Nebã fãa tara yʋ-peelle. Rẽ yĩnga, zemsame tɩ Wẽnnaam tall yʋʋr bɩ? Yɩl tɩ neb zood pãng paase, b ned kam fãa tog n mii a to yʋʋre, n pʋtẽ. Pa segd n yɩ woto tõnd ne Wẽnnaam zoodã wɛɛngẽ sɩda?

 Biiblã pʋgẽ, Wẽnnaam yeelame: “Mam yaa a Zeova, mam yʋʋrã la woto.” (Ezayi 42:8) Wẽnnaam tara naam-yʋy wʋsgo. Wala makre, “Wẽnnaam sẽn tõe fãa,” “Saasẽ pãng soaba,” la “Naanda.” Baasgo, a kõo a nin-​buiidã sor tɩ b sã n na n gom ne-​a bɩ b pʋt a yʋ-peellã.—Sɩngre 17:1; Tʋʋmã 4:24; 1 Pɩyɛɛr 4:19.

 Biibl-​dãmb wʋsg pʋsẽ, Wẽnnaam yʋ-peellã bee Yikr 6:3 pʋgẽ. Traduction du monde nouveau wã pʋgẽ, b yeta vɛrse-kãng pʋgẽ yaa: “Mam vẽnega m meng ne a Abrahaam la a Izaak ne a Zakoob n wilg bãmb tɩ mam yaa Wẽnnaam Sẽn tõe fãa. La mam ka kɩt tɩ b bãng tɩ mam yʋʋr la a Zeova ye.”

 Wẽnnaam yʋʋrã yaa Zeova ne Moore, tɩ d sɩng n pʋta na maan yʋʋm kobse. Baa bãngdb wʋsg sẽn nong n pʋt “Yahweh” wã, Zeova wã n yaa yʋʋr ning b sẽn mi zĩig fãa la balã. B gʋlsa Biiblã pipi babgã ne Ebre, la pa ne Ãngilind ye. Ebre wã kareng sɩngda nug-rɩtg n debd nug-​goabga. Buud-gom-kãng pʋgẽ, b gʋlsa Wẽnnaam yʋʋrã ne sor-wãgdgs a naase. Yaa: יהוה. Ebre wã gʋls-bi-kãens (B lebga rẽ woto: YHWH) la b sẽn boond tɩ Tetragrammã.