊ ကျွန်ုပ်တို့​ထံမှ ဘုရားသခင် အဘယ်အရာ တောင်းဆို​တော်မူ​သနည်း ဆိုတဲ့ ဘရိုရှာ​တစ်စောင် ဖတ်ဖို့ ပေးတယ်။ အပိုဒ်​တွေကို ဖတ်​ပြီး ကျမ်းချက်တွေ ဖွင့်​ကြည့်​တဲ့အခါ ရုပ်တုကိုးကွယ်​တာ​က ဘုရားသခင့်ပညတ်​ကို တိုက်ရိုက်​ချိုးဖောက်​တာပဲ​ဆိုတာ ကျွန်မ သိသွား​တယ်။”

နောက်ပိုင်း အဲလီ​ဆို​က ဒေသခံ​ချာ့ခ်ျ​တစ်ခုကို သွားပြီး ဘုန်းတော်ကြီး​ကို မေးခွန်း​တချို့ မေးတယ်။ သူ့​အဖြေကို ကြည့်ပြီး ချာ့ခ်ျ​သွန်သင်ချက်​တွေဟာ ကျမ်းစာကို အခြေ​မခံ​မှန်း အဲလီ​ဆို နားလည်သွားတယ်။ (မာ. ၇:၇၊ ၈) အမှန်တရား တွေ့​ပြီ​ဆိုတာ ယုံကြည်စိတ်ချ​တဲ့အတွက် ယေဟောဝါသက်သေ​တွေနဲ့ ကျမ်းစာ​စလေ့လာ​ပြီး မကြာခင်​မှာပဲ နှစ်ခြင်းခံ​လိုက်တယ်။

၂၀​၀၁ ခုနှစ်မှာ အသင်းတော် အရေအတွက် တိုးများလာ​တဲ့အတွက် ဝတ်ပြု​ဖို့ သင့်တော်​တဲ့​နေရာတွေ လိုအပ်​လာတယ်။ ခန့်မှန်းခြေ​အရ  နိုင်ငံတော်ခန်းမ ၇၀ လောက် လိုအပ်​နေတယ်။ ဒါကြောင့် နိုင်ငံ​အတွင်း ဆန့်ကျင်မှု​တွေ​ကြား နိုင်ငံတော်ခန်းမ ဆောက်လုပ်ရေး စီမံကိန်း​ကို အစပြု​ခဲ့တယ်။—ဧဇ. ၃:၃။

မကြာခင်​မှာပဲ တ​ဘီလီ​ဆီ​မြို့မှာ အသင်းတော် အတော်များများ အသုံးပြုခဲ့တဲ့ အဆောက်အအုံ​တစ်ခုကို ဆောက်လုပ်ရေး​အဖွဲ့​တွေ ပြန်​ပြုပြင်​ခဲ့ကြတယ်။ ချက်ချင်း စီမံကိန်း​နှစ်ခု​ကို လုပ်ဆောင်​ခဲ့တယ်။ တစ်ခုက တ​ဘီလီ​ဆီ​မြို့မှာ​ဖြစ်ပြီး နောက်​တစ်ခုက ဂျော်ဂျီယာ အနောက်ပိုင်း၊ ချီ​ယာ​တူ​ရာ​မြို့မှာ ဖြစ်တယ်။

ချီ​ယာ​တူ​ရာ​မြို့ စီမံကိန်း​မှာ လုပ်ဆောင်​ခဲ့တဲ့ ညီအစ်ကို တမာဇီ ခူတစီရှဗီလီ ဒီလိုပြောတယ်– “ဆိုက်​ထဲမှာ နေ့တိုင်း ကျွန်တော်တို့ ဆယ့်​ငါးယောက် အလုပ်လုပ်​တယ်။ ခန်းမအသစ် ဆောက်​နေမှန်း မကြာခင်​မှာပဲ တစ်မြို့​လုံး သိသွား​တယ်။ ဆန့်ကျင်သူ​တွေ လာပြီး ခန်းမ​ကို ဖျက်ဆီး​မယ်ဆို​တဲ့ ကောလာ​ဟ​လ​တွေ တစ်ခါ​တစ်ခါ ကြား​ရတယ်။”

ဒီလို​ဆန့်ကျင်မှု​တွေကြောင့် ဆောက်လုပ်ရေး စီမံကိန်း ဘယ်လို အောင်မြင်​နိုင်မလဲ။ တာမာဇီ ဒီလိုပြောတယ်– “ကျွန်တော်တို့ ဆက်လုပ်​ပြီး  နိုင်ငံတော်ခန်းမ​ကို သုံးလ​နဲ့ အပြီးသတ်​နိုင်ခဲ့တယ်။ ခြိမ်းခြောက်မှု​တွေ ရှိပေမဲ့ ဘယ်​ဆန့်ကျင်သူ​မှ ရောက်​မလာ​ခဲ့ဘူး။” *

