Wẽnnaam tara yʋy a wãna?

ÉCOUTER EN

Biiblã sẽn yete

Wẽnnaam tara yʋ-peell a yembr bala. Ne Ebre wã, yaa יהוה la b lebg-a-la ne Moorã tɩ “Zeova.” a Ne no-rɛɛs a Ezayi maasem, Wẽnnaam yeelame yaa: “Mam yaa a Zeova. Mam yʋʋrã la woto.” (Ezayi 42:8) Pĩnd Biibl-dãmbã b sẽn gʋls ne nugã pʋgẽ, Wẽnnaam yʋ-peellã bee be sẽn ta naoor tus a yopoe. B sẽn pʋd Zeova wã Biiblã pʋgẽ wã sõor yɩɩda naam yʋʋr buud fãa b sẽn boond Wẽnnaam, pa rẽ bɩ yʋ-pɛɛl a taabã fãa hal zĩig sẽn zãra. b

A Zeova tara yʋy a taab bɩ?

Yaa sɩd tɩ Biiblã pʋgẽ, b boonda Wẽnnaam ne yʋ-peell a yembre, la b wilgdame me tɩ Wẽnnaam tara naam yʋy wʋsg sẽn bilgd a sẽn yaa a soabã. Ad naam yʋy kẽer võore, la b sẽn bilgd a Zeova sẽn yaa Wẽnnaam ning buudã me:

Naam yʋʋrã	Biiblã vɛrse wã	A võorã
Allah	(Pa be ye)	“Allah” wã pa yʋ-peell ye. Yaa Arabɩɩmd gom-bila, t’a võorã yaa “Wẽnnaam.” Biibl-dãmb kẽer b sẽn lebg ne Arabɩɩmdã la ne buud-goam a taab pʋsẽ, b lebga gom-bil ning sẽn yaa “Wẽnnaamã” tɩ “Allah.”
Sẽn-tõe-a-fãa	Sɩngre 17:1	A pãngã pa tar to ye. ʼEl Shad·daiʹ sẽn yaa Ebre wã gom-bil ning b sẽn lebg tɩ “Wẽnnaam Sẽn-tõe-a-fãa wã” bee Biiblã pʋgẽ naoor a yopoe.
Alfa la Omega	Vẽnegre 1:8; 21:6; 22:13	“Pipi soab la yaoolem soaba,” bɩ “sɩngr la baasgo,” sẽn dat n togs tɩ wẽnnaam sẽn tõe fãa kae sẽn deng a Zeova, la t’a Zeova sẽn yãk a toogo, wẽnnaam sẽn tõe fãa a to pa na n zĩnd ye. (Ezayi 43:10) Alfa wã yaa Gɛrkã gʋls-biisã pipi soabã, tɩ Omega wã yaa yaoolem soabã.
Soab ning sẽn be wakat fãa yĩngã	Dãniyɛll 7:9, 13, 22	A pa tall sɩngr ye. Ned wall bũmb kae sẽn deng-a n beẽ ye. Hal wakat sẽn ka tar sɩngre, n tãag wakat sẽn ka saabo, a beeme.—Yɩɩn-sõamyã 90:2.
Naanda	Ezayi 40:28	Yẽ n naan bũmb fãa.
Ba	Matiye 6:9	A kõta bũmb fãa vɩɩm.
Wẽnnaam	Sɩngre 1:1	Yẽ n tog ne waoogre. A yaa pãng soaba. Ebre wã gom-bilã sẽn yaa ʼElo·himʹ wã wilgdame t’a Zeova toga ne naam, ziir la waoogre.
Wẽnnaam-dãmb Wẽnnaam	Tõodo 10:17	A yaa Wẽnnaam sẽn ka tar to, n yaa toor ne “wẽn-faadã” neb kẽer sẽn pʋʋsdã.—Ezayi 2:8.
Karen-saam-kãsenga	Ezayi 30:20, 21	A zãmsda tõnd la a wilgd tõnd sor d mens nafr yĩnga.—Ezayi 48:17, 18.
Naand-kãsenga	Yɩɩn-sõamyã 149:2	Yẽ n naan bũmb fãa.—Vẽnegre 4:11.
Wẽnnaam sẽn yaa sũ-noog soaba	1 Tɩmote 1:11	A maanda sũ-noog wakat fãa.—Yɩɩn-sõamyã 104:31.
Soab ning sẽn wʋmd pʋʋsgo	Yɩɩn-sõamyã 65:2	Yẽ meng n kelgd pʋʋsg fãa sẽn pʋʋs ne tẽebo.
Mam na n lebga mam sẽn dat n lebg a soaba	Yikri 3:14	A lebgda bũmb ning fãa a sẽn dat a raabã pidsg yĩnga. B lebgda gom-kãng me tɩ “Mam na n yɩɩ m sẽn dat a soab fãa” bɩ “Mam na n yɩɩ mam sẽn yãk yam n na n yɩ a soaba.” (The Emphasised Bible, by J. B. Rotherham; New World Translation) Woto fãa sõngdame tɩ d wʋm a Zeova yʋ-peellã b sẽn pʋd vɛrse ning sẽn pʋgdã pʋgẽ wã võore.—Yikri 3:15.
Sũ-kiir soaba	Yikri 34:14, Wẽnnaam Sebre, 2014	A ratame tɩ b tũ yẽ a ye tãa bala.
Wakat sẽn kõn sa Rĩma	Vẽnegre 15:3	A naamã pa tar sɩngre, a pa tar saab me ye.
Zu-soaba	Yɩɩn-sõamyã 135:5	Soaad bɩ naaba. Yaa Ebre wã gom-biis sẽn yaa ʼA·dhohnʹ la ʼAdho·nimʹ.
Tãb-biis naaba	Ezayi 1:9	A yaa malɛgs kʋʋng sẽn yaa tãb-biis naaba.
Sẽn ka-a to	Yɩɩn-sõamyã 47:2	A bee zĩig sẽn zãnt n yɩɩdã.
Sẽn yaa-a sõng n yɩɩda	Yel-bũn 9:10	A yaa sõng la yɩlemd n yɩɩd bõn-vɩɩsã fãa.
Yagda	Ezayi 64:8	A tara tõog ninsaalbã la buud toɛy-toɛyã zutu, wa yagd sẽn tar tõog tãnd zugã. —Rom dãmbã 9:20, 21.
Fãagdã, Soab ning sẽn lebsd n da	Ezayi 41:14	A lebs n deegame bɩ n daa ninsaalbã, n fãag-b ne yel-wẽndã la kũumã, a Zeezi sẽn ki tɩ yɩ maoongã maasem yĩnga.—Zã 3:16.
Pĩig kugri	Yɩɩn-sõamyã 18:2, 46	A yaa koglg zĩig la a wat ne fãagre.
Fãagda	Ezayi 45:21	A fãagda tõnd ne yel-pakr bɩ sãoongo.
Pe-kɩɩma	Yɩɩn-sõamyã 23:1	A geta a nin-buiidã yelle.
Zu-soab sẽn ka to	Sɩngre 15:2	A naamã pa tar to ye. Yaa Ebre wã gom-bil ning sẽn yaa ʼAdho·naiʹ.
Wẽnnaam sẽn ka to	Dãniyɛll 7:18, 27	Yẽ n yaa Zu-soab ning sẽn ka to wã.

