Ukulingana nu kulondelezya ukwaliko pa muku umwi, aina America acance ukufika uku mapesenti 80 yakapepa, lelo afu sile pali yayo aakapepa cila wanda. Ukwaula nu kutwisika yamwi pali yayo yakaelenganya ukuti: ‘Uzye ipepo likalenga sile umwi ukuvwa ningo, nanti kwaya na vyuze?’

•  Uzye ipepo i cani?

•  Uzye Leza akauvwa mapepo?

•  I vyani vino ningapepelapo?

•  Vino auzo yakalanda

 Ipepo u kulanzyanya na Kaumba wa vintu vyonsi. Tala elenganya vino cii cikupiliula! Yeova wacila antu muli vyonsi, lelo ‘ataaya ukutali naswe.’ (Milimo 17:27) Nupya muli Baibo mwaya ulwamo lwa kuzungusya ulwakuti: “Mupalame kuli Leza, nga nawe amapalama kunomuli.”—Yako. 4:8.

 Uzye ungapalama uli kuli Leza?

•   Inzila yonga u kupitila umwi pepo—yii ali nzila ino ungalandilamo kuli Leza.

•   Inzila yuze u kupitila umu kusambilila Baibo—yii ali nzila ino Leza “akalandila” kuli wewe.

 Ukulanzyanya kwa musango uwo, kuli kuti ukupepa nu kusambilila Baibo, vilakwavwa ukukomya ucuza na Leza.

 “Ukulanda kuli Yeova, kuli kuti ukulanzyanya nu wa Papelapela, i syuko ilikalamba lino antu yakwata.”—Jeremy.

 “Ukunena Yeova vyonsi ivili uku mwenzo ukupitila umwi pepo kukalenga nayuvwa ukuti indi umupiipi sana nawe.”—Miranda.

 Nanti icakuti wazumila muli Leza, nupya ukapepa kuli aliwe, cingatala ukuzumila ukuti umu cumi akauvwa mapepo. Lelo Baibo ikalanda ukuti Yeova ‘akauvwa amapepo.’ (Masamu 65:2) Nupya ikalanda ukuti “ikini masakamiko inu pali Leza.” U mulandu ci? “Pano wene akamusakamala.”—1 Petulo 5:7.

 Vino ulinzile ukwelenganyapo: Uzye lyonsi ukalanzyanya na ya cuza yako apalamisye? Vivyo kwene avino ungacita na kuli Leza. Uwalanda nawe lyonsi umwi pepo, nupya uwacita vivyo ala ukulumbula ni zina lyakwe ilya kuti Yeova. (Masamu 86:5-7; 88:9) Baibo ikalanda ukuti “pepini nsita zyonsi.”—1 Tesalonika 5:17.

 “Nkalola ipepo ukuti u kulanzyanya na Tata wane uwa kwi yulu, nupya nkamunena vyonsi ivili uku mwenzo.”—Moises

 “Nkanena Yeova vyonsi, wakwe vino nkanena ya mayo nanti cuza wane umupalamisye sana.”—Karen.

 Baibo ikalanda ukuti: “Pepini pamulandu wa vintu vyonsi, mule mukulenga Leza nu kutaizya mu myenzo.”—Filipi 4:6.

 Uzye cii cikupiliula ukuti caya sile ningo ukupepela pa ntazi zyako? Ee! Pano na Baibo ikalanda ukuti: “Uwatuula masakamiko yako kuli Yawe, nawe amakuwakanga.”—Masamu 55:22.

 Lelo lino ukupepa kuli Leza, ungalanda na pali vyuze ukucila ukulanda sile pa ntazi zyako. Umukazyana umwi uwi zina lyakuti Chantelle walanzile ukuti: “Utanga uye a ucuza usuma ndi cakuti nkulenga sile ukuti Yeova angavwe. Nkayuvwa ukuti inkoleelo mfwile ukutaizya, nupya ivintu vino nkutaizizyapo vifwile ukuvula.”

 Vino ulinzile ukwelenganyapo: I vyani vino ukataizya umu umi wako? Uzye ungelenganya pa vintu vitatu vino ungataizizyapo Yeova ilelo?

 “Nanti sile akantu akanono akali wa kulola iluwa ilisuma, kangatulenga ukutaizya Yeova.”—Anita.

 “Ungelenganya pali cimwi pa vintu vino Yeova waumba icikakuzanzya nanti apa cikomo cimwi ica mu Baibo icikakufika sana pa mwenzo, nu kutaizya Yeova.”—Brian.