ACANCE YAKAUZYA UKUTI
Uzye Kulaalana Kwa Yonsi Yatupu Nanti Anaci Yatupu Kwaipa?
David ali ni myaka 23 watile, “Intazi yonga ino nakweti lino nakulanga, i yakukumbwa alumendo yanji. Nelenganyanga ukuti ukuyuvwa viii kwali nu kuya sile ukwa pa kasita, nomba natwalilile ukuyuvwa vikwene pa nsita itali.”
David u Mwina Klistu aakalonda ukuzanzya Leza. Nomba uzye angazanzya Leza lino akukumbwa aonsi yauze? Uzye Leza akauvwa uli pa kulaalana kwa yonsi yatupu nanti anaci yatupu?
Uzye Baibo yalandapo uli?
Vino antu yakalola ukulaalana kwa yonsi yatupu nanti anaci yatupu vikapusana pusana kulingana ni ntambi nanti insita. Nomba Aina Klistu yasitungululwa na vino antu yakalanda nanti “kusendwa na maimbi ukuli konsi kupitila umu visambilizyo vya misango yonsi.” (Efeso 4:14) Lelo yakalondela vino Baibo yalanda pa ukulaalana kwa yonsi yatupu nanti anaci yatupu (na pa miyele yuze iipe).
Baibo yalanda umu kulungatika pa kulaalana kwa yonsi yatupu nanti anaci yatupu. Izwi Lyakwe Leza likati:
“Utalinzile ukupanga icupo nu monsi muzo wakwe vino ungapanga icupo nu mwanaci.”—Aina Levi 18:22.
“Leza wayalesile ukuti yacita ivintu ivikowele, . . . wayalesile ukuti yatungululwa ni nsuna iyaula ukuikanya, pano anaci yatiile ukupanga icupo umu nzila ya civyalilwa.”—Loma 1:24, 26.
“Mutaabepwa. Antu aakacita uzelele, aakapepa ivilubi, aakacita ucende, aonsi aakazumilizya aonsi yauze ukucita nayo uzelele, aonsi aakacita uzelele na onsi yauze, apuupu, alunkumbwa, ya cakolwa, aantusi, na acenjezi yatalingila umu Wene wakwe Leza.”—1 Kolinto 6:9, 10.
Amasunde yakwe Leza yakalanda pa antu yonsi, aakacita uzelele uwa yonsi yatupu nanti anaci yatupu nanti aakacita uzelele uwa monsi nu mwanaci. Fwandi umuntu alinzile ukuikanya ndi cakuti watunkwa ukucita ivintu ivisizanzya Leza.—Kolose 3:5.
Uzye cii cikupiliula ukuti . . . ?
Uzye cii cikupiliula ukuti Baibo ikalanda ukuti tulinzile ukupata aonsi akalaala na aonsi yauze?
Awe. Baibo isitunena ukuti tulinzile ukupata umuntu ali wensi, ukwikako sile na aonsi aakalalana na aonsi yauze nanti umonsi nu mwanaci aakacita uzelele. Lelo ikatunena ukuti “mwaezya na maka ukuya amutende uku yantu yonsi,” usi mulandu ni miyele ino yakwata. (Aebele 12:14) Fwandi citaya ningo ukucuzya, ukuya nu unkalwe, nanti ukucita ivipe ivili vyonsi uku yantu aakalalana na aonsi yauze nanti anaci yauze.
Uzye cii cikupiliula ukuti Aina Klistu yakakaanya masunde akazumilizya aonsi ukutwalana na aonsi yauze nanti anaci ukutwalana na anaci yauze?
Baibo ikalanda ukuti ukulonda kwakwe Leza ukwakuti umonsi nu mwanaci ali yano yalinzile sile ukutwalana. (Mateo 19:4-6) Nomba masunde aakalanda pa kutwalana kwa yonsi yatupu nanti anaci yatupu kwaya pa vikanza vya miteekele, yasilanda pa viipe ni visuma. Baibo ikanena Aina Klistu ukukanaika umu vikanza vya miteekele. (Yoani 18:36) Fwandi Aina Klistu yasitungilila nanti ukukanya amasunde amu uteeko aakalanda pa kutwalana kwa yonsi yatupu nanti anaci yatupu nanti ukulaalana kwa yonsi yatupu nanti anaci yatupu.
Nga ndi cakuti . . . ?
Nga ndi cakuti umonsi akulaalana nu monsi muze nanti umwanaci akulaalana nu mwanaci muze, angasenuka?
Ee. Vikwene ali vino cali uku yonsi yamwi na anaci yamwi aliko umu insita ya Ina Klistu akutandikilapo. Pa cisila cakulanda ukuti aonsi aakalaalana na aonsi yauze na anaci akalaalana na anaci yauze yatalingila umu Wene wakwe Leza, Baibo ikalanda ukuti: “Yamwi pali mwemwe avino mwali.”—1 Kolinto 6:11.
Uzye cii cikupiliula ukuti aonsi aleka ukulaalana na aonsi yauze na anaci aleka ukulaalana na anaci yauze yasiiusya vino yacitanga mpiti? Awe. Baibo ikalanda ukuti: “zwalini untu upya, uukalengwa ukuya upya ukupitila umu kumanya kwa cumi.” (Kolose 3:10) Tukaya tukusenuka panono panono.
Nga ndi cakuti umuntu umwi aakulonda ukutandika ukulondela masunde yakwe Leza acili na melenganyo aakulondesya ukucita uzelele nu monsi muze nanti umwanaci muze?
Ndi cakuti caya vii, umuntu alinzile ukuisoolwela ndi kuti angacita ukulingana na vino akuyuvwa nanti foo. Angacita uli vivyo? Baibo ikati: “mwatungululwa nu mupasi alino mutalaalondela vino imili ikalonda.”—Galatiya 5:16.
Cikomo cii cisilanda ukuti umuntu atanga atungululwe na vino umwi wakwe ukalonda. Lelo ndi cakuti umuntu akuisambilizya Baibo nu kupepa lyonsi, angakwata amaka yakucimvya itunko ilya kucita vino umwili wakwe ukulonda.
David wino itulandapo pa kutandika kwa cipande cii wazanyile ukuti vii ivya cumi sana sana lino wanenyile avyazi yakwe Aina Klistu pa ntazi ino wakweti. Walanzile ukuti “Cali kwati yanjisisya icisendo icifine, nupya injanena zuwa, nga naipakizye umi lino nali umwance.”
Fwandi tukaya sana ni nsansa ndi cakuti tukulondela masunde yakwe Yeova. Twasininkizya ukuti masunde yakwe “yaya alungame. Yao akayalondela yakasansamukila mwenemo,” nupya ndi cakuti tukuyalondela tulapokelela “cilambu icikalamba.”—Masamu 19:8, 11.