Zĩis kẽer yʋy sẽn be Biiblã babg ning b sẽn da gʋls ne Ebre wã pʋgẽ

Biiblã pʋgẽ, b pʋda Wẽnnaam yʋ-peellã n naag zĩis kẽer yʋya, la rẽ pa Wẽnnaam yʋy a taab ye.

Zĩigã yʋʋre	Biiblã vɛrse wã	A võorã
Zeova-zɩɩre	Sɩngre 22:13, 14	“A Zeova na n kõome.”
Zeova-nisi	Yikri 17:15	“A Zeova yaa mam tãb-kaoore.” Wẽnnaam a Zeova nin-buiidã sã n wa be yel-pakr pʋgẽ, b tõe n waa a nengẽ n paam koglg la sõngre.—Yikre 17:13-16.
Zeova-salom	Bʋ-kaoodbã 6:23, 24	“A Zeova yaa laafɩ.”
Zeova-samma	Ezekɩyɛll 48:35	“A Zeova bee ka.”

Bʋʋm sẽn kɩt tɩ d segd n bãng Wẽnnaam yʋʋrã la d pʋt-a

Wẽnnaam yʋʋrã sẽn yaa Zeova wã segd n tara yõod wʋsg ne-a, bala a kɩtame tɩ b gʋls-a naoor tusa Biiblã pʋgẽ.—Malaki 1:11.
A Zeezi sẽn yaa Wẽnnaam Biigã wilga naoor wʋsg tɩ Wẽnnaam yʋʋrã tara yõodo. Wala makre, a pʋʋsa a Zeova n yeele: “Bɩ yãmb yʋʋr paam waoogre.”—Matiye 6:9; Zã 17:6.
Neb nins sẽn bãng Wẽnnaam yʋʋrã la b pʋt-a wã, maanda bũmb sẽn na n sõng-b tɩ b tall zood sõma ne a Zeova. (Yɩɩn-sõamyã 9:10; Malaki 3:16) Zood ne Wẽnnaamã na n sõng-b lame tɩ b wa paam n dɩ a pʋlen-kãngã yõodo: “A sẽn nong maamã yĩnga, mam na n fãag-a lame. Mam na n kogl-a lame, bala a mii mam yʋʋrã.”—Yɩɩn-sõamyã 91:14.
Biiblã yetame yaa: “Baa bũmb b sẽn boond tɩ wẽnnaam-dãmb sã n beẽ, tɩ yaa saasẽ tɩ yaa tẽngã zug me, wa “wẽnnaam-dãmb” wʋsg la “zu-soben-dãmb” wʋsg sẽn be wã. (1 Korẽnt rãmbã 8:5, 6) Vẽenega, Biiblã wilgdame tɩ Wẽnnaam sɩd-sɩdã sẽn yaa Wẽnnaam-yɛngã yʋʋr la a Zeova.—Yɩɩn-sõamyã 83:18.

a Ebre wã bãngdb kẽer nong n lebgda Wẽnnaam yʋʋrã tɩ “Yahweh.”

b “Yah” bɩ “Zah” wã sẽn yaa a Zeova yʋʋrã bool-koɛɛgã bee na maan naoor pis-nu Biiblã pʋgẽ, “Aleluya” sẽn dat n togs tɩ “Pẽg-y-yã a Zah” wã sẽn naage.—Vẽnegre 19:1.