പരിമിതികൾ ഉള്ളപ്പോഴും മറ്റുള്ളവർക്കായി. . .
ബ്രസീലിൽനിന്നുള്ള മരിയ ലൂസിയയ്ക്ക് ഒരു ജനിതകവൈകല്യം (അഷേഴ്സ് സിൻഡ്രോം) ഉണ്ടായിരുന്നു. ആ വൈകല്യമുള്ള മിക്കവർക്കും കേൾവിശക്തി നഷ്ടമാകും, പതിയെപ്പതിയെ കാഴ്ചയും ഇല്ലാതാകും. മരിയ ലൂസിയ ബധിരയായാണ് ജനിച്ചത്. കുട്ടിയായിരുന്നപ്പോൾത്തന്നെ ആംഗ്യഭാഷ പഠിച്ചു. 30 വയസ്സായപ്പോൾ കാഴ്ചശക്തിയും കുറഞ്ഞുതുടങ്ങി. ഇത്രയൊക്കെ പ്രശ്നങ്ങൾ ഉണ്ടെങ്കിലും മരിയ തന്നെത്തന്നെ ഒറ്റപ്പെടുത്തിയില്ല. ഇപ്പോൾ 70 വയസ്സ് കഴിഞ്ഞു. അവരുടെ ജീവിതം ഇപ്പോഴും സന്തോഷവും സംതൃപ്തിയും ഉള്ളതാണ്.
മരിയ ലൂസിയ 1977-ൽ യഹോവയുടെ സാക്ഷികളെ കണ്ടുമുട്ടി. അപ്പോൾ മരിയയ്ക്ക് കാഴ്ചശക്തി നഷ്ടപ്പെട്ടുതുടങ്ങിയിരുന്നില്ല. യഹോവയുടെ സാക്ഷികളെ കണ്ടുമുട്ടിയതിനെക്കുറിച്ച് മരിയ പറയുന്നത് ഇങ്ങനെയാണ്: “ഞാൻ ഒരു ദിവസം, എന്റെകൂടെ സ്കൂളിൽ പഠിച്ച അഡ്രിയാനോയെ കണ്ടു. അവൻ യഹോവയുടെ സാക്ഷിയായിട്ട് അധികം നാളായിട്ടില്ലായിരുന്നു. ഭാവിയിൽ ഭൂമി ഒരു പറുദീസയാകും, എല്ലാ മനുഷ്യർക്കും പൂർണാരോഗ്യം കിട്ടും എന്നൊക്കെയുള്ള ദൈവത്തിന്റെ ഉറപ്പ് അവൻ എനിക്കു കാണിച്ചുതന്നു. എനിക്ക് അതെല്ലാം ഒരുപാട് ഇഷ്ടമായി. ഞാൻ ഒരു ബൈബിൾപഠനം സ്വീകരിച്ചു. പെട്ടെന്നുതന്നെ ഞാൻ റിയോ ഡി ജനൈറോയിലുള്ള ഒരു സഭയിൽ പോകാൻതുടങ്ങി. അവിടെ ചില യോഗങ്ങൾ ആംഗ്യഭാഷയിലേക്ക് പരിഭാഷ ചെയ്തിരുന്നു. യഹോവയുടെ സഹായത്താൽ എനിക്ക് ആത്മീയമായി പുരോഗമിക്കാൻ പറ്റി. 1978 ജൂലൈയിൽ ഞാൻ സ്നാനമേറ്റു.”
കുറച്ച് കഴിഞ്ഞപ്പോൾ മരിയ മറ്റൊരു സഭയിലേക്കു മാറി. അവിടെ ആംഗ്യഭാഷ അറിയുന്ന ആരുമുണ്ടായിരുന്നില്ല. ആദ്യമൊക്കെ അതു വളരെ ബുദ്ധിമുട്ടായിരുന്നു. കാരണം മീറ്റിങ്ങിൽ പറയുന്നതൊന്നും മരിയയ്ക്കു മനസ്സിലായില്ല. എന്നാൽ പിന്നീട് രണ്ടു സഹോദരിമാർ സഹായിക്കാൻതുടങ്ങി. അവർ മീറ്റിങ്ങിന്റെ സമയത്ത് മരിയയുടെ കൂടെ ഇരിക്കും. എന്നിട്ട് മീറ്റിങ്ങിൽ പറയുന്ന കാര്യങ്ങൾ ഒരു നോട്ടിൽ എഴുതിക്കൊടുക്കും. മരിയ പറയുന്നു: “ഞാൻ വീട്ടിൽച്ചെന്ന് ഈ നോട്ടുകൾ വീണ്ടുംവീണ്ടും നോക്കും. അങ്ങനെ ഞാൻ കാര്യങ്ങൾ മനസ്സിലാക്കും. കുറച്ചു കഴിഞ്ഞപ്പോൾ ആ രണ്ടു സഹോദരിമാർ ആംഗ്യഭാഷ പഠിച്ചു. അങ്ങനെ അവർ എന്റെ പരിഭാഷകരായിത്തീർന്നു.”
