XORꞸ 7
Ra xitsʼi jaga kjaa o Reino Mizhokjimi
1. ¿Pje nge o Reino Mizhokjimi?
¿Pjenga e Jesús ra manda na joo? (MARCOS 1:40-42)
Ne Biblia mama dya kja ra mezhe ra zⱥdʼⱥ kʼe paa ma o Reino e Mizhokjimi ra chjotꞹ yo manrro kʼo mandajidya kja ne Xoñijomꞹ. Ngextrjo o Reino e Mizhokjimi ra manda, ra tsjaa kʼo na joo, ra mbøsʼꞹ yo ntee ngekʼua dya pje ra bʼɇtsʼpʼiji ñe ra nga̱ra̱ji na joo. Nrrexe yo ntee ra sʼiyaji o dyoji ñe ra mbøsʼꞹji o minteji. Xorꞹge kja Daniel 2:44; Mateo 6:9, 10; 24:14, TNM.
Kʼe ntee kʼꞹ manda kja dʼa reino nge kʼe rey. Xo akjanu e Jehová o juajnꞹ e Jesucristo ngekʼua ra manda kja o Reino. Xorꞹge kja Apocalipsis 11:15.
Jñanrra ne video ¿Qué es el Reino de Dios?
2. ¿Pjenga ri manji ke dya bʼꞹbʼꞹ na Rey nzakja e Jesús?
Dya bʼꞹbʼꞹ na Rey nzakja e Jesús, angeze me na jonte, ra ngeje na Rey kʼꞹ ra tsjaa kʼo me na joo (Mateo 11:28-30). Ndizi ajensʼe, e Jesús ra manda kja ne Xoñijomꞹ. Angeze xo me na zezhi ngekʼua soo ra mbøsʼꞹ yo ntee. Ma e Jehová go tsjapʼꞹ ro tetrjo e Jesús, go nzhogꞹ ajensʼe, o zⱥtrʼⱥ nuja bʼꞹbʼꞹ e Jehová go tebʼenu (Hebreos 10:12, 13). Go ndebʼe jesta ma go zⱥdʼⱥ kʼe paa ma e Jehová go unꞹ ro mbɇzhi rey ajensʼe. Xorꞹge kja Daniel 7:13, 14.
3. ¿Janzi ntee ra ma mandaji ko e Jesús ajensʼe?
Mizhokjimi o juajnꞹ ntee kʼꞹ ra mandaji ko e Jesús ajensʼe (Daniel 7:27). E Mizhokjimi primero o juajnꞹ kʼo apostole kʼo go tsjaji kʼo mi mama e Jesús. Yo paadya e Jehová xi ga juajnꞹ ndinxu ñe bʼɇzo kʼo ra ma mandaji ko e Jesús. Ma ga tu̱ji, nzakja e Jesús ra tetrjoji na yeje ngekʼua ra moji ajensʼe, dya kja ra soo ra janrraji. Xorꞹge kja Juan 14:1-3; 1 Corintios 15:42-44.
¿Janzi ntee ra moji ajensʼe? E Jesús go mama ke “janzitrjo [...]” ra moji ajensʼe (Lucas 12:32). Ngextrjo 144.000 ntee ra ma mandaji ko e Jesús. Xorꞹge kja Apocalipsis 14:1.
4. ¿Pje go tsjaa e Jesús ma go mbꞹrꞹ go manda ajensʼe?
Kja kʼe kjɇɇ 1914, e Jehová o ñesʼe e Jesús ro manda kja o Reino. * Ma go mbꞹrꞹ go manda e Jesús go pjongꞹ ajensʼe e Satanás ñe kʼo demonio, go pa̱ntrʼa̱jiba kja ne Xoñijomꞹ. E Satanás meko ꞹdʼꞹ na punkjꞹ ngekʼua o ne̱e̱ tsjaa kʼo me na sʼoo kja ne Xoñijomꞹ (Apocalipsis 12:7-10, 12). Ngekʼua yo manrro kjaji chu̱ʼu̱ ko ñaja pais, na punkjꞹ ntee dya pɇsʼiji pje ra ziji, pɇsʼi ngijeme kʼo na sʼoo xo bʼꞹbʼꞹ paa ma ga mbii na zezhi ne Xoñijomꞹ na punkjꞹ ntee ga tu̱ji. E Jesús go mama ke ma ro janrrajikʼo dya kja ro mezhe kʼe paa ke o Reino e Mizhokjimi ra mbøsʼꞹ yo ntee kja ne Xoñijomꞹ. Xorꞹge kja Lucas 21:7, 10, 11, 31.
5. ¿Pje na kjaa e Jesús nudya kʼꞹ manda ajensʼe?
Yo paadya, e Jesús pejñe o disipulo ra ma zopjꞹji yo ntee kja o ngumꞹji ra jichiji pje ra tsjaji ngekʼua ra nuji kʼe paa ma e Mizhokjimi ra tsjaa ne Xoñijomꞹ me rga zøø. Yo ⱥtⱥ Mizhokjimi mimiji jaga nee e Jesús. Yo nteeyo e Jehová me sʼiyakʼo, dya pje ra tsjapꞹ ma ra chjotꞹ yo kjaji yo na sʼoo kja ne Xoñijomꞹ. Xorꞹge kja Apocalipsis 7:9, 14, 16, 17.
Ma ra manda e Jesús mil kjɇɇ, ra tsjapꞹ me rga zøø ne Xoñijomꞹ janzi ma kjaa kʼe jardin a Edén. Ma ra nguarꞹ kʼo mil kjɇɇ, e Jesús ra nzhotꞹ e Jehová ne reino ngekʼua e Jehová ra manda texe yo paa (1 Corintios 15:24-26, TNM). Me na joo kʼo ra tsjaa o Reino Mizhokjimi, bʼꞹma i̱ pa̱rge ntee kʼe dya pa̱ra̱jikʼo, xipji ngekʼua xo ra mba̱ra̱ji pje ra tsjaa o Reino Mizhokjimi. Xorꞹge kja Salmo 37:10, 11, 29.
^ par. 6 Ma gi nee ri pa̱rge ma ngeje nu kjɇɇ 1914 ma o mbꞹrꞹ o manda o Reino Mizhokjimi, jñanrra nu nota 22 kja kʼe libro ¿Pje jitsʼkøji ne Biblia? Kja yo página 217-220.
