XORꞸ 5
¿Jaga nee e Mizhokjimi ke ra mimiji kja ne Xoñijomꞹ?
1. ¿Pjekja e Jehová go tsjaa ne Xoñijomꞹ?
E Jehová go tsjaa ne Xoñijomꞹ ngekʼua ra bʼꞹnjiba yo ntee. Dya go dyⱥtrʼⱥ e Adán ñe e Eva ngekʼua ro ma mimibi ajensʼe, e Jehová ix go dyⱥtrʼⱥ yo anxe ngekʼua ro nga̱ra̱ji ajensʼe ko angeze (Job 38:4, 7). E Mizhokjimi o ñɇme e Adán ñe e Eva kja na xoñijomꞹ kʼꞹ me ma zøø, mi ngeje kʼe jardin a Edén (Génesis 2:15-17). E Jehová mi nee angezebi ro mimiji na joo kja ne Xoñijomꞹ, dya ro nrru̱ji. Xorꞹge kja Salmo 37:29; 115:16.
Ma e Jehová o dyⱥtrʼⱥ ne Xoñijomꞹ ngextrjo kʼe jardin Edén me ma zøtrjo. E Mizhokjimi mi nee e Adán ñe e Eva ro musʼꞹ na punkjꞹ chʼii, ro pepjiji ro tsjaji nrrexe ne Xoñijomꞹ me na zøø (Génesis 1:28). E Mizhokjimi dya ra chjotꞹ ne Xoñijomꞹ, nrrexe yo paa ra bʼꞹbʼꞹ ntee kʼꞹ ra nga̱ra̱jiba. Xorꞹge kja Salmo 104:5.
Jñanrra ne video ¿Por qué creó Dios la Tierra?
2. ¿Pjenga ne Xoñijomꞹ dya kja nge nzakja kʼe jardin Edén?
E Jehová go pjongꞹ e Adán ñe e Eva kja kʼe jardin Edén nange dya go dyⱥtⱥbi e Mizhokjimi, o pekabi. Yo ntee dya soo ra tsjaji ne Xoñijomꞹ na zøø nzakja kʼe jardin Edén. Ma go peka e Adán ñe e Eva kʼo ntee go tsjaji kʼo na sʼoo (Job 9:24). Xorꞹge kja Génesis 3:23, 24.
¿Pje mbeñe Mizhokjimi? ¿Ra tsjaa ne Xoñijomꞹ me na zøø ja nzakja kʼo mi nee mi jingua? E Jehová me na zezhi angeze mama ra tsjaa ne Xoñijomꞹ me rga zøø (Isaías 45:18). Ra bʼꞹbʼꞹ ntee kʼo ra minji kja ne Xoñijomꞹ me nrro na zøtrjo ja nzikja ma go mimi e Adán ñe kʼe Eva kja kʼe jardin Edén. Xorꞹge kja Salmo 37:11, 34.
3. ¿Pje ra kjogꞹ ngekʼua ne Xoñijomꞹ ra nge me rga zøø?
E Jesús ñe kʼo o anxe e Mizhokjimi ra mbotrʼꞹji yo ntee kʼo na sʼonte kja Armagedón. E Jesús ra manda kja o Reino e Jehová, ra mbøsʼꞹ yo ntee kʼꞹ kjaji kʼo mama e Jehová ngekʼua dya ra nrru̱ji, ra minji texe yo paa kja ne Xoñijomꞹ kʼꞹ me rga zøø. Kjanu e Jesús ra nrrꞹtʼꞹji e Satanás, kjanu ra pa̱ntrʼa̱ kja na trʼoʼo kʼꞹ me na je̱e̱, ra ngotrʼꞹnu mil kjɇɇ. Xorꞹge kja Apocalipsis 20:1-3; 21:3, 4.
4. ¿Jingua dya kja ra supjreji?
Nudya na punkjꞹ ntee kjaji kʼo na sʼoo, ma ra jyɇzi Mizhokjimi ke xe ra kjaji ga kjanu ra zⱥdʼⱥ nu paa ke ra trjezeji yo ntee. Ngekʼua e Mizhokjimi ra chjotꞹ yo ntee kʼo kjaji kʼo na sʼoo, ¿jingua ra tsjaakʼo? E Jesús go mama ke ma ro janrrgoji ke ro bʼꞹbʼꞹ ntee kʼꞹ ro tsjaji na punkjꞹ kʼo na sʼoo, dya kja ro mezhe kʼe paa ma ra chjotꞹ e Mizhokjimikʼo. Xorꞹge kja Mateo 24:3, TNM; Mateo 24:7-13, 21, 22; Marcos 13:10, NTD.
Ma e Jesús ra manda ajensʼe kja o Reino e Jehová mil kjɇɇ, ra pjøxkꞹgoji ngekʼua dya kja ra supjreji (Isaías 9:6, 7; 11:9). E Jesús ra tsjaa bʼepji nzakja na rey xo ra nge na nrrambøkjimi kʼꞹ ra mbøsʼꞹ yo ntee kʼo sʼiyaji e Diosi ngekʼua dya kja ra titaji, dya kja ra sodyeji ñe dya kja ra tu̱ji. Xorꞹge kja Isaías 25:8; 33:24.
5. ¿Kjo ngeje kʼo ra minji kja ne Xoñijomꞹ?
Nuja jmurꞹji yo testigo e Jehová poji ntee kʼꞹ sʼiyaji e Jehová ñe pjechiji jarga tsjaji kʼo nee angeze
Yo ntee ke kjaji kʼo nee e Mizhokjimi nge yo ra mimiji kja ne Xoñijomꞹ ma me rga zøø (1 Juan 2:17). E Jesús o nrrⱥjnⱥ o disipulo ro ma jichiji yo ntee pje ro tsjaji ngekʼua ro minji na joo jaga nee e Jehová. E Jehová pjøsʼꞹ yo ntee, jichi pje ra tsjaji ngekʼua ra mimiji kja ne Xoñijomꞹ ma me rga zøø (Sofonías 2:3). ¿Jaga mbøsʼꞹ e Jehová yo ntee? Nuja jmurꞹji yo testigo e Jehová jichiji kʼo na joo kʼo mama ne Biblia, jichiji ra sʼiyaji o maleji, o paleji ñe o trʼii. Xorꞹge kja Miqueas 4:1-4.
