Ro tegø a Los Ángeles (California, Estados Unidos), kja na jñiñi nu ja yo ntee dya jꞹ̱ji na punkjꞹ mechi, nujnu mi pøji droga, mi bʼꞹbʼꞹ ntee yo ja nrre mi pejñi kja ñiji ñe mi jodʼꞹji chu̱ʼu̱. Mi nana go musʼꞹ nziyo trʼii ñe ye xuntrʼi ngezgø kʼꞹ yeje de yo ñanto.

Ma kja mi tsʼikʼe, in nana mi sinzgojme kja na templo evangélico. Pe ma a mi trjꞹmbeñegø dya ro kjapkʼø nguenda kʼo rgua pjechigønu. Yo nrromgo mi tjo̱jo̱gø kja na coro kja kʼꞹ templo, kja nrro dyaja paa mi pago kja yo mbaxkua, mi sigø droga, mi tsa̱ja̱gø nrrinxu, kʼo nrre mi kjagø mi ma sʼoo.

Ma pje kʼo mi kjakꞹji me mi mbɇkuɇgø nabadiji. Texe kʼo mi tøtʼꞹ mi usagø nza kja na arma ngekʼua ro to̱njo̱ kʼꞹ chu̱ʼu̱. Dya go mbøxkꞹgø kʼo ro pjechkø kja kʼꞹ templo nu ja mi pagø ma mi trʼigø ro jyombeñe texe. Mi mangø: “E Mizhokjimi nge kʼꞹ jꞹnguenda y nutsʼkø ri nee ra pjøsʼꞹ ra tsjaayo”. Ma mi kjuarꞹ yo kjɇɇ sesenta, a mi ɇdyigø 18 kjɇɇ, ma joo ma ⱥrⱥgø kʼo mi mbeñe na grupo político ke mi chju̱u̱ Panteras Negras, angezeji mi nee ro ñanaji yo derecho yo ntee. Ro kichkʼø kja na grupo ko yo trʼii ke xo mi ñanaji yo derecho yo ntee. Mi bʼꞹbʼꞹ paa kʼo dya mi tsʼaa clase kja kʼꞹ skuela nange na punkjꞹ de nutsʼkøjme yo tʼii mi paa kjajme yo protesta.

Pe mi bʼꞹbʼꞹ kʼo xi mi nee ro kjagø. Ne mbɇkuɇ nu mi søgø mi kjakꞹ ro maa kjagø yo na sʼoo. Nzakja, ko in amigo mi pojme kja cine, nujnu mi jandajme yo película nu ja yo ntee yo ma tʼøxꞹ mi pⱥrⱥji yo esclavo africano de Estados Unidos. Me mi mbɇkuɇgøjme ma ro janrrajmekʼo, ngekʼua kja kʼꞹ cine ro pⱥrⱥjme kʼo trʼii kʼo mi ka̱ra̱nu yo ma tʼøxꞹ xo mi pojme kja kʼo barrio nu ja mi ka̱ra̱ yo ntee yo ma tʼøxꞹ y mi pⱥrⱥjme.

Yo in kjuarma ñezgø a mi pa̱ka̱jme yo policía nangeje mi kjajme na punkjꞹ kʼo na sʼoo. Na in kjuarma kʼꞹ más mi sebʼi mi bʼꞹbʼꞹ kja na pandilla ke xo mi kjaji kʼo na soʼo y nutsʼkø xo mi dyokjø ko angezeji. Pama pama mazi mi kjagø kʼo me na sʼoo.

Yo tata kʼꞹ naja in amigo mi ngeji testigo e Jehová, angezebi go mbitazꞹgø nu ja mi jmurꞹji. Kʼꞹ otrʼꞹ paa ke ro magø nu ja mi jmurꞹji ro unkø nguenda ke yo ntee ke mi pojinu mi kjaji kʼo na joo. Texeji mi trjɇji in Biblia y mi usaji. ¡Asta yo tʼii mi unꞹji discurso! Me ro kentrjogø ma ro pa̱rgø ke nu trju̱u̱ Mizhokjimi nge Jehová, y angezeji mi nⱥmbʼⱥji o trju̱u̱ (Salmo 83:18). Zø mi bʼꞹbʼꞹ ntee ke nandyo mi menzumꞹji mi bʼꞹnji na joo dya mi chu̱ji.

Dya mi negø ro jitsʼkøji kʼo mama nu Biblia, pe mi nee ro magø kja yo reunión. Na xoma, ro magø kja na reunión pe yo in amigo o moji kja na concierto, angezeji go nzhotꞹji na trʼii jesta ke go mbotrji y o nganaji in chaqueta de cuero. Ma o jyasʼꞹ angezeji mi chumboji, ñe mi trjeñeji kʼo bi tsjaji. Ma o jñꞹnpꞹji nguenda kja juicio mi mbeñeji ke kʼo bo tsjaji dya ma sʼoo. Na punkjꞹ kʼo go sentenciaoji a cadena perpetua. ¡Me ro mⱥkjø ke dya mi dyokjø ko angezeji kʼꞹ xoma! Ndizi kʼꞹ paa, ro nee ro potꞹgø in vida y ro pjꞹrꞹgø ro xørgø ne Biblia.

