Yɩɩn-sõamyã sebre 31:1-24
Yɩɩlã taoor soab yĩnga. A Davɩɩd yɩɩlle.
31 Zeova, yaa yãmb nengẽ la mam soond-yã.+
Bɩ m da tol n paam yãnd ye.+
Fãag-y maam y tɩrlmã yĩnga.+
2 Kɩll-y y tʋbr n kelg* maam.
Wa n fãag-y maam tao-tao.+
Lebg-y tãng sẽn kogend maam,zĩig sẽn gũbg sẽn na yɩl n fãag maam.+
3 Yãmb yaa mam pĩiga, la m soondg zĩiga.+Yãmb yʋʋrã yĩnga,+ y na n wilga maam sor la y ges m yelle.+
4 Yãmb na n yiisa maam bẽdg ning b sẽn soos n bẽd maamã pʋgẽ,+bala yãmb yaa mam pãng zĩiga.+
5 Mam ningda m vʋʋsmã yãmb nugẽ.+
Zeova sẽn yaa sɩdã Wẽnnaam,* yãmb fãaga maam.+
6 Mam kisa neb nins sẽn waoogd bõn-naands sẽn ka yõodã.La sã n yaa ne maam, mam teega a Zeova.
7 Mam na n kɩdma sũ-noog wʋsg yãmb maan-neerã yĩnga.Bala yãmb yãa mam namsgã.+Yãmb mii mam sũ-sãangã sẽn yaa wʋsg to-to wã.*
8 Yãmb pa rɩk maam n ning bɛyã nugẽ ye.Yãmb kɩtame tɩ mam yals zĩig bũmb sẽn pa tõe n paam maam ye.*
9 Zeova, zoe-y mam nimbãanega, bala mam bee sũ-sãang pʋgẽ.
Yɩɩrã kɩtame tɩ mam ninã ne m yĩngã tõr* pãng booge.+
10 Mam sũ-sãangã yĩnga, mam yõorã lebga koɛɛga.+Mam yʋʋmã sõor booga m sirã yĩnga.+
Mam kongrã yĩnga, mam pãngã tara boogre.Mam kõabã pãng boogame.+
11 Mam zabd-n-taasã fãa laada maam,+sẽn yɩɩd fãa mam yagsã.
Mam mitinsã zoeta maam.B sã n yã maam zãma sʋka, b zoet n zãagdame.+
12 B yiisa maam b sũyã pʋsẽ,* n yĩm mam yell wa m kiime.Mam yaa wa yʋʋr sẽn wãage.
13 Mam wʋma gom-wẽns wʋsg mam zugu.Bũmb toor-toor sẽn kẽesd rabeem n gũbg maam.+
B sã n wa tigim taab wa nin-yend n na n zab ne maam,b seta taab n na n yãk mam yõorã.*+
14 La mam teega yãmba, Zeova.+
Mam yetame: “Yãmb yaa mam Wẽnnaam.”+
15 Mam vɩɩmã* bee yãmb nugẽ.
Fãag-y maam m bɛɛbã nusẽ, la neb nins sẽn namsd maamã nusẽ.+
16 Kɩt-y tɩ y nengã vẽenem yãg y tʋm-tʋmdã zugu.+
Fãag-y maam y maan-neerã yĩnga.
17 Zeova, m sã n wa bool yãmba, bɩ m da paam yãnd ye.+
Bɩ yãnd yõk nin-wẽnsã.+Bɩ b sig Yaoogẽ* wã tɩ b bʋʋrã sa.+
18 Bɩ no-bɩms nins sẽn yagd ziri wã sĩndi.+Yaa no-bɩms nins sẽn gomd wuk-m-meng goam la gom-bɛd n paoogd nin-tɩrsã.
19 Ad yãmb sõmblmã yaa wʋsgo!+
Yãmb segla bõn-sõma n bĩng neb nins sẽn zoet yãmbã.+Yãmb wilga y sõmblmã ninsaalbã fãa taoore, neb nins sẽn wat n soonded yãmb nengẽ wã yĩnga.+
20 Yãmb na n solg-b-la zĩ-soalgdg ning sẽn be yãmb taoorã pʋgẽ,+n kogl-b ne ninsaalbã sɩlem.Yãmb na n solg-b-la yãmb zãndẽ wã,n kogl-b ne neb nins sẽn kãnegd-bã.*+
21 Bɩ a Zeova paam pẽgre,bala a wilga maam a maan-neerã+ ne manesem sẽn be yamleoogo, tẽng bɛɛb sẽn karg n gũbg pʋgẽ.+
22 Sã n yaa ne maam, mam da yɛɛsame n yeele:
“Mam na n kii yãmb taoore.”+
La mam sẽn wa n kelem n bool yãmbã, yãmb wʋma mam kosgã.+
23 Yãmb a neb nins fãa sẽn maand sɩd ne a Zeova wã, nong-y-yã-a!+
A Zeova kogenda sẽn maand-b sɩdã,+la a sɩbgda neb nins sẽn wukd b mensã ne toolem.+
24 Yãmb a neb nins fãa sẽn gũud a Zeova wã,+keng-y y sũy la y tall raoodo.+
Vẽnegr toor-toore
^ Bɩ, “Sulg-y n kelg-y.”
^ Bɩ, “Wẽnnaam ning sẽn yaa sɩd soabã.”
^ Bɩ, “mam sɩɩgã sũ-sãangã.”
^ Bɩ, “zĩ-yalengẽ.”
^ Bɩ, “mam sɩɩgã la m pʋʋrã.”
^ Bɩ, “b yamẽ wã.”
^ Bɩ, “mam sɩɩgã.”
^ Ebre, “Mam wakatã.”
^ Ges-y gom-biis võor bilgrã zĩigẽ.
^ Ebre, “n kogl-b ne zɩlma zaba.”