যীশুদি মীওইবশিংগা খেৎনৈ। মহাক পৃথিবীদা পোকত্রিঙৈদা উবা ঙমদবা শকওং ওইনা লৈরম্মী। (যোহান ৮:২৩) ঈশ্বরগী ইহান হানবা খুৎশেমদি যীশুনি। অদুগী মতুংদা, অতোপ্পা পোৎ খুদিংমক শেমখিবা মতমদা যীশুনা ঈশ্বরগী মতেং পাংখি। যীশুবু ঈশ্বরগী অমত্তা ঙায়বা “মচা নিপা” কৌই মরমদি যেহোবা মশামক্না শেমখিবসি মহাক খক্তনি। (যোহান ১:১৪) যীশুবু “ৱাহৈ” হায়নসু খঙনৈ মরমদি মহাক ঈশ্বরগী ৱাঙাঙবা অমা ওইনা লৈরম্মী।—পাউরৌ ৮:২২, ২৩, ৩০; কোলোসীয়া ১:১৫, ১৬ পাবিয়ু।

ঈশ্বরনা স্বর্গদা লৈরম্বা মহাক্কী মচানুপাবু স্বর্গদগী পৃথিবীদা থারক্নবগীদমক যিহূদি লৈশাবী মেরিগী অঙাং-খাউদা হাপ্পীদুনা মীরোনহনখি। মরম অসিনা যীশু পোকপদা মীওইবগী মপা য়াওখিদে। (লূক ১:৩০-৩৫) যীশুনা পৃথিবীদা লাকখিবসি (১) ঈশ্বরগী মরমদা অচুম্বদু তম্বীনবা, (২) ঐখোয়দা অৱা-অনা তারবা ফাওবদা ঈশ্বরগী অপাম্বা করম্না তৌগদগে হায়বগী খুদম উৎপীনবা অমসুং (৩) মহাক্কী মপুঙ ফারবা পুন্সিবু “থাদোকমল” অমা ওইনা পীবিনবনি।—মাত্থি ২০:২৮ পাবিয়ু।

থাদোকমল অমা হায়বসি কনাগুম্বা মীওই অমগী পুন্সিবু কন্নবা পীবা মমল অদুবুনি। (খোঙশানবা ২১:২৯, ৩০) ঈশ্বরনা ইহান-হান্না মীওইবা শেম্বীখিবা মতমদা অশিবা অমসুং অহল ওইরকপা হায়বসি য়াওরমদে। মদু ঐখোয়না করম্না খঙবগে? ঈশ্বরনা অহানবা মী আদমদা করিগুম্বা মহাক্না পাপ তৌরবদি শোয়দনা শিগনি হায়রম্মী। করিগুম্বা আদমনা পাপ তৌরমদ্রবদি, মহাক কৈদৌনুংদা শিরমলোই। (মৈহৌরোন ২:১৬, ১৭; ৫:৫) বাইবলনা হায়বগী মতুং ইন্না অশিবা হায়বসি মীওইবশিংদা আদমগী খুত্থাংদগী ‘চঙলকখি।’ মতৌ অসুম্না পাপ অমসুং মসিগী ফংফম থোকপা অশিবা হায়বসি আদমনা মহাক্কী মচা-মশুশিংদা পুরকখি। আদমনা ঐখোয়দা  পুরকখিবা পাপ অদুদগী কনবিনবা থাদোকমল অমা ঐখোয়না দরকার ওই।—রোমীয় ৫:১২; ৬:২৩ পাবিয়ু।

ঐখোয়বু অশিবদগী কনবিনবা কনানা থাদোকমল পীবা ঙমগদগে? ঐখোয়না শিবা মতমদা ইশাগী পাপশিং অদুখক্কী মমল পীবা ঙম্মী। মরম অসিনা, মপুঙ ফাদবা মীওইবা অমত্তনা অতোপ্পগী পাপশিংগী মমল পীবা ঙমদে।—থাগৎ ঈশৈ ৪৯:৭-৯ পাবিয়ু।

যীশুদি ঐখোয়গুম্বা মপুঙফাদবা মীওইবা নত্তে, মহাক্তি মপুঙফাবনি। মরম অদুনা মহাক্না মশাগী পাপকীদমক শিবগী দরকার লৈতে অদুগা মহাক্না কৈদৌঙৈদসু পাপ তৌখিদে। অদুবু যীশুদি মীওইবগী পাপশিংগীদমক শিখিবনি। ঈশ্বরনা মীওইবা ঐখোয়বু থোইদোক হেন্দোক্না নুংশিবি হায়বসি মহাক্কী মচানুপাবু ঐখোয়গীদমক শিবিনবা থারকপা অসিনা উৎলি। যীশুনসু ঐখোয়বু নুংশি হায়বসি মহাক্কী মপানা হায়বা ইন্দুনা ঐখোয়গীদমক মহাক্কী পুন্সি পীবিখিবা অদুনা তাকই।—যোহান ৩:১৬; রোমীয় ৫:১৮, ১৯ পাবিয়ু।

যীশুনা করিগীদমক শিখিবনো? হায়রিবা ভিদিও অসি য়েংবিয়ু

যীশুনা পৃথিবীদা লৈরিঙৈ মতমদা অনাবা ফহল্লম্মী, অশিবশিং হিংগৎহল্লম্মী অমসুং মীশিংবু খুদোংথিবদগী কনবিরম্মী। মহাক্না তৌরম্লিবশিং অদুনা হায়বা ইনবা মীওইশিংগীদমক তুংদা করি তৌরক্কদৌরিবগে হায়বদু উৎথোকলম্মী। (মাত্থি ১৫:৩০, ৩১; যোহান ৫:২৮) যীশুনা শিখ্রবা মতুংদা ঈশ্বরনা মহাকপু উবা ঙমদবা শকওং ওইনা হিংগৎহনবীখি। (১ পিতর ৩:১৮) পৃথিবী পুম্বগী মথক্তা নিংথৌ ওইনা পান্নবগী হক অদু যেহোবানা মঙোন্দা শিন্নদ্রিবা ফাওবা যীশুনা ঈশ্বরগী য়েৎ থংবা নাকন্দা ফমদুনা ঙাইখি। (হিব্রু ১০:১২, ১৩) হৌজিক্তি যীশুনা স্বর্গদা নিংথৌ ওইনা পাল্লে অদুগা মহাক্কী তুংইনবশিংনা হায়রিবা নুংঙাইবা পাউ অসি পৃথিবী শীনবা থুংনা পীরি।—দানিয়েল ৭:১৩, ১৪; মাত্থি ২৪:১৪ পাবিয়ু।

থুনমক, যীশুনা নিংথৌ অমা ওইনা মহাক্কী শক্তি শীজিন্নদুনা অৱা-অনা অমসুং মসিবু থোকহল্লিবশিংবু মাঙহল্লগনি। যীশুদা থাজবা থম্বা অমসুং হায়বা ইনবা মীপুম খুদিংমক্না পৃথিবীদা ওইগদবা পারাদাইসতা নুংঙাইনা হিংবা ফংগনি।—থাগৎ ঈশৈ ৩৭:৯-১১ পাবিয়ু।