Dya mi negø yo ntee yo ma tʼøxꞹ, pe ma ro jandagø kʼo mi kjaji yo testigo e Jehová me ro kentrjogø. Nzakja ma ro janda ma na testigo e Jehová o maa na je̱e̱ y bo zogꞹ in trʼii ko na familia ke ma potrjꞹ. Xo na familia ke ma tʼøxꞹ o unꞹ sjɇtsi na trʼii kʼꞹ ma potrjꞹ ro oxꞹ kja o ngumꞹ. Ma ro nugøyo ro unkʼø nguenrra ke yo testigo e Jehová kjaji yo o mama e Jesús kja Juan 13:35: “Ma ri pøtki sʼiyaji, a kjanu ra mba̱ra̱ texe yo ntee ke ngetsʼkʼeji in discípulotsʼꞹji“. Akjanu ro pa̱ra̱ ke rgua tøtrʼꞹ yo kjuarma yo na kjuana.

Ma xi ro pjechigø kʼo mama ne Biblia ro meya ke me ma mubi ro potꞹgø in vida. Ngekʼua ro kjagø lucha pa dya ro mbɇkuɇ nabadiji, y ro jodʼꞹ ja rgua bʼꞹnkø na joo ko texe yo ntee (Romanos 12:⁠2). Jmanchʼa jmanchʼa ro potꞹgø in vida y kja ne zana enero ne kjɇɇ 1974, ro kibʼigø kja nrreje nzakja testigo e Jehová.

Zø a rgua kibʼigø kja nrreje xi mi ꞹdʼꞹgø nabadiji. Nzakja na paa ke mi pa jichijme yo ntee nu Jñaa e Yose, ro janda na mbe̱ʼe̱ ja ma ponꞹ in radio ke mi bʼꞹbʼꞹ kja in carro. Nakʼua ro bʼꞹgꞹ ro ma tⱥjⱥ. Ma a mi tsjatjo ro penchʼi, angeze go mbɇzi kʼꞹ radio y sido o bʼꞹgꞹ. Ma ro xikʼø kʼo dyaja kʼo bi kjogꞹ ko in radio, na kjuarma o dyøngꞹ: “¿Pje rgui tsjage ma rgui penchʼi kʼꞹ mbe̱ʼe̱?”. Kʼꞹ tʼønꞹ go tsjakø ro unkʼo nguenda ke xi mi bʼɇxtjo ro potꞹgø in vida.

Kja ne zana octubre ne kjɇɇ 1974, ro pjꞹrꞹ ne bʼɇpji de evangelización voluntario, dya pje mi kjontʼkꞹji. Mi jizhgø nu Jñaa Mizhokjimi yo ntee 100 hora nu zana. Nakʼua o zokꞹji ro ma pɇpji kja nu central de yo testigo e Jehová a Brooklyn (Nueva York). Kja ne kjɇɇ 1978 ro nzhogꞹ a Los Ángeles ngekʼua ro pjørꞹgø in nana kʼꞹ mi sødye. Ma o kjogꞹ ye kjɇɇ, ro chjꞹntꞹgø ko e Aarhonda. Angeze me go mbøxkꞹ ro pjørꞹ in nana jesta ma o nrru̱u̱. Kjanu go mbitazꞹbʼe kja ne Escuela Bíblica de Galaad de la Watchtower. Ma go nguarꞹ k’ꞹ curso go penkejme nzakja misioneros a Panamá, nu ja xi ri bʼꞹnkøbʼedya.

Ndizi ma ro kibʼigø kja nrreje, bʼꞹbʼꞹ paa ke me na sʼɇzhi dya ra mbɇkuɇgø nabadiji. Ma kjo kʼo nee ra chu̱ʼu̱ ri kʼueñegø o ri kjapꞹgø ra juenji, na punkjꞹ ntee ñe in musu xitsiji me na joo kʼo ri kjagø, me ti kentrjogø ke dya kja ri mbɇkuɇ nabadiji. Ri pa̱ra̱ ke dya ro potꞹ in vidatsjɇ. Ri creo ke ne Biblia pɇsʼi poder ngekʼua søø ra potꞹ in vida yo ntee (Hebreos 4:12).

Ne Biblia a mbøxkꞹgø na punkjꞹ kja in vida, go jitsʼkø ja rga bʼꞹnkø na joo ko yo dyaja ntee. Nudya dya kja kjo ri nzhotꞹ, kʼo ri kjagødya ri pjøsʼꞹ yo ntee ra mba̱ra̱ji kjo nge Mizhokjimi. Ro jichigø kʼo mama ne Biblia na bʼɇzo ke mi ꞹbʼe ma mi pebʼe kja ngunxørꞹ. Ma angeze go ngibi kja nrreje ro ka̱ra̱bʼe kja na mismo ngumꞹ janzi zana, jesta nudya xi ri jogø na joo ko angeze. Nutsʼkø ñe in suu a ro pjøsʼꞹbʼe ro pjɇzhiji testigo e Jehová más de ochenta ntee.

Me ri unkʼø pojo e Jehová ke o dyakꞹgø na vida kʼꞹ me na joo, me ri mⱥkjødya ke ri ñe̱kjo kjuarma kʼo me na jonte.