၂၀​၀၃၊ အောက်တိုဘာ​လ​မှာ ဆ​မ်​ထ​ရီ​ဒီ​ယာ​မြို့မှာ ဆောက်လုပ်ရေး​စီမံကိန်း​တစ်ခု စတင်​ခဲ့တယ်။ ဒီ​တစ်ကြိမ်​လည်း ဒေသခံ​ညီအစ်ကိုတွေ​ကို ဘာသာရေး အစွန်းရောက်​တွေ ခြိမ်းခြောက်​ပြန်​တယ်။ ဆန့်ကျင်သူ​တွေ ရောက်လာပြီး အဆောက်အအုံ​ကို ဖြိုချ​တဲ့အချိန်မှာ နံရံ​ထောင်​ပြီး​စ​ပဲ။ ဘိလပ်မြေ​တောင် မ​ခြောက်​သေး​ဘူး။

၂၀​၀၃ ခုနှစ်၊ နိုဝင်ဘာ​လ​မှာ ဂျော်ဂျီယာနိုင်ငံ​ရဲ့ ပြောင်းလဲမှု​တစ်ခုကြောင့် ညီအစ်ကို/မတွေ သက်သာရာရ​ခဲ့တယ်။ အစိုးရ​အပြောင်းအလဲ​ ကြောင့် ဘာသာရေး သည်းခံ​ခွင့်ပြု​မှု ပိုများ​လာတယ်။ ရလဒ်အနေနဲ့ ယေဟောဝါသက်သေ​တွေကို တိုက်ခိုက်​ခဲ့တဲ့ ဩသဒေါ့ အစွန်းရောက်​အုပ်စု​ဝင် အတော်များများ အဖမ်းခံခဲ့ရ​တယ်။

နှိပ်စက်​ညှဉ်းပန်း​မှု အဆုံးသတ်​သွားပြီး မကြာခင်​မှာ ဂျော်ဂျီယာမှာ​ရှိတဲ့ ယေဟောဝါရဲ့ လူမျိုးဟာ ကောင်းချီးများ​စွာ ခံစား​ခဲ့ရတယ်။ ၂၀​၀၄ ခုနှစ်၊ ခရိုင်​အစည်းအဝေး​မှာ ဂျော်ဂျီယာ ဘာသာစကားနဲ့ ကမ္ဘာသစ် ဘာသာပြန် ခရစ်ယာန် ဂရိကျမ်းစာ ထုတ်ဝေ​ခဲ့တယ်။

၂၀​၀၆ ခုနှစ်၊ “ကယ်နုတ်​ချိန် နီးပြီ!” ခရိုင်​အစည်းအဝေး​မှာ မမေ့နိုင်​စရာ နောက်​ဖြစ်ရပ်​တစ်ခု ဖြစ်ခဲ့တယ်။ အုပ်ချုပ်ရေး​အဖွဲ့ဝင် ဂျက်ဖရီ  ဂျက်ဆင်​ ဟော​မယ်လို့ ကြေညာ​ချိန်မှာ ပရိသတ်​တွေ တော်တော်​စိတ်လှုပ်ရှား​ခဲ့ကြတယ်။ ဂျော်ဂျီယာ ဘာသာစကားနဲ့ ကမ္ဘာသစ် ဘာသာပြန်ကျမ်း အပြည့်အစုံ​ကို ထုတ်ဝေ​လိုက်​ကြောင်း ညီအစ်ကို ဂျက်​ဆင် ကြေညာ​တဲ့အခါ အံ့ဩ​ဝမ်းသာ​လိုက်​ကြတာ။

ပရိသတ်​အများစု ကျေးဇူးတင်​လို့ ဝမ်းသာ​မျက်ရည်​တွေ ကျ​ခဲ့ကြတယ်။ “ကျမ်းစာ​အပြည့်အစုံ​ကို ရလို့ ဘယ်လောက်​ပျော်​တယ်ဆိုတာ မပြော​ပြ​တတ်​လောက်အောင်​ပါပဲ။ . . . တကယ့် သမိုင်းဝင်​ဖြစ်ရပ်​ပါပဲ” လို့ ညီအစ်မ​တစ်ယောက် ပြောတယ်။ ဂျော်ဂျီယာမှာ​ရှိတဲ့ ယေဟော​ဝါ့​လူမျိုးရဲ့ သမိုင်း​မှတ်တိုင်​ဖြစ်ခဲ့​တဲ့ ဒီ​ပွဲ​ကြီး​ကို လူ ၁၇,၀၀၀ ကျော် တက်ရောက်​ခဲ့တယ်။