XORꞸ 2
¿Kjo ngeje e Mizhokjimi?
1. ¿Pjenga ra ⱥtⱥji e Mizhokjimi?
E Palesito ajensʼe dya bʼꞹbʼꞹ na paa ke ro mbꞹrꞹ ro bʼꞹbʼꞹ, dya xo bʼꞹbʼꞹ na paa ke ra nrru̱u̱ (Salmo 90:2). Angeze go dyⱥtrʼⱥ nrrexe kʼo i̱ janrrage ajensʼe ñe kʼo i̱ janrrageba kja ne Xoñijomꞹ. Kja ne Biblia e Mizhokjimi mama ke ra tsjaa kʼo me na joo (1 Timoteo 1:11). In Tatazgojme kʼꞹ bʼꞹbʼꞹ ajensʼe o dyakꞹji ne Xoñijomꞹ ngekʼua ro minjiba. Ngekʼua ngextrjo e Palesito ajensʼe ra unꞹji pøjø, ra sʼiyaji ñe ra ⱥtⱥji kʼo mama angeze. Xorꞹge kja Apocalipsis 4:11.
2. ¿Jaga kjaa e Mizhokjimi?
Dya kjo soo ra jñanrra e Diosi. E Diosi dya pɇsʼi o kuerpo nzakjazgoji. Angeze bʼꞹbʼꞹ ajensʼe, nutsʼkojme ke ri ka̱xtrjojme kja ne Xoñijomꞹ dya soo ra janrraji (Juan 1:18; 4:24). E Mizhokjimi me sʼiyazgoji ngekʼua o ñɇme na punkjꞹ nzhⱥjnⱥ, na punkjꞹ zaʼa kʼꞹ unꞹ lulu kʼꞹ me na kintrjo ngekʼua ra ziji. Ma ra pjonguenrraji jaga kjaayo ra unkoji nguenrra e Mizhokjimi me pa̱ra̱ na punkjꞹ. Me na nojo ne Xoñijomꞹ ja ri minkoji, xo me na nojo e jyarꞹ, me na nojo yo seje ñe yo tanseje kʼꞹ ri janrrgoji ma xomꞹ ga kjanu ri unkoji nguenrra ke e Mizhokjimi kʼꞹ o dyⱥtrʼⱥkʼo me na zezhi. Xorꞹge kja Romanos 1:20.
Ma ra xorꞹji ne Biblia ra pa̱ra̱ji jaga kjaa e Palesito ajensʼe xo mama pje nge kʼo mama Mizhokjimi ke ra kjaji ñe pje nge kʼo na sʼoo kʼꞹ dya nee ke ra kjaji. Kja ne Biblia mama jama zoʼo e Mizhokjimi ma yo ntee dya mi ⱥtⱥji mi kjaji kʼo na sʼoo xo mama jama zoʼo ma mi kjaji kʼo ma joo. Xorꞹge kja Salmo 103:7-10.
3. ¿Pje ni chju̱u̱ e Palesito ajensʼe?
E Mizhokjimi go mama: “Ni chju̱zgo Jehová” (Isaías 42:8). Zo ri xipji Diosi, Mizhokjimi, e Palesito ajensʼe ni chju̱u̱ Jehová. Yo jñatrjo ma nⱥmbʼⱥji o chju̱u̱ ri dyⱥrⱥge ga kjaba: “Jehová”. Xo bʼꞹbʼꞹ ntee kʼo xipjiji “Yavé”. Xorꞹge kja Salmo 83:18.
Nudya na punkjꞹ Biblia dya kja jñusʼꞹji o trju̱u̱ e Jehová. Pe mi jingua ma go opjꞹji ne Biblia axto zoo 7.000 bes ke go jñusʼꞹji o trju̱u̱ e Mizhokjimi. E Jesús mi pa̱ra̱ ke e Palesito ajensʼe ni chju̱u̱ Jehová ngekʼua go jichi yo ntee pje ni chju̱u̱ o tata. Xorꞹge kja Juan 17:26, NTD.
Jñanrra ne video ¿Tiene Dios un nombre?
4. ¿Nezgoji e Jehová?
Nzakja ne bʼɇzo nu i̱ janrrageba me sʼiya nu tsʼixutrʼi, ga kjanu e Jehová me sʼiyazgoji ngekʼua ra mbøxkʼꞹgoji
Na punkjꞹ ntee manji ngeje Mizhokjimi kʼꞹ penkʼezgoji nrrumꞹ kʼo na sʼoo, pe dya nge ga kjanu. E Jehová me sʼiyazgoji. Xorꞹge kja Santiago 1:13.
E Jehová jɇzkoji pje ni mbe kʼo ri nee ra kjagoji, ma ra kjagoji kʼo nee angeze ra soʼo na joo (Josué 24:15). Zo ri pa̱ra̱ji pje ra kjaji, na punkjꞹ ntee dya ⱥtⱥji e Jehová kjaji kʼo na sʼoo ngekʼua dya mimiji na joo. E Jehová dya nee ke ra kjajikʼo, sentio kja in mꞹbʼꞹ ma ga jñanrra ri kjogꞹji kʼo na sʼoo. Xorꞹge kja Génesis 6:5, 6.
E Jehová me nezgoji, angeze nuu ke ra ka̱ra̱ji na joo ma dya kja ra bʼꞹbʼꞹ ntee kʼo kjaji kʼo na sʼoo. Ngekʼua angeze ra chjotꞹ yo ntee kʼo kjaji kʼo na sʼoo, akjanu yo ntee dya kja ra supjreji. Kja ne xiskuama nu xorꞹ 8, ra nuji pjenga e Jehová jɇzgoji ke ra supjreji. Xorꞹge kja 2 Pedro 2:9; 3:7, 13.
5. ¿Pje ra kjaji ngekʼua ra joji ko e Mizhokjimi?
E Jehová nee ke ri zopjꞹge, angeze ra dyⱥtkʼⱥ ra mbøxkʼꞹ (Salmo 65:2; 145:18). Angeze me mbenzgoji jarga mbøxkʼꞹjme. Zo ri kjagoji kʼo na sʼoo dya nugoji na ꞹꞹ. Ma ri øtꞹ ra ponkʼꞹtsʼꞹ dya ra tsjapꞹ nguenrra kʼo bi tsjage. Akjanu me ri mⱥjⱥbi ri jobigebi. Xorꞹge kja Salmo 103:12-14; Santiago 4:8.
Ra dyⱥtⱥji e Jehová, ra sʼiyaji kʼua janzi ga sʼiyazgoji (Marcos 12:30). Xorꞹge pje mama o Jñaa e Jehová akjanu ri pa̱rge jaga kjaa angeze. Ri pjechi jargi tsjage kʼo mama angeze. Akjanu ra ñetsʼe kʼꞹ me gi sʼiyage, ri soge ke bʼemi bʼꞹbʼꞹ na Mizhokjimi ke me sʼiyatsʼꞹ. Xorꞹge kja 1 Timoteo 2:4; 1 Juan 5:3.
