Иисусын тӱжвал тӱсшӧ могай лийын?
Библийысе вашмут
Иисусын могай тӱжвал тӱсшӧ лийын, иктат огеш пале, вет Библийыште тидын нерген туран возымо огыл. Сандене Иисусын тӱжвал тӱсшылан шуко вниманийым ойыраш огеш кӱл. Но туге гынат Священный Возымаште тидын нерген изишак палдарыме.
Чурий. Иисус еврей лийын, да, очыни, тудо аваж деч семит тӱжвал тӱсым налын (Еврей-влаклан 7:14). Чурийже тудын ала-могай ойыртемалтше лийын огыл докан. Икана Иисус Галилей гыч Иерусалимыш шолып толын, да тудым пален налын огытыл (Иоаннын 7:10, 11). Тыгак тудо, векат, лишыл тунемшыж-влак деч тӱжвал тӱсшӧ дене ойыртемалтын огыл. Мутлан, кунам сарзе-влак Иисусым кучен налаш толыныт, Иуда Искариотлан тудым нунылан палдараш логалын (Матфейын 26:47—49).
Ӱп кужыт. Очыни, Иисусын ӱпшӧ кужу лийын огыл, вет Библийыште возымо: «Пӧръеҥ кужу ӱпан гын, тудлан тиде намыс» (1 Коринфян-влаклан 11:14).
Пондаш. Иисус пондашан лийын. Тудо иудейысе закон почеш илен, кудыж дене келшышын, пондашын тӱржым локташ ок йӧрӧ ыле (Левит 19:27; Галат-влаклан 4:4). Тыгак Иисусын орланымашыже нерген ончылгоч каласымаште тудым пондаш дене ончыктымо (Исайя 50:6).
Кап. Очыни, Иисус пеҥгыде кап-кылан лийын. Мландыште таныклымыж годым тудо шуко йолын коштын (Матфейын 9:35). Кок гана тудо иудей храмыште оксам вашталтылше-влакын ӱстелыштым савырал шуэн. А ик гана Иисус, солам ыштен, храм гыч вольыкым поктен луктын (Лукан 19:45, 46; Иоаннын 2:14, 15). Макклинток ден Стронгын энциклопедийыштышт возымо: «Чыла евангелийыште возымым шотыш налаш гын, [Иисусын] пеҥгыде тазалыкше да шуко вийже лийын манын каласаш лиеш» (IV том, 884 стр.).
Чурий ончалтыш. Иисус поро да еҥым чаманыше лийын, тидым чурийже гычынак ужаш лиеш ыле (Матфейын 11:28, 29). Тӱрлӧ еҥ тудын деч лыпландарымаш ден полышым налнеже ыле (Лукан 5:12, 13; 7:37, 38). Йоча-влакланат тудын воктенже сай лийын (Матфейын 19:13—15; Маркын 9:35—37).
Иисусын тӱжвал тӱсшӧ нерген йоҥылыш шонымаш
Йоҥылыш шонымаш. Южышт шотлат, пуйто Иисус негроидный раса гыч лийын, вет Почмаш книгаште тудын ӱпшым меж дене таҥастарыме, а йолжым — «коҥгаш шуарыме» той дене (Почмаш 1:14, 15).
Факт. Почмаш — тиде символический йылме дене возымо книга (Почмаш 1:1). Мутлан, Иисусын ӱпшӧ ден йолжо ончыктат, могай койышан тудо ылыжмаш деч вара улеш. Но тиде огеш ончыкто, могай Иисусын тӱжвал тӱсшӧ лийын, кунам тудо мландыште илен. Почмаш 1:14 почеламутышто возымо: «Тудын вуйжо да ӱпшӧ ош меж гай, лум гай ошо». Тыгай таҥастарымашым тыште структурым огыл, а тӱсым ончыкташлан кучылтмо. Ӱпын ош тӱсшӧ уш-акыл нерген ойла, кудыжо ий эртыме дене шукемеш (Почмаш 3:14). Тиде почеламутышто Иисусын ӱпшын структуржо нерген возымо огыл, вет тудын ӱпшӧ меж дене гына огыл, лум денат таҥастаралтеш.
Кончымаште Иисусын йолжо «йолгыжшо той гай, пуйто коҥгаш шуарыме» лийын (Почмаш 1:15). А тудын «шӱргыжӧ — уло вийын йолгалтше кече гай» манын возымо (Почмаш 1:16). Тыгай коваште тӱсан калык уке, сандене тиде почеламутым туран огыл, а теве кузе умылыман: ылыжше Иисус «лишемаш лийдыме волгыдышто ила» (1 Тимофейлан 6:16).
Йоҥылыш шонымаш. Иисус явыге да вийдыме лийын.
Факт. Иисус шкенжым чын пӧръеҥ семын кучен. Мутлан, кунам тудым еҥ тӱшка кучаш толын, тудо нунын ваштареш лӱддымын лектын (Иоаннын 18:4—8). Тыгак Иисус виян пӧръеҥ огеш лий ыле гын, плотник пашам ыштен огеш керт ыле (Маркын 6:3).
Молан, тугеже, Иисус полшымо деч посна меҥгыжым нумалын кертын огыл? Да молан Христос тудын дене пырля казнитлыме пӧръеҥ-влак деч ончычрак колен? (Лукан 23:26; Иоаннын 19:31—33). Казнитлыме деч ончыч лийше тергымаш-влак Иисусын шуко вийжым налыныт. Тудо йӱдвошт мален огыл, амал-влак гыч иктыже чон йӧсланымаш лийын (Лукан 22:42—44). Ту йӱдымак тудым иудей-влак мыскыленыт, а эрдене римлян-влак кыреныт (Матфейын 26:67, 68; Иоаннын 19:1—3). Очыни, тидланак кӧра тудо вашкерак колен.
Йоҥылыш шонымаш. Иисус эре кумылдымо да шӱлыкан лийын.
Факт. Иисус кавасе Ачажын, Иегован, койышыж-влакым тӱрыснек ончыктен, а Библийыште Юмо пиалан улеш манын возымо (1 Тимофейлан 1:11, УТ; Иоаннын 14:9). Тыгак Иисус весе-влакым туныктен, кузе пиалан лияш (Матфейын 5:3—9; Лукан 11:28). Сандене пеҥгыдын каласаш лиеш: Иисусын пиалан лиймыже чурийыштыжак койын.
Вас также может заинтересовать
ТӰҤ БИБЛИЙЫСЕ ТУНЫКТЫМАШ-ВЛАК
Библийын чын улмыжым кушеч ме палена?
Библийын авторжо Юмо гын, тунам тудо эн ӧрыктарыше книга лийшаш.
