Nananda, ad bũmb sẽn tõe n keng y raoodo: Wẽnnaam nee nebã sẽn namsd to-to rũndã-rũndã wã, n dat n maan bũmb n yols-ba. (Yɩɩn-sõamyã 72:13, 14) A pʋlma Biiblã sẽn yaa a Gomdã pʋgẽ tɩ neb nins “sẽn namsdã” na n paama “vʋʋsgo.” Na n yɩɩ wakat bʋgo? Na n yɩɩ “wakat ning Zu-soab a Zeezi sẽn na n puk arzãn ne malegs sẽn tar pãnga, . . . n sɩbg neb nins sẽn ka mi Wẽnnaam la neb nins sẽn ka sakd tõnd Zu-soab a Zeezi koe-noogã.” (2 Tesalonik-rãmbã 1:7, 8) A Zeezi pukrã yaa bũmb sẽn nan wate. Na n yɩɩ wakat ning Biiblã sẽn boond tɩ “Wẽnnaam sẽn tõe fãa ra-kãsengã sẽn yaa zabr daarã.” B boonda ra-kãng me tɩ Armagedõ.—Vẽnegre 16:14, 16.

Pa ninsaalb la Wẽnnaam na n kɩt tɩ b zab Armagedõ zabrã ye. Yaa a Bi-ribl a Zeezi Kirisi, n paas malɛgsã sẽn yaa pãens-rãmbã n na n zab ne nin-wẽnsã. B na n yii saasẽ n wa kɩt tɩ wẽgb buud fãa sa.—Ezayi 11:4; Vẽnegre 19:11-16.

Hal n tãag rũndã, Wẽnnaam sẽn get zabã to-to wã pa toeem ye. A ket n geta zabr wa bũmb a sẽn tõe n tũnug n kɩt tɩ wẽgbã la wẽnemã sa. La wa a sẽn maan to-to hal pĩnd wẽndẽ wã, yaa yẽ bal n segd n yãk zabrã sẽn na n yɩ wakat ningã la a soab ning sẽn na n zabã. Wa d sẽn yã wã, Wẽnnaam zoe n yãka wakat n na n zab ne nin-wẽnsã, n dok neb nins b sẽn wẽgdã sũuri. Yaa a Bi-ribl a Zeezi Kiris la  a yãk t’a na n zab zab-kãnga. Woto wilgdame tɩ zab nins nebã sẽn zabd rũndã-rũndã wã pa tat Wẽnnaam yam ye. Baa sẽn wa n yaa bũmb ning yĩng la b zabda, pa tat a yam ye.

Ad makr sẽn wilgd rẽ: Mams-y wa rao sẽn na n yi n bas a kom-dibli a yi, tɩ b wa yik n zabd taaba. B wa n basa zabrã, n bool b ba wã telefonnẽ n na n togs yellã. A ye wã yeelame tɩ yaa a to wã n sɩnge, t’a to wã yeel tɩ yaa ye wã n bao. B ned kam fãa ra baoodame tɩ b ba wã kõ-a bʋʋm. La b ba wã kelg-b lame, n yeel tɩ b bas zabrã n gũ t’a sã n wa bɩ a welg yellã. B basa zabrã. La sẽn yɩ bilfu, b le sɩngame. B ba wã sẽn wa n wa, a sũur sãama ne b fãa t’a sɩbg-ba, b sẽn pa maan wa a sẽn yeelã yĩnga.

Rũndã-rũndã, tẽns sã n zabd taaba, tẽng fãa mi n kotame tɩ Wẽnnaam sõng-a. La Wẽnnaam pa kẽesd a toog rũndã-rũndã zabã pʋsẽ ye. Biiblã sẽn yaa a Gomdã pʋgẽ, a yeela woto: “Da lebs-y ned baa a ye wẽng wẽng yĩng ye.” A paasame: “Da rok-y y sũy y toor ye.” (Rom-dãmbã 12:17, 19) A wilgame me tɩ ninsaalbã segd n maaga b yĩns n gũ Armagedõ zabrã, wakat ning yẽ sẽn na n kẽes a toog n kɩt tɩ yɛlã toeemã. (Yɩɩn-sõamyã 37:7) Ninsaalbã sã n pa gũ Wẽnnaam, n yik n na n zab n welg b zu-loeesã b toore, Wẽnnaam getame tɩ b yaa tɩta-neba, tɩ pa noom-a ye. Rẽ n so tɩ Wẽnnaam na n wilg Armagedõ zabrã sasa tɩ b manesmã yika a sũuri. A na n welga ninsaalbã zabã wakat fãa yĩnga, n kɩt tɩ “zabã sẽn be dũniyã tɛk fãa wã sɛ.” (Yɩɩn-sõamyã 46:10; Ezayi 34:2) Rẽnd Armagedõ na n yɩɩ zabr ning sẽn na n kɩt tɩ zabã fãa sa wã.

Woto yaa bark Wẽnnaam Rĩungã sẽn na n wa ne. A Zeezi goma Wẽnnaam Rĩungã sẽn yaa goosneema wã yelle, pʋʋsg ning a sẽn zãms a karen-biisã pʋgẽ. Neb wʋsg mii pʋʋs-kãnga. A yeelame tɩ b pʋʋs n kos tɩ Wẽnnaam “soolmã wa,” t’a raab “maan tẽng zug wa sẽn maand arzãnã.” (Matye 6:10) Wẽnnaam Rĩungã sẽn na n kɩt tɩ zabã sa wã toor sẽn ka be, a na n kɩtame tɩ wẽnemã sẽn yaa zabã yẽgrã me sa. * (Yɩɩn-sõamyã 37:9, 10, 14, 15) Rẽnd a Zeezi karen-biisã sẽn gũud Wẽnnaam Rĩungã sẽn na n wa ne bark ninsã ne b sũur fãa wã, b bee bʋʋm.—2 Pɩyɛɛr 3:13.

La d segd n gũu yʋʋm a wãn tɩ Wẽnnaam Rĩungã yaool n wa kɩt tɩ namsgã, wẽgbã la wẽnemã sa? Biiblã bãngr-goam n pidsdi, tɩ wilgdẽ tɩ rũndã-rũndã la dũni-kãngã ‘yaoolem wakatã.’ (2 Tɩmote 3:1-5) * Ka la bilfu, Wẽnnaam Rĩungã na n kɩtame tɩ Armagedõ zabrã sɩnge, tɩ yaoolem wakatã sa.

Wa d sẽn zoe n wilgã, Armagedõ zabrã sasa, yaa “neb nins sẽn ka . . . sakd tõnd Zu-soab a Zeezi koe-noogã” la b na n sãame. (2 Tesalonik-rãmbã 1:8) La tẽeg-y tɩ baa nin-wẽng kũum meng pa noom Wẽnnaam ye. (Ezekɩyɛll 33:11) Wẽnnaam “ka rat tɩ ned baa a yembr” sãam zab-kãng sasa ye. Rẽ n so tɩ nand tɩ saabã ta, a kɩtame tɩ b moond tõnd Zu-soab a Zeezi koe-noogã dũni gill zugu, sẽn na yɩl tɩ “yɩ kaset soolem fãa nebã yĩnga.” (2 Pɩyɛɛr 3:8, 9; Matye 24:14; 1 Tɩmote 2:3, 4) Sɩd me, a Zeova Kaset rãmbã sẽn moond koɛɛgã dũniyã gill zugã, kɩtame tɩ nebã fãa tõe n paam n bãng Wẽnnaam, la b sak a Zeezi koe-noogã n wa tõog n vɩɩmd wakat ning zabr buud fãa sẽn pa na n le zĩndã.