Armagedõ zabrã yaa yaoolem zabr sẽn na n zĩnd ninsaalbã goosneema-rãmbã ne Wẽnnaam sʋka. Baa rũndã-rũndã menga, goosneema-kãens ne b poorẽ dãmbã kɩɩsda Wẽnnaam, b sẽn zãgs tɩ b kõn sak a naamã yĩnga. (Yɩɩn-sõamyã 2:2) Armagedõ zabrã na n kɩtame tɩ ninsaalbã naam sa.—Dãniyɛll 2:44.

 Yaa vugr bal la b ning gom-bil ning sẽn yaa “Armagedõ” wã Biiblã pʋgẽ, Vẽnegr 16:16 pʋgẽ. Vẽnegr sebrã pĩnd n wilgame tɩ “dũniyã gill rĩm-dãmbã” na n tigma taab “zĩig b sẽn boond ne Ebre tɩ Armagedõ,” “Wẽnnaam Sẽn-tõe-a-fãa wã ra-kãsengã zabrã” yĩnga.—Vẽnegre 16:14.

 Ãnd dãmb n na n zab Armagedõ zabrã sasa? A Zeezi Kirist na n lʋɩɩ tãb-biis sẽn be saasẽ taoore, tɩ b zab n tõog Wẽnnaam bɛɛbã. (Vẽnegre 19:11-16, 19-21) Wẽnnaam bɛɛbã yaa sẽn kɩɩsd-b a naamã la b paoogd-a wã.—Ezekɩyɛll 39:7.

 Armagedõ zabrã na n yɩɩ Moayẽnoriyã bɩ? Ayo. Armagedõ zabrã pa na n yɩ zĩ-yɛng ye. A na n yɩɩ dũniyã gill zugu.—Zeremi 25:32-34; Ezekɩyɛll 39:17-20.

 Armagedõ wã kẽer sẽn mi n yetẽ tɩ Harmagedõ wã (Ebre, Har Meghiddohn) võor yaa “Megido tãnga.” Megido ra yaa tẽng sẽn be pĩnd wẽndẽ Israyɛll soolmã pʋgẽ. Pĩnd wẽndẽ wã, zab-kãsems la b zab zĩis sẽn pa zãr ne Megido, tɩ Biiblã gomd zab-kãens kẽer yelle. (Bʋ-kaoodbã 5:19, 20; 2 Rĩm-dãmbã 9:27; 23:29) La Armagedõ pa tõe n yɩ zĩig ning sẽn pẽ pĩnd wẽndẽ Megido wã ye. Tãn-bedr ka be be ye. Baa Zizreyɛll tẽn-nabrã sẽn pẽ be wã pa tõe n deeg sẽn na n zab-b ne Wẽnnaamã fãa ye. Dẽnd Armagedõ yaa yɛlã sẽn na n wa yɩ to-to dũniyã gill zugu, tɩ buud toɛy-toɛyã tigim taab n wilg tɩ b pa rat Wẽnnaam naamã. Rẽ n na n yɩ b yaoolem soaba.

 Yɛlã na n yɩɩ wãn to Armagedõ zabrã sasa? Yaa sɩd tɩ d pa mi Wẽnnaam sẽn na n tũnug ne a pãngã to-to n zab ne a bɛɛbã ye. La a tõe n tũnuga ne sapɩlma, tẽn-digimdgu, sa-kẽenga, bugum la kidbri, sa-yãgbo, la bã-loangdg wa a sẽn zoe n maan pĩnd wẽndẽ wã. (Zoob 38:22, 23; Ezekɩyɛll 38:19, 22; Habakuk 3:10, 11; Zakari 14:12) Wẽnnaam bɛɛbã kẽer na n yirbame n wẽneg n kʋ taaba. Baasgo, b na n wa bãngame tɩ yaa Wẽnnaam n zabd ne bãmba.—Ezekɩyɛll 38:21, 23; Zakari 14:13.

 Armagedõ na n yɩɩ dũniyã saab bɩ? Pa na n yɩ tẽngã sãoong ye. Bala ninsaalbã na n zĩnda tẽngã zug wakat sẽn kõn sa. (Yɩɩn-sõamyã 37:29; 96:10; Koɛɛg soaba 1:4) Rẽnd Armagedõ zabrã sasa, pa ninsaalbã zãng n na n sãam ye. Pʋd n na n yɩɩ ninsaalbã fãagre, bala “kʋʋn-kãseng” sẽn yaa wẽn-tũudb n na n põse.—Vẽnegre 7:9, 14; Yɩɩn-sõamyã 37:34.

 Biiblã sã n gomd “dũniyã” yelle, tõe n yaa tẽngã yell la b gomda. La wakat ninga yaa nin-wẽnsã sẽn kɩɩsd Wẽnnaamã yell la b gomda. (1 Zã 2:15-17) Rẽ n so tɩ d tõe n yeel tɩ Armagedõ na n waa ne “dũniyã sɛɛbo.”—Matiye 24:3, Wẽnnaam Sebre, 1983.

 Wakat bʋg la Armagedõ zabrã na n zĩndi? A Zeezi sẽn wa n gomd “to-kãsengã” sẽn na n wa baas ne Armagedõ zabrã yellã, a yeelame: “Sã n yaa ne daar-n-kãng la lɛɛr-kãnga, ned baa a ye pa mi ye. Malɛgsã sẽn be saasẽ wã pa mi, Biigã me pa mi ye. Yaa Ba wã bal n mi.” (Matiye 24:21, 36) La Biiblã wilgame tɩ Armagedõ na n zĩnda a Zeezi waoongã wakat sẽn sɩng yʋʋmd 1914 sasa wã.—Matiye 24:37-39.