Nluku eekhweeli khanlee Mpattusi ocitthu coothene. Uyo khancerale ni khankhicera. (Isaalimu 90:2) Uyo nnro urina ihapari comaana cimphwanyannyaa mbiiblyani. (1 Timotiyu 1:11) Ukhala wiira Nluku phinivahale ukumi, nihaana unswalela uyova paahi.​—Usome Apokalipise 4:11.

Khaavo pinaatamu moonale Nluku nlattu uyo Nnepa phimaana nthoonyera wiira uyo haana ukumi muulupale woovikana nnye cumpalyaawe ntuniyani. (Joau 1:18; 4:24) Vano, nihaana nicuwelaka makhalelo a Nluku nhina wo citthu cumpalyaawe. Wootakihera, uvirikana wo mihokorokho ni ittuva unthoonyera nifentonawe ni ucuwelacawawe. Moonuwelo otuniya anoonihera ikuru ca Nluku​—Usome Arooma 1:20.

Pooti wiitthuca-tho makhalelo a Nluku nisomaka Ibiiblya. Wootakihera ila inaanihimerya isiyani inoncivela Nluku ni ile inonkasiri, cinaatafityaawe atthu, ni mananna cinwaceraawe cookhumelela khula ukathi.​—Usome Isaalimu 103:7-10.

Yesu eerale: “Paapeehu wiirimu, ncinaninyu nikhale nootteelihiya.” (Matewus 6:9) Unookhalaru wiira Nluku haana meehaneliyo menci, rinaa ncina nimoca paahi. Khula iluuka, inaavirikaniha meehaneliyaawe. Ni Emakhuwa Emeetto neehaniya “Yehova.”​—Usome Isaalimu 83:18.

Ibiiblya cinci ncina na Nluku nihaakakhanihiya ni neehaneliya Nluku awula Pwiiya. Masi uwakathi wantikhiyaya  Ibiiblya, ncina na Nluku naholepiya imaaracene coovikana 7.000. Yesu ahothoonyiha ncina na Nluku waasomihaawe atthu myaha ca Nluku.​—Usome Joau 17:26.

Uhuva woothene urivo unthoonyera wiira Yehova Nluku khanniwacera hiivano? Atthu akhwaawe aneera uyo phinnihuviha wiira anittehe masi iyo khinakhala ikhweeli.​—Unsome Tiyaku 1:13.

Nluku honttittimiha pinaatamu unvahawawe uthanla yooncivela. Khaninoona ukhala itthu yoorera unihiya nithanlaka unswalela Nluku? (Josuwe 24:15) Masi atthu enci ahothanla upanka citthu cowaananara akhunanaya, phimaana ukhalaka uhuva. Yehova unanmweryaa nnrima wanoonaawe atthu ahuvihanaka.​—Usome Uphattuwaca 6:5, 6.

Yehova khanlee Nluku nniwacera hiivano. Uyo mpheela niphwanye ukumi wooniciva. Woohipica, uyo naarwaa umaliha uhuva ni ale ankhuniha mahuviho. Ihinaaya iyo wiirannyaa, haana isariya yoohiyerera uhuva. Mpantta 8,ninaarwaa wiitthuca yeeyo isariyeeyo.​—Usome 2 Peturu 2:9; 3:7, 13.

Yehova naanilattula umwaattamela ninlompaka. Uyo nanwacera khula ntthu. (Isaalimu 65:2;145:18) Nluku naapheela unilevelela ni nawoona wiikhurumicawihu wiira nintteelihe, hataa wanvonyeehu woohilakela. Co, ninoopahuwaru, ninaakhitiri umpatthanana Nluku.​—Usome Isaalimu 103:12-14; Tiyaku 4:8.

Ukhala wiira Yehova honivaha ukumi, nihaana ninfentaka cinene woovikana cinaafenteehu atthu akhwaawe. (Markus 12:30) Ukathi unhalaa uthoonyera unfenta Nluku, wiitthuka-tho myahacawe ni upankaka inlepelaawe, weeva unaahala umwaattamela Nluku.​—Usome 1 Timotiyu 2:4; 1 Joau 5:3.