പിന്നീട് മരിയ ലൂസിയയുടെ കാഴ്ചശക്തി തീരെ ഇല്ലാതായിത്തുടങ്ങി. പരിഭാഷകർ ചെയ്യുന്ന ആംഗ്യങ്ങളൊന്നും കാണാൻ പറ്റാതായി. അങ്ങനെ മരിയ ടാക്റ്റൈൽ ആംഗ്യഭാഷ ഉപയോഗിച്ചുതുടങ്ങി. അത് എന്താണെന്ന് മരിയതന്നെ പറയുന്നു: “പരിഭാഷ ചെയ്യുന്നവരുടെ കൈയുടെ മുകളിൽ ഞാൻ എന്റെ കൈ വെക്കും. അങ്ങനെ പരിഭാഷകർ ചെയ്യുന്ന ആംഗ്യം എന്താണെന്ന് എനിക്ക് തൊട്ടറിയാനാകും.”
ഈ പരിഭാഷകരോട് മരിയ ലൂസിയയ്ക്ക് വളരെയധികം നന്ദിയുണ്ട്. മരിയ പറയുന്നു: “യഹോവയിൽനിന്നുള്ള വിലപ്പെട്ട സമ്മാനങ്ങളാണ് അവർ. അവരുടെ സഹായത്താൽ എനിക്കു മീറ്റിങ്ങുകളും സമ്മേളനങ്ങളും കൺവെൻഷനുകളും നന്നായി മനസ്സിലാക്കാനും അതിൽനിന്ന് പ്രയോജനം നേടാനും പറ്റുന്നു.”
മരിയ ലൂസിയ ശുശ്രൂഷയിൽ നല്ല ഉത്സാഹത്തോടെ പ്രവർത്തിക്കുന്നു. ടാക്റ്റൈൽ ആംഗ്യഭാഷ ഉപയോഗിച്ച് ബധിരരായ ആളുകളോട് സാക്ഷീകരിക്കും. സന്തോഷവാർത്ത അറിയിക്കാനുള്ള മരിയയുടെ ഈ ശ്രമം കാണുമ്പോൾ അവർ അത്ഭുതപ്പെട്ടുപോകാറുണ്ട്. കോവിഡ് 19-ന്റെ സമയത്ത് ബധിരരായ ആളുകൾക്ക് മരിയ ധാരാളം കത്തുകൾ എഴുതി. അതിന് അനിയനായ ജുസേ അന്റോണിയോയും സഹായിച്ചു. അദ്ദേഹത്തിനും കേൾവിശക്തിയും കാഴ്ചശക്തിയും ഇല്ല. a
എങ്ങനെയാണ് ഈ കത്തുകൾ എഴുതുന്നത്? മരിയ പറയുന്നു: “ഞാൻ ‘L’ രൂപത്തിലുള്ള ഒരു പ്ലാസ്റ്റിക് ഷീറ്റ് ഉപയോഗിക്കും. അത് ഉള്ളതുകൊണ്ട് പേപ്പറിൽ എഴുതുമ്പോൾ വളഞ്ഞുപോകാതിരിക്കാനും ഖണ്ഡികകളായി എളുപ്പം തിരിക്കാനും എനിക്കാകുന്നു. അനിയനായ ജുസേയ്ക്ക് നല്ല ഓർമശക്തിയാണ്. അവൻ ചില വിഷയങ്ങളും ബൈബിൾവാക്യങ്ങളും പറഞ്ഞുതരും. ഞാൻ അത് കത്തിൽ ഉൾപ്പെടുത്തും. ബധിരർക്കു മനസ്സിലാകുന്ന രീതിയിലാണ് ഞാൻ കത്തുകൾ എഴുതുന്നത്. കാരണം എല്ലാ ബധിരർക്കും എഴുത്തുഭാഷ അത്രയ്ക്കു വശമില്ല.”
മരിയ ലൂസിയയ്ക്ക് ഇപ്പോൾ ഒട്ടും കാഴ്ചശക്തി ഇല്ല. എങ്കിലും മരിയ വളരെ കഠിനാധ്വാനിയാണ്. അവരുടെ ഒരു പരിഭാഷകയായ കരോളിൻ പറയുന്നു: “മരിയ വീട്ടിലെ എല്ലാ പണിയും ചെയ്യും. വീട് എപ്പോഴും വൃത്തിയാക്കി എല്ലാം അടുക്കിപ്പെറുക്കി വെക്കും. ഭക്ഷണമൊക്കെ ഉണ്ടാക്കാനും അത് എല്ലാവർക്കും കൊടുക്കാനും മരിയയ്ക്ക് വളരെ ഇഷ്ടമാണ്.”
അവരുടെ സഭയിലെ ഒരു മൂപ്പനാണ് ജഫേഴ്സൺ. അദ്ദേഹം പറയുന്നു: “മരിയയ്ക്ക് യഹോവയോട് വളരെയധികം സ്നേഹമുണ്ട്. സഹോദരി ആളുകളെയും സ്നേഹിക്കുന്നു. മറ്റുള്ളവർക്ക് പ്രയോജനം ചെയ്യുന്ന കാര്യങ്ങളാണ് എപ്പോഴും ചെയ്യുന്നത്. ഒട്ടും സ്വാർഥത ഇല്ലാത്ത ഒരു വ്യക്തിയാണ് മരിയ.”—ഫിലിപ്പിയർ 2:4.
a മരിയ ലൂസിയയ്ക്കു ശേഷമാണ് ജുസേ അന്റോണിയോ ഒരു സാക്ഷിയായിത്തീർന്നത്. 2003-ൽ അദ്ദേഹം സ്നാനമേറ്റു. മരിയയെപ്പോലെ അദ്ദേഹവും ബധിരനായാണ് ജനിച്ചത്. പതിയെപ്പതിയെ കാഴ്ചശക്തിയും നഷ്ടപ്പെട്ടു.