নুংঙাইবা পাউগী হৌরকফম ওইরিবা, য়াইফবা ঈশ্বর যেহোবানা ইমুং-মনুংশিংবু নুংঙাই-য়াইফনা লৈহনবা পাম্মী। (১ তীমোথি ১:১১) লুহোংবা হায়বসি মহাক্না হৌদোকপিখিবনি। নুংঙাইবা ইমুং অমা ওইনবা আইন্না য়াবা মওংদা লুহোংবা হায়বসি মরু ওই। মরমদি মসিনা মতৈ-মনাও অমসুং মচাশিংগী অফবা ওই, ইঙনা লৈতানা লৈহল্লি। খৃষ্টানশিংনা লুহোংবগা মরী লৈনবা আইনগী পথাপশিং ইকাইখুম্নগদবনি।—লূক ২:১, ৪, ৫ পাবিয়ু।

লুহোংবগী মরমদা ঈশ্বরগী মীৎয়েং করিনো? ঈশ্বরনা লুহোংলবা নুপা অমসুং নুপীগী মরক্তা লেংদবা, অচেৎপা মরী লৈহন্বা পাম্মী। মতৈ-মনাওশিংগী মরক্তা অমনা অমবু থাজনবা হায়বসি যেহোবানা পাম্মী। (হিব্রু ১৩:৪) মহাক্না খাইনবা হায়বসি তুক্কৎচৈ। (মালাকী ২:১৬) খৃষ্টান অমগী নুপা নত্রগা নুপী অমনা মীতু-মীৱা লান্নবগী থবক তৌরম্লবদি মহাক্না মীওই অদুবু খাইনবা নত্রগা অতোপ্পা অমবু অমুক হন্না লুহোংবা য়াবগী অয়াবা ঈশ্বরনা পী।—মাত্থি ১৯:৩-৬, ৯ পাবিয়ু।

যেহোবানা নুপা অমসুং নুপী হায়না শেম্বীখিবা অসি মখোয়গী য়ুম্বান পুন্সিগী থৌদাংশিং পুন্না লৌমীন্ননবনি। (মৈহৌরোন ২:১৮) ইমুং অমগী মকোক অমা ওইনা, মপুরোইবা অমনা ইমুংগী দরকার ওইবা পোৎলমশিং পীগদবনি অমসুং ঈশ্বরগী মরমদা তম্বীগদবনি। মহাক্না মহাক্কী নুপীগীদমক পুন্সি কত্থোকপা ঙম্বফাওবগী নুংশিবা লৈগদবনি। মতৈ-মনাওশিংনা অমনা অমবু নুংশিগদবনি অমসুং ইকাইখুম্নগদবনি। মতৈ-মনাও খুদিংমক মপুঙফাদবা ওইবনা অমনা অমবু ঙাকপীবা হৈগদবনি। মরমদি মসি নুংঙাইবা য়ুম্বান পুন্সি অমগীদমক য়াম্না মরু ওই।—এফিসা ৪:৩১, ৩২; ৫:২২-২৫, ৩৩; ১ পিতর ৩:৭ পাবিয়ু।

য়ুম্বান পুন্সিদা খুদোংচাদবা থেংনরকপা মতমদা, নুপা নুপী অনীমক্না অমনা অমবু নুংশিনা লোয়নগদবনি। (১ কোরিন্থীয়া ১৩:৪, ৫) য়ুম্বান পুন্সিদা তোয়না থেংনবা সমস্যাশিং কোক্নবা অমগা অমগা তোঙান-তোঙান লৈনবা হায়বসি ঈশ্বরগী ৱাহৈনা অয়াবা পীদে।—১ কোরিন্থীয়া ৭:১০-১৩ পাবিয়ু।

যেহোবানা নখোয়বু নুংঙাইনা লৈহনবা পাম্মী। নখোয়গী নহা ওইরিঙৈগী পুন্সিবু কমদৌনা নুংঙাইনা লৈগদগে হায়বগী খ্বাইদগী ফবা পাউতাক মহাক্না পী। অঙাংশিংনা মখোয়গী মমা-মপাগী লৌশিং অমসুং পুন্সিদা থেংনরকপা থৌদোক কয়াদগী তমজদুনা কান্নবা লৌবদু মহাক্না পাম্মী। (কোলোসীয়া ৩:২০) নহাক্কী শেম্বীবা মপু অমসুং মহাক্কী মচানুপাবু সেবা তৌবগী নুংঙাইবদুসু যেহোবানা নখোয়দা খঙহনবা পাম্মী।—পাউ শন্দোকপা ১১:৯–১২:১; মাত্থি ১৯:১৩-১৫; ২১:১৫, ১৬ পাবিয়ু।

নখোয়না ইচাশিংগী চানবা চীঞ্জাক, লৈনবা য়ুম অমসুং শেৎনবা ফিরোল পীনবা কন্না হোৎনগদবনি। (১ তীমোথি ৫:৮) মসিগী মথক্তা অঙাংশিংনা অশেংবা নুংঙাইবা ফংননবা মখোয়না ঈশ্বর নুংশিবা অমসুং মহাক্কী মতৌ তমজনবা তাকপী-তম্বীগদবনি। (এফিসা ৬:৪) নখোয়না ঈশ্বর নুংশিবদু অঙাংশিংনা উবদা মখোয়নসু ঈশ্বর নুংশিবা তমলক্কনি। নখোয়গী তাকপী-তম্বীবদু ঈশ্বরগী ৱাহৈদা য়ুম্ফম ওইরবদি অঙাংশিংগী ৱাখল্লোনবু অফবা মায়কৈদা পুরকপা ঙমগনি।—অনীশুবা ৱায়েন ৬:৪-৭; পাউরৌ ২২:৬ পাবিয়ু।

অঙাংশিংবু পুক্নীং থৌগৎপীবা অমদি থাগৎপীবনা মখোয়দা থৌনা হাপকনি। অদুবু মখোয়বু চুমথোকপা অমসুং ৱারক-ৱাতেম্বীবসু চঙই। অসুম্না তাকপী-তম্বীবা তারবদি মখোয়না খুদোংথীবা তাগদবা লমচৎ-শাজত্তগী ঙাকথোকপা ঙমগনি। (পাউরৌ ২২:১৫) অদুম ওইনমক মখোয়বু ৱারক-ৱাতেম্বা মতমদা মীনুংশি য়াওদবা নত্রগা তমথিবা মওংদা তৌরোইদবনি।—কোলোসীয়া ৩:২১ পাবিয়ু।

যেহোবাগী সাক্ষীশিংনা মমা-মপাশিং অমদি অঙাংশিংগী কান্ননবগীদমক লাইরিক কয়া ফোঙই। লাইরিকশিংদু বাইবলদা য়ুম্ফম ওইবা ঙাক্তনি।—থাগৎ ঈশৈ ১৯:৭, ১১ পাবিয়ু।