ঈশ্বরগী নিংথৌলৈবাক অসি স্বর্গগী ওইবা লৈঙাক অমনি। হায়রিবা লৈঙাক অসিনা পৃথিবীদা লৈরিবা অতোপ্পা লৈঙাক খুদিংমকপু মাঙহল্লগনি। ঈশ্বরনা মসি শীজিন্নদুনা মহাক্কী অনীংবা অদু স্বর্গ অমসুং পৃথিবীদা থুংহল্লগনি। মসি ঐখোয়গীদমক য়াম্না নুংঙাইবা পাউনি। মীওইবনা অফবা লৈঙাক অমা দরকার ওই, মদু ঈশ্বরগী নিংথৌলৈবাক্না থুনমক থুংহল্লগনি। মসিনা পৃথিবীদা লৈরিবা মীপুম খুদিংমকপু অমত্তা ওইনা পুনশীনগনি।—দানিয়েল ২:৪৪; মাত্থি ৬:৯, ১০; ২৪:১৪ পাবিয়ু।

নিংথৌলৈবাক অমা হায়বসি লৈঙাক মখল অমনি। মসিগী মকোক্তি নিংথৌ অমনা ওইগদবনি। যেহোবানা মহাক্কী মচানুপা যীশু খৃষ্টবু মহাক্কী নিংথৌলৈবাক্কী নিংথৌ ওইনা খনখ্রে।—ফোংদোকপিবা ১১:১৫ পাবিয়ু।

ঈশ্বরগী নিংথৌলৈবাক করিনো? হায়রিবা ভিদিও অসি য়েংবিয়ু

ঈশ্বরগী মচানুপা অসি ফিদমনীংঙাই ওইবা নিংথৌ ওইরিবগী মরমদি মহাক্তি থৌজাল হৈ অমসুং অচুম্বগীদমক লেপ্পী। (মাত্থি ১১:২৮-৩০) মীশিংবু মতেং পাংবা ঙম্বগী চপচাবা শক্তিসু মঙোন্দা লৈ মরমদি মহাক্না স্বর্গদগী পৃথিবীদা পানগনি। মহাক হিংগৎলবা মতুংদা স্বর্গদা চৎখি অমসুং যেহোবাগী য়েৎথংবা নাকন্দা ফমদুনা মহাক্কী শাসনগী মতমদু ঙাইজখি। (হিব্রু ১০:১২, ১৩) অরোয়বদা ঈশ্বরনা মঙোন্দা শাসন তৌবা হৌনবগী শক্তি পীখি।—দানিয়েল ৭:১৩, ১৪ পাবিয়ু।

“অশেংবা মীশিং” হায়না কৌবা মীওই কাঙলুপ অমগা যীশুগা স্বর্গদা শাসন তৌমিন্নগনি। (দানিয়েল ৭:২৭) অহানবা ওইনা খনখিবা অশেংবা মীশিং অদুদি যীশুগী হায়বা ইনবা পাখোনচৎপশিংনি। যেহোবানা হায়বা ইনবা নুপা অমসুং নুপীশিংবু অশেংবা মীশিং ওইনা খনবগী থবক হৌজিক ফাওবা চত্থরি। যীশুগুম্না মখোয়সু উবা ঙমদবা শকওং ওইনা হিংগৎহল্লি।—যোহান ১৪:১-৩; ১ কোরিন্থীয়া ১৫:৪২-৪৪ পাবিয়ু।

 মী কয়া স্বর্গদা চৎকনি? স্বর্গদা চৎকদবশিংবু যীশুনা “অপিকপা য়াউ শঙ্গু” হায়না কৌরম্মী। (লূক ১২:৩২) মখোয়গী মশীং অসি ১,৪৪,০০০ শুগনি। মখোয়না যীশুগা লোয়ননা স্বর্গদগী পৃথিবীদা শাসন তৌগনি।—ফোংদোকপিবা ১৪:১ পাবিয়ু।

যীশুনা ঈশ্বরগী নিংথৌলৈবাক্কী নিংথৌ ওইনা শোক ১৯১৪ দগী শাসন তৌবা হৌখি। * নিংথৌ অমা ওইনা মহাক্কী ইহান হানবা থবক্তি সৈতান অমসুং মহাক্কী তুংইনবা স্বর্গদূতশিংবু পৃথিবীদা লংথখিবা অদুনি। মদুদগী সৈতান্না মৈ হৌনা শাউরদুনা পৃথিবী পুম্বদা অৱা-অনা থোকহনবা হৌখি। (ফোংদোকপিবা ১২:৭-১০, ১২) মতম অদুদগী মীওইবগী অৱাবা খঙহেন হেনগৎলকখি। লান, চাক্তাঙবা, লাইচৎ অমসুং য়ুহার হাবা হায়রিবশিং অসি ঈশ্বরগী নিংথৌলৈবাক্না পৃথিবীদা থুনমক শাসন তৌরগনি হায়বগী খুদমনি।—লূক ২১:৭, ১০, ১১, ৩১ পাবিয়ু।

পৃথিবী পুম্বদা চত্থরিবা পাউশন্দোকপগী মতেংনা ঈশ্বরগী নিংথৌলৈবাক্না জাতি কয়াদগী অচৌবা মীয়াম অমবু অমত্তা ওইনা পুনশীনবা হৌখ্রে। নোল্লুকপা মীওই লাক্ষ কয়ানা নিংথৌ ওইরিবা যীশুগী প্রজা ওইরক্লি। ঈশ্বরগী নিংথৌলৈবাক্তা য়াওজনীংবা খুদিংমক্না যীশুগী হায়বা ইনবা প্রজা ওইনবা হোৎনগদবনি।—ফোংদোকপিবা ৭:৯, ১৪, ১৬, ১৭ পাবিয়ু।

চহী ১,০০০ গী মনুংদা হায়রিবা নিংথৌলৈবাক অসিনা, ঈশ্বরনা মীওইবগীদমক অহৌবদা থম্বিখিবা পান্দম অদু মপুঙ ফাহনগনি। অদুগা পৃথিবী পুম্বা পারাদাইস ওইরগনি। অরোয়বদা যীশুনা নিংথৌলৈবাক অদু মহাক্কী মপাগী খুত্তা শিন্নগনি। (১ কোরিন্থীয়া ১৫:২৪-২৬) ঈশ্বরগী নিংথৌলৈবাক্কী মরমদা অদোম্না কনাগুম্বদা হায়বীনীংবা লৈব্রা?—থাগৎ ঈশৈ ৩৭:১০, ১১, ২৯ পাবিয়